Kommuneqarfik Sermersuup
inissiaatileqatigiiffiillu tallimat pisortanit inissialiornissamut
aningaasaliissutissanik katillugit 125 millionit koruuninik
taarsigassarsisimasut akornanni aaqqiagiinnginneq maanna uunga killissimavoq
soraartorpassuaqarluni illuatungeriinnilu eqqartuussivilersuussisoqarluni.
Pisortap Jackie Lyngip
Nuuk City Invest Aps-illu attartornissamut isumaqatigiissut juulip 31-anni
atorunnaarsippaat, inissialiornermi ingerlatseqatigiiffiup februaarimi 2021-mi
Kommuneqarfik Sermersuumut isumaqatigiissutigisaa.
Kommuneqarfik Sermersuup
inissiaatileqatigiiffiillu tallimat pisortanit inissialiornissamut
aningaasaliissutissanik katillugit 125 millionit koruuninik
taarsigassarsisimasut akornanni aaqqiagiinnginneq maanna uunga killissimavoq
soraartorpassuaqarluni illuatungeriinnilu eqqartuussivilersuussisoqarluni.
Pisortap Jackie Lyngip
Nuuk City Invest Aps-illu attartornissamut isumaqatigiissut juulip 31-anni
atorunnaarsippaat, inissialiornermi ingerlatseqatigiiffiup februaarimi 2021-mi
Kommuneqarfik Sermersuumut isumaqatigiissutigisaa.
SERMERSUUMI PERIUSEQ
2010-kkut ingerlaneranni
Nuummi inissiaqarnikkut pissutsit ilungersunarsiartuinnarsimapput – kommunip
nammineq sulisunut inissiaatai inissallu nalinginnaasut Iserit A/S-imiittut
Namminersorlutillu Oqartussat inissiaatileqatigiiffigai Ini A/S-imi kommunip inissiaatileqatigiiffianniittut
annertuumik tatineqarsimallutik. Kommuneqarfik Sermersuumi atorfillit 44-it 2015-mi atorfimminnut atatillugu
inissaminnik utaqqipput, ukiorlu taanna ukiakkut Aningaasaqarnermut
Inuussutissarsiornermullu ataatsimiititaliaq aalajangerpoq aningaasaliisartuni
namminersortuni inissianik attortortoqassasoq sulisunullu attartorteqqillugit.
Kingorna inissiat nalinginnaasut aamma Iserit A/S-imut attartortinneqarput
tamannalu naapertorlugu attartorteqqinneqarlutik.
Sermersuumi periuseq pinngorpoq.
Kommunalbestyrelsip
ataatsimiittarfiani isornartorsiuinerit, partiimit illuatungiliuttumit Siumumit
siuttuuffigineqartut, taakku pasilliipput periaatsimi inissanik
aningaasaliisartut marloriarlutik iluanaartinneqartut: Siullermik ukiuni 20-ni
atuuttussamik erniaqanngitsumik akilersorneqartussaanngitsumillu
taarsigassarsitinneqarput, kingornalu kommunip inissiat nutaat pineqartut
qaffasissumik akiliillutik attartorlugit. Ullumikkut kommunip
inuussutissarsiornikkut attartortitsinermut isumaqatigiissutaaniipput
attartortitsinerit 386-it taakkunannga arlaqartut utaqqiisaasumik
inigitinneqarlutik. Inuussutissarsiornikkut attartortitsinerit inissianik
aningaasaliinermi 125 millionit koruuninik taarsigassarsititsiffiusut 331-t
atorunnaarsinneqarput.
Aalajangiisut
Sermersuumi periuseq ingammik kommunalbestyrelsimit apriilimi 2017-imi
qinerneqartumit atorneqarpoq.
Inuit
Ataqatigiit (9): Harald Bianco, Inge Olsvig Brandt, Rasmine Geisler, Charlotte
Ludvigsen, Malene Lynge, Knud Mathiassen, Asii Chemnitz Narup, Uju Petersen,
Henrik Rachlev.
Siumut (6): Peter Davidsen, Thiiooq Knudsen, Ane Egede Mathæussen, Martha Lund
Olsen, Rolf Piké, Laura Táunâjik Uitsatikitseq.
Demokraatit (3): Randi Vestergaard Evaldsen, Justus Hansen, Nivi Olsen.
Atassut (1): Mala Høy Kúko.
Maajip 2-anni 2017-imi inissitsiterfiusumi toqqarneqarput borgmester Asii
Chemnitz Narup, IA, borgmesterip tullia siulleq Nivi Olsen, D, borgmesterip
tulliata aappaa Malene Lynge, IA.
Qinigaaffiup ingerlanerani arlallit partiinut allanut nuupput. Juunip 11-anni 2019-imi immikkut ittumik ataatsimiinnermi Charlotte Ludvigsen
borgmesteritut qinerneqarpoq, Uju Petersen borgmesterip tulliatut siullertut,
Harald Bianco borgmesterip tulliata aappaatut, tamarmik Inuit Ataqatigiit.
Qinigaaffimmi ataatsimiinneq kingulleq marsip aappaanni 2021-mi pivoq.
Inuit Ataqatigiit (9): Charlotte Ludvigsen, Charlotte Piké, Uju Petersen,
Harald Bianco, Inge Olsvig-Brandt, Pipaluk Lynge-Rasmussen, Knud Mathiassen,
Henrik Rachlev, Lone Rosengreen Pedersen.
Siumut (7): Mala Høy Kúko, Peter Davidsen, Thiiooq Knudsen, Ane Egede
Mathæussen, Jens Kristian Berthelsen, Rolf Pike, Lund Kúko.
Demokraatit (2): Nadia Olsen, Justus Hansen.
Suleqatigiissitsisut (1): Michael Rosing.
PISIARINISSAAT PILERSAARUTAANNGITSOQ
Kommuneqarfik Sermersuup
Nuuk City Invest Aps-imik attartornissamut isumaqatigiissutaaniippoq Nuummi
Nuukullak 3-mi inissianik attartortittakkani inissianik 73-inik
piseqqaartussaatitaaneq.
Februaarip
aallaqqaataanni 2021-mi attartornissamut isumaqatigiissummi
isumaqatigiissutaavoq kvadratmeterimut 24.500 koruunit atorneqassasut.
Inissiat 6.035
kvadratmeteriupput taamaalilluni pisinermi aki 148 millionit koruuniussaaq
saniatigut februaarimit 2021-mit akinut naleqqussaaneq.
Ullumikkut
Nuummi inissianik niuerfimmi akit atuuttut sanilliukkaanni akiat
pitsaasupilussuuvoq.
Naalakkersuisulli pisineq qanorluunniit isikkoqartinneqaraluarpat kommunip
iliuuserisai akuerisussaavaat, periuserlu Kommuneqarfik Sermersuup atugaa
Namminersorlutik Oqartussat allaffissuanni akuersaarneqartorsuunngilaq.
Kommuni
pilersaaruteqanngilaq Nuukullak 3-p pisiarinissaanut, kommunimi atorfillit
qullersaat Ole Jakobsen Sermitsiamut oqarpoq.
Atorunnaarsitsineq Nuummi
Nuukullak 3-mi inissianut 73-inut tunngasoq qaammatini pingasuni
piffissalerneqarpoq oktobarillu 31-anni atuutilissalluni.
Kommunip
atorunnaarsitsineq tigusimanerarlugu akueraa, atorunnaarsitsinerullu
atuutsinneqarnissaa akuerinagu, aaqqiagiinnginnerummat isumaqatigiissutip
oqaasertai naapertorlugit eqqartuussivimmi aaqqinneqartussaasoq, taamaallaat
illuatungerisamit atorunnaarsitsinerunngitsoq.
Taarsiullugu kommuni
ilimasaarivoq siunissami qanittukkut ingerlatseqatigiiffik
eqqartuussivilersuunniarlugu, ilaatigut oqaatigineqarluni Jackie Lyngip
akuerissagaa atorunnaarsitsineq naapertuutinngitsoq.
Aaqqiagiinnginnermi
pineqarput Nuukullammi ilaqutariit 73-it, kommunimi atorfillit qullersaat Ole
Jakobsen eqqissisaavoq.
Kommunip nittartagaani Ole
Jakobsen allappoq suliaq inatsisit atorlugit pisuusaarnermik taasani
ilaqutariinnut 73-inut kommunip inissiaatileqatigiivinit Iserimmit inissamik
attartortunut kinguneqarnavianngitsoq.
- Soorunami kommunip
qulakkiissavaa, attartortut arlaannaalluunniit inissiaminit anisitaassanngitsoq
una suliaq pissutigalugu, Ole Jakobsen allappoq.
Eqqartuussiviup
aalajangiinera
Kommunip Nuuk City Invest
Apsillu aaqqiagiinnginnerat eqqartuussivimmut anngutissasoq, kommunimi
atorfillit qullersaata nalilerpaa.
Eqqartuussinerussaaq
qanorluunniit inerneqarsinnaasoq.
– Qanoq ilillutit taama
nalorninngitsigalutit uppernarsarsinnaaviuk attartortut najugaqaannassasut Nuuk
City Invest eqqartuussinermi akuerineqarpat Nuukullammi attartornernik
atorunnaarsitsisinnaasoq?
– Immaqa kipparippallaamik
oqarneruvoq, kommunilli suut tamaasa sakkugalugit qulakkiissavaa innuttaasut
najugaqarfissaqarnissaat, Ole Jakobsen Sermitsiamut oqarpoq.
– Soorunami pisussanut sillimassaagut. Naluara taamatut aaqqiagiinnginnermi
eqqartuussivik qanoq sukkatigisumik aalajangiisinnaanersoq, maannamulli kommuni
isumaqarpoq eqqartuussivilersuussineq kinguartitsinermik sunniuteqassasoq.
Taamaalillutik attartortut inissiaminnit anisinneqarsinnaanngillat eqqartuussivik
inaarutaasumik aalajangiitinnagu, ilimagisaq akimorlugu Nuuk City Invest
atorunnaarsitsinermi ilalerneqassappat. Ole Jakobsenip ajuusaarutigaa kommunip Nuuk City Investillu akunnerminni
attartornissamut isumaqatigiissutaa atorunnaarsitsinermik
eqqartuussivilersuussinermillu kinguneqarmat.
– Isumaqatigiissummi illuatungerisatut pimoorussisutut neriuutigisimagaluarpara
isumaqatigiissutaasutut una aaqqiagiinnginneq eqqartuussivimmi
aaqqissinnaallutigu. Kusananngilluinnarpoq ilaqutariit 73-it uani suliami
sallunaveeqqutitut atorneqarnerat, Ole Jakobsen oqarpoq.
Uani
allaaserisami Jackie Lyng peqataarusussimanngilaq.
