Qeqqata Kommuniani aningaasanik atuivallaartut
Atugarissaarnermut immikkoortortaqarfimmi 3.147.036 koruuninik atuivallaarfiuvoq. Tassani immikkoortortaqarfimmi januaarimiit juulip qaammataata tunganut atuivallaarneq 101,4 procentiulluni.
Qeqqata Kommunia
Aningaasat 3.147.036 koruunit Qeqqata Kommuniani Atugarissaarnermut immikkoortortaqarfimmi januaarimiit juulip tungaanut atuivallaarnermi atorneqarput.
Kisitsisit Atugarissaarnermut ataatsimiititaliami ataatsimiinneranni imaqarniliami takuneqarsinnaapput.
Sulisut peqannginnerat aningaasanik naleqartut
Utoqqaat Angerlarsimaffiat Qupanuk Sisimiuniittoq 503.385 koruuninik atuivallaarsimavoq.
Imaqarniliami paasinarsivoq napparsimalluni sulinngittoqartarneranik (napparsimaneq/erninermut atatillugu sulinngiffeqarneq/sulinngiffeqarneq il.il.) aammalu avataanit paarlatsinik aningaasanik atuivallaarnermut peqqutaapput.
- Utoqqaat angerlarsimannianni aqutsisut aningaasaqarnermik aqutsinermik ukkatarinnilluassasut ukiullu sinnerani malinnaaffiginneqqissaassasut nalunaarfigineqarnikuupput.
Sulisussaqarniarneq ajornartorsiutaasoq
Najugaqaqatigiiffik 2 "PISOQ" aningaasanik suli atuingaatsiarsimavoq. Januaarimiit juulip tungaanut atuineq 109,2 procentiuvoq, 1.128.076 koruuninik atuivallaarfiulluni.
Atuivallaarneq sulisunik sulilersitsinissamik paarinniinnarnissamillu unamillernartitaqarnermik, napparsimanernik, taakkuninngalu sivitsuinernik, paarlattaasarnermut suliffeqarfimmit avataaneersumit paarlatsinik annertuumik atuinermik peqquteqarpoq.
- Pisup aningaasaqarneranik nakkutiginnittunit kiisalu najugaqartut sullinnerisa ajornassusaat aallaavigalugu sulisunik pisariaqartitsinermik nalilersuisussanit nutaarsiassaqanngilaq.
Taartaasunik sulisoqasoqarneq missingersuutinut unammillertitsivoq
Maniitsumi Atugarissaarnermut immikkoortortami akissarsianut atuineq 66.576.280 koruuninik aningaasaliiffigineqartoq 103,9 procentiuvoq, 1.524.657,67 koruuninik atuivallaarfiulluni.
Qeqqata Kommunia naapertorlugu immikkoortortaqarfinni arlalinni napparsimalluni sulinngiffeqartartut amerlisimanerat aamma taartaasunik atorfinitsitsisoqartarsimanera atuivallaarnermut pissutaavoq.
- 2024-mi kvartalit aappaata naanerani Maniitsoq 3,6 procentinik aningaasanngorlugu 2.887.711 koruuninik atuivallaarfiuvoq, taamaalilluni ukiumut tamarmiusumut atuivallaarnissatut naatsorsuutigisaq ikinnerpaamik 5,1 millionit koruuniussaaq.
- Inunnut innarluutilinnut immikkoortortami, utoqqarni siusinaartumillu pensionisialinni kiisalu najugaqaqatigiiffinni aammalu angerlarsimaffimmi ikiorteqarfimmi atuivallaartoqarfiuvoq. Tamanna ilaatigut inunnut innarluutilinnut immikkoortortaqarfimmiit aningaasanik (katillugit 10,7 mio. koruuninik) aammalu angerlarsimaffinni ikiorteqarfimmi inunnut innarluutilinnullu najugaqaqatigiiffinni suliassat sukkasuumik amerliartornerinik peqquteqarpoq, imaqarniliami allassimavoq.
