Sermersooq maalaaruteqarnermi ajorsarlunilu 250.000 koruuninik akiliisussanngortinneqartoq
Kommuneqarfik Sermersooq siunnersuisarfimmut Norion Consult ApS-imut 200.000 koruuninik taarsiisussanngortinneqarlunilu qaavatigut suliami aningaasartuutinik 50.000 koruuninik akiliisussanngortinneqarpoq, Pisortat Pisiortortarneranni Neqerooruteqartitsinermi Maalaaruteqartarfik aalajangerpoq.
Kommuneqarfik Sermersooq Københavnimi siunnersuisarfimmut Norion Consult ApS-imut taarsiisussanngortinneqarpoq.
Assi: Leiff Josefsen
Siunnersuisarfik Norion Consult ApS Kommuneqarfik Sermersuumi illoqarfiit pingaarnersaannut periusissiamik suliaqarnissamut neqerooruteqarluarnerpaagaluartoq kommunip neqerooruteqartitsisoq alla toqqarpaa.
Tamannalu maleruagassanik ersarissunik unioqqutitsineruvoq, tamannalu Pisortat Pisissutigisaannik Naammagittaalliuuteqartarfiup aalajangiinerani atuarneqarsinnaavoq.
- Kommuneqarfik Sermersooq Pisortat Pisiortortarneranni Neqerooruteqartitsinermi Maalaaruteqartarfik pillugu Inatsisartut inatsisaanni § 6-imi aamma § 17, imm. 7-imi naligiissitaaneq ammasuunerlu pillugit tunngaviusunik allassimasunik unioqqutitsivoq, tassami Kommuneqarfik Sermersuup nalilersuinera naapertorlugu piumasaqaatit immikkoortut suliarinnittussarsiuussinermut piumasaqaatini allassimasut unioqqutillugit isumaqatigiissuteqarpoq, naammagittaalliuuteqarnermut ataatsimiititaliaq ataatsimut isigalugu inerniliillunilu “naammagittaalliortup neqeroorutaanik itigartitsinerminut tunngavilersuinnginnami” kommuni inatsimmik unioqqutitsisimasoq erseqqissarpaa.
Neqeroorutinut tunniussinissamut 2023-mi decembarimi killigititaqarpoq, neqeroorutillu tallimat tiguneqarsimasut „taakkualu tamarmik suliamut tunngasunik ileqqulersuutitigullu piumasaqaatinik aalajangersimasunik naammassinnittut“ illoqarfiit pingaarnersaata kommunia februaarip 28-ani nalunaarpoq, naammagittaalliuuteqartarfiup suliamik saqqummiussinerani allassimavoq.
Kommunip neqeroorutigineqartut tallimat allattorsimagai assigiinngitsunillu najoqutaqarluni nalilersorsimagai oqaatigineqarpoq.
Angusarissaarnerpaasut
Norion Consult 76,2-nik pointeqarluni angusarissaarnerpaavoq, suliariumannittussarsiuussinermilu ajugaasoq 70,4-innarnik pointinnappoq - angusarissaarnerpaamut tulliulluni. Aalajangiineq tamanna Norion Consultimi paasiuminaatsilluinnarpaat. "Pilersuisussatut toqqarneqartoq tassaavoq: (neqerooruteqartitsinermi ajugaasoq), tamannalu politikkikkut aalajangiinikkut pivoq", Kommuneqarfik Sermiersooq erseqqissaavoq.
Illoqarfiit pingaarnersaata periusissiornissaanut neqerooruteqarnissamut decembarip 21-at killissarititaavoq, kikkullu neqerooruteqarnermi ajugaasimanersut kommuni februaarip 28-ani nalunaaruteqarpoq. Suliaq 2024-p sinnerani naammagittaalliuuteqartarfimmi ingerlanneqarpoq, taannalu 2024-mi decembarip 11-ani aalajangiiffigineqarpoq.
Suliap inernera aningaasaqarnermut inuussutissarsiornermullu ataatsimiititaliamut februaarip 19-ianni saqqummiunneqarpoq, ataatsimiititaliallu suliaq tusaatissatut tiguaa.
Maalaaruteqartarfiup aalajangiinera uani link-imi atuarneqarsinnaavoq
