Qeqertarsuarmi innuttaasut akerliussutsimik takutitsisut

15. september aallarnerfigalugu Qeqertarsuarmi peqqissaaviup ingerlanneqarnera allanngortinneqarpoq tassani ilaatigut ammasarfiit sivikillineqarlutik, tamannalu innuttaasunik kiisalu peqqissaavimmi sulisunik annertuumik ernumalersitsivoq.

Pissutsit ernumanartumiilersimanerat Qeqertarsuarmi peqqissaavimmi niviarsiaanerugallartup sapaatip akunnera kingulleq Sermitsiamut oqaatigaa, taannalu aallaavigalugu Peqqissutsimut inunnullu Innarluutilinnut Naalakkersuisup Anna Wangenheimip, Demokraatit, Qeqertarsuarmi peqqissaavimmi sulisut, kiisalu Kommune Qeqertalimmi borgmester Simigaq Heilmann, Demokraatit, ataatsimeqatigai.

Innuttaasut ernumasut

Qeqertarsuarmi Peqqissaavimmi pissutsit ernumanartut

Qeqertarsuarmi peqqissaaviup ingerlanneqarnera siullermik saqqummiunneqartutut ajortiginngitsoq Peqqissutsimut Naalakkersuisup ataatsimeereernerup kingornatigut ilaatigut erseqqissaassutigaa, kisiannili pissutsit piviusut allaanerusut ataasinngormat nalunaaqutaq sisamanut akerliussutsimik takutitsinissamik innuttaasunillu atsiortitsinissamik aaqqissuussisut isumaqarput.

Akerliussutsimik takutitsinermi inuit 70-it missaani peqataapput, atsiornernillu Peqqissutsimut Naalakkersuisumut pingasunngormat nassiunneqarput. Akerliussutsimik takutitsineq Qeqertarsuarmi peqqissaaviup ingerlanneqarnera pillugu nutaamik eqqarsalersitsiumaartoq akerliussutsimik aaqqissuussisut neriuutigaat.

Akerliussutsimik takutitsisut Qeqertarsuarmi peqqissaaviup silataanut allagartarsualisaarlutik ingerlaaqatigiipput, peqqissaavilli nalunaaqutaq sisamanut matusalernikuummat peqqissaavik inoqanngilaq qulliillu qaminngallutik.

Akerliussutsimik takutitsinissamut aaqqissuisut sinnerlugit Ane Sofie A. Mølgaard oqaaseqartuuvoq, aaqqiissuteqartoqarnissaalu siunertaralugu Peqqissutsimut Naalakkersuisoq Qeqertarsuarmi innuttaasunik ataatsimiisitsisariaqartoq, taassuma ilaatigut oqaatigaa.

- Nassuiaatigineqartut pissutsillu piviusut imminnut ataqatigiinngillat, taamaattumik akerliussutsimik takutitsinissaq pisariaqarsimavoq, aaqqissuussarlu innuttaasunit soqatigineqarluarmat tamanna qujamasuutigaarput, taanna oqarpoq.

Utoqqaq angerlartinneqartoq

Napparsimasut pitsaanerusumik sullinneqarnissaat siunertaralugu Qeqertarsuarmi peqqissaavimmi sullissineq annikitsuinnarmik allannguuteqartoq, kiisalu napparsimasut katsorsarneqarnissamik pisariaqartitsisut peqqissaavimmi ulloq unnuarlu nakkutigineqarlutik uninngatinneqarsinnaasut, sapaatip akunnera kingulleq Peqqinnissaqarfiup qullersaqarfianit ilaatigut ilisimatitsissutigineqarpoq.

Taamaakkaluartoq arnaq 80-inik ukiulik timimigut annertuumik aseruunneqartoq paasineqarmat peqqissaavimmut sapaatip akunnerata naanerani unitsinneqarsimasoq, peqqissaavimmilu unnukkorsiornerit unnuarsiornerillu unitsinneqarnikuummata ulloq taanna nalunaaqutaq sisamanngulersoq angerlartinneqarsimasoq, tassunga qanigisaasut akerliussutsimillu takutitsinermut peqataasut Sermitsiamut oqaatigaat.

- Sulisut soraalermata angerlartinneqarpoq peqqissaavillu aqaguani ullaakkut ammaqqimmat unitseqqippaat, peqqissaavillu arfinernut matuppat aamma angerlaqqittariaqartoq paasitinneqarpugut.

- Pissutsit taamaannerat ernumanartorujussuuvoq, taamaattumik akerliussutsimik takutitsineq iluaqutaajumaartoq neriuutigaarput, arnamut 80-inik ukiulimmut qitornaasoq Karen Dorthe Lindenhann oqarpoq.

Saaffiginnikkami paasisaqanngitsoq

81-inik ukiulik Knud Jensen akerliussutsimik takutitsisunut peqataavoq, peqqinnissaqarfimmiillu sullissineq kipiluttunartoq, taassuma oqaatigaa.

- Ullaaq nakorsiarniarlunga peqqissaavimmut sianerpunga, kisiannili oqarasuaat nammineerluni akisartoq qallunaatuinnaq immiussaavoq, sulisunillu oqaluussaqarsinnaannginnama oqarasuaat iliinnarpara.

- Qeqertarsuarmi peqqissaavimmi sullissineq annikillisaaffigineqarpoq, kisiannili Qeqertarsuaq ukiup ilaani tikikkuminaallisarmat pinartoqassagaluarpat napparsimasunut ajorluinnartumik kinguneqarsinnaanera ernumanarpoq, taanna oqarpoq.

Pinartoqartillugu Kalaallit Nunaani Peqqinnissaqarfik oqarasuaatikkut sukkulluunniit saaffigineqarsinnaasoq aammalu Qeqertarsuarmi peqqissaavimmi sulisunik ikilisaasoqarnissaa maannakkut pilersaarutaanngitsoq, attaveqatigiinnermut siunnersorti Bodil Jensen paasissutissiivoq.