SIK-p siulersuisui nutaat aaku - Jess G. siulittaasutut ingerlaqqippoq
SIK-p sulisartut kattuffiattut 24-ssaanik ataatsimeersuarnera ullumi naggaserneqarpoq siulittaasumik, siulittaasup tullianik siulersuisuunernullu ilaasortanik allanik qinersinermik.
Jess G. Berthelsen unammillerteqarani siulittaasutut qinigaaqqippoq.
SIK-p siulersuisuunertaavi. Saarliit: Siulittaasoq Jess G. Berthelsen, siulittaasup tullia Sofie Svendsen. Tunorliit saamerlermit: Jens Nuka Poulsen, Benjamin Kiel- sen, Pualuna Kivioq, Ane-Marie Havmøller-Jørgensen, Qulutannguaq Berthelsen, Else Jonna Lange aamma Nuunu Jerimiassen.
Foto: SIK
Ukiut 35-t sinnerlugit kattuffiup siulittaasua Jess. G. Berthelsen siulittaasuusimavoq maannalu qinigaaffimmi nutaami ingerlaqqippoq, taannami tamanit taaneqarluni SIK-ip siulittaasuattut qinigaaqqippoq.
Siulersuisuunernik qinersereernerup kingorna qinigaasut sinneri ukuupput:
- Benjamin Kielsen (Narsaq)
- Qulutannguaq Berthelsen (Nuuk)
- Jens Nuka Poulsen (Tasiilaq)
- Nuunu Jerimiassen (Aasiaat)
- Pualuna Kivioq (Qaanaaq),
- Else Jonna Lange (Ilulissat)
- Ane-Marie Havmøller-Jørgensen (Upernavik)
SIK-p Inuusuttai atorunnaarput
- inuusuttut allatigut soqutiginnilersinniarneqassapput
Kattuffiup malittarisassaani allannguutit aaqqissuussaanermut tunngasut arlallit akuersissutigineqarput. Malunnaateqarnerpaaq tassaavoq SIK-p Inuusuttaasa malittarisassani allassimajunnaarnerat. Tassa imaappoq taakku kattuffimmi immikkoortortatut atorunnaarput.
SIK-p Inuusuttai 2017-imi pilersinneqarput inuusuttunik ilaasortaqarnerulernissaq taakkualu
sulisartut peqatigiiffeqarneranni akuunerulernissaat siunertaralugit. Tamannali siunertaasutut sunniuteqarsimanngilaq. Taamaattumik peqatigiiffeqarneq nalinginnaasoq atornagu allatut inuusuttunut suliniuteqarnissaq siunniunneqarpoq – tassa qarasaasiatigut attaveqatigiinnissamut periarfissat nutaat atorlugit aammalu socialmediatigut suliniuteqarnikkut, SIK nalunaarpoq.
Inuiaqatigiinni ataatsimoornissamut kaammattuuteqarput
Ataatsimeersuarneq qaammammik ataatsimik sioqqullugu nassiunneqarpoq SIK-p siulersuisuunerisa nalunaarutaat sukumiisorujussuaq, tassani kattuffeqarnermut tunngasut
inuiaqatigiinnilu pissutsit allaaserineqarlutik, SIK-mit erseqqissaatigineqarpoq.
Siulersuisuunerit nalunaarutaanni ilaatigut makku sammineqarput: Siulersuisuunitoqqat kattuffeqarnikkut suliniutaat, kattuffinnik allanik suleqateqarneq, kattuffiup aningaasaateqarfiini
(Socialfondini Feriefondimilu) iliuutsit, suliffeqarniarnermi pissutsit, akit qaffakkiartornerat,
inuiaqatigiinni atugarissaarnerunissamik kissaateqarneq, aalisakkanik nalittorsaanissaq kiisalu nuna tamakkerlugu pilersaarusiornermi siunissamut ungasinnerusumut isiginissaq ataqatigiissaarinerunissarlu.
Naggataatigut inuiaqatigiinni ataatsimoornerunissaq kajumissaarutigineqarpoq – ataatsimoornissaq aatsaat taama pisariaqartigilermat. Tamatumani pineqarpoq Kalaallit Nunaata
nunat tamalaat akornanni toqqissisimananngitsumik inissisimalersoorsimanera, Amerikarmiut præsidentiata Trumpip nunatsinnik pileritsaassinerata kingunerisaanik, SIK-mit oqaatigineqarpoq.
