Republikanerip USA-p nunap assingani Kalaallit Nunaat ilannguppaa
Republikaneri Mike Collins, USA-p inatsisartuinut qinigaaqqittoq, sisamanngormat USA-p nunap assinga, Kalaallit Nunaat ilanngullugu, saqqummiuppaa.
Nunap assinga Mike Collinsip ikkussaa “Project 2029”-mik taaguutilik.
Assiliisoq: Mike Collins/X
Republikanerinit qinigaaqqeqqammeqqissaartoq Mike Collins sisamanngornermi USA-p nunap assinga, Kalaallit Nunaat ilanngullugu, inoqatinut attaveqaatinut X-imut saqqummiuppaa. Nunap assingani Kalaallit Nunaat aappalaartumik qalipaateqarpoq, Republikanerit partiiata qalipaataanik.
Politikerip assiliaq naatsumik ima oqaasertalerpaa: “Projekt 2029.”
Danskit nutaarsiassaqartitsiviat TV2.dk allappoq USA-p siunissaanut pilersaarutinut akerleriissutaasunut oqallisaasunullu "Projekt 2025"-mut oqaasertaq eqqaanarsinnaasoq.
TV2 nangilluni allappoq AP naapertorlugu Mike Collins arlaleriarluni inoqatinut attaveqaatini „peqqusaarluni allaaserisaqartarnini“ pissutigalugit maluginiarneqarsimasoq, Donald Trumpimillu tapersersuilluarnini ilisimaneqaatigaa.
USA-mi præsidentimut qinersineq pillugu oqallinnermi Kalaallit Nunaat siullermeerluni eqqartorneqanngilaq.
Oktobarip naanerani Trumpip naalakkersuinerani atorfilittat pingasut tusagassiuutini National Interest-imi allaaserisami allapput qinersisoqareerpat USA-p Kalaallit Nunaat isumaqatiginninniarfigisariaqaraa, Kalaallit Nunaat Danmarkimit avissaarpat atuutilersussamik.
Kalaallit Nunaata USA-mut qaninnerulernissaanut tunngavilersuutigineqartut tassaapput Kalaallit Nunaata inissisimaffia pingaarutilik kiisalu aatsitassanik annertuunik peqarnissaa.
