KOMMUNINUT QINERSINEQ 2025
Qeqertalik nukittorsarneqassaaq allanngortinneqarani
Siumup, Atassutip Naleqqallu isumaqatigiissutaat naapertorlugu, kommunip aaqqissuussaanera annertuumik allanngortinneqassasoq innuttaasut naatsorsuutigisinnaagaluarpaat, maannali Demokraatit, Inuit Ataqatigiit Naleraallu siuttoralugit, aaqqissuussaanermik nukittorsaaneq naatsorsuutigisinnaavaat.
Siumut, Atassutip aamma Naleqqap suleqatigiinnissamik isumaqatigiissutigisaraluat naapertorlugu, kommunimi allannguinerit annertuut sakkortuutullu pilersaarutigineqaraluarput. Kisianni isumaqatigiissut ikinnerussuteqalernikkut taamaatiinnarneqarpoq. Maanna Demokraatit, Inuit Ataqatigiit aamma Naleraq piareersitsipput pilersaarummik nutaamik, tassanilu kommunip aaqqissuussaanera attatiinnarneqassasoq, taamaattorli kiffartuussinera nukittorsarneqassasoq anguniarneqarluni.
Asseq: Isumaqatigiissutip saqqaanit assilisaq
Siumup, Atassutip aamma Naleqqap akornanni kommunimut qinersereernerup kingorna isumaqatigiissutigineqaqqaartumi, partiit suleqatigiilersussat allannguutinik annertuunik pilersaaruteqaraluarput.
Partiit kommunip aaqqissuussaanera siornatigutut allanngortinniarlugu pilersaaruteqaraluarput, tamatumalu malitsigisaanik borgmesteriusimasoq Ane Hansenip kommunip innuttaasuinut aningaasaqarnikkut kingunerluutaasinnaasunik mianersoqqussutigaa.
Partiit suleqatigiileraluartut aamma Qeqertalik Business Council atorunnaarsinniarlugu pilersaaruteqaraluarput, suliassallu politikkikkut ataatsimiititaliamut tunniunneqarnissaat siunertarineqaraluarluni. Eqqagassalerinermik suliffeqarfiup Esani A/S-ip Qeqertaliup peqataaffia aamma nalilersorniarlugu pilersaaruteqaraluarput, tamatumalu peqatigisaanik aamma partiit suleqatigiileraluartut Kitaani nuna eqqissisimatitassasut sulissutigineqartoq unitsissallugu pilersaaruteqaraluarput.
Taamaattoqassanngilarli, tassami inissititerluni ataatsimiinneq suli pinngitsoq, Siumut aamma Atassut amerlanerussutaarupput, Naleqqap isumaqatigiissut qimammagu.
Isumaqatigiissut nutaaq siullermut naleqqiullugu qajassuarneruvoq
Maanna Demokraatit, Inuit Ataqatigiit aamma Naleraq nutaamik suleqatigiinnissamut isumaqatigiissuteqarput, S, A aamma N akornanni siullermut naleqqiullugu, isumaqatigiissut qajassuarneruvoq.
Assersuutigalugu partiit kommunip aaqqissuussaanera maannakkut ingerlasoq nukittorsarniarlugu isumaqatigiissuteqarput. Nukittorsaanerup ilaatigut kommunimi nunaqarfiit suliniuteqarfigineqarnerullutillu pitsaanerusumik peqataatinneqarnissaat anguniarneqarpoq.
Suleqatigiilertussat nutaat aamma Qeqertalik Business Council atorunnaarsinniarnagu isumaqatigiipput, paarlattuanilli suliffeqarfimmut suliassanik amerlanerusunik tunniussisoqassasoq isumaqatigiissutaavoq, inuussutissarsiornermut suliniutit annertunerusut, ilaatigut takornariaqarnermut tunngasut, pilersinniarlugit.
Aamma Esani A/S eqqagassanik ingerlatsiviusoq isumaqatigiissummi taakkartorneqarpoq, kisianni piginnittutut atorunnaarnissamik eqqarsarnani, paarlattuanilli suleqatigiit nutaat Esanip suliassaanik isumaqatigiissummik nutarterinissamik sulissuteqarnissaq kissaatigineruaa, taamaalilluni Kommune Qeqertalik eqqagassalerinermik suliffeqarfimmit sullinneqarnera annertunerusumik iluaqutaasinnaaqqullugu.
Borgmesterinngortussaq Simigaq Heilmann (D) siuttoralugu suleqatigiit ilanngugit sulissutiginiarpaat kommunimi sulisut "assaat kissalaartut" pitsaanerusumik atugaqalernissaat, kiisalu kulturimut, timersornermut sunngiffimmilu inuunermut tunngasunik pingaarnersiuinerminni siuarsaassamaarlutik.
Kommunalbestyrelse nutaaq tallimanngornermi maajip aappaanni ataatsimeerngaassaaq.
