SIK-mi
siulittaasutut sassassagaanni siusinaangaatsiarluni aalajangersimariaqarpoq.
Qineqqusaarniaraannimi ataatsimeersuarnissamut qaammatit pingasut sioqqullugit
nalunaareersimasariaqarmat piffissaq killissarititaasoq qaangiutikatareerpoq.
SIK-mi
siulittaasutut sassassagaanni siusinaangaatsiarluni aalajangersimariaqarpoq.
Qineqqusaarniaraannimi ataatsimeersuarnissamut qaammatit pingasut sioqqullugit
nalunaareersimasariaqarmat piffissaq killissarititaasoq qaangiutikatareerpoq.
Kattuffiup
malittarisassaani taama allassimasoqarpoq. Oktobarillu naanerani
ataatsimeersuartoqassammat siulittaasussatut sassarnissamut nalunaarfissaq
qaangiutereerpoq.
- Allanik
sassartoqarnikuunngilaq, Jess G. Berthelsen uppernarsaalluni oqarpoq.
SIK
eqqartorneqartillugu Jess G. Berthelsenip atia avaqqukkuminaatsorujussuuvoq,
taannami ukiuni 35-ni kingullerni kattuffimmi siulittaasuuvoq. Ukiunilu
sisamani tullerni siulittaasooqqinnissaminut piareersimavoq.
- Suli
nukissaqarlunga misigisimagama, sulilu suliassaqarlunga misigisimagama
siulittaasunngoqqinnissannut piareersimavunga, siulittaasoq oqarpoq.
Unammillerneqaratarsinnaavoq
Siulittaasumut
qineqqusaarusukkaanni qaammatit pingasut sioqqullugit nalunaartussaatitaaneq
Danmarkimi kattuffiit isumassarsiorfigalugit SIK-mi atuutsinneqalernikuuvoq.
Malittarisassarli taanna allanngortinniarlugu immikkoortortaqarfiit ilaat
siunnersuuteqarpoq.
- Qaammatit
pingasut sioqqullugit sassartarnissaq peerneqassasoq siunnersuutigineqarpoq,
taava apeqqutaavoq ataatsimeersuarnermi taanna akuerineqassanersoq, Jess G.
Berthelsen oqarpoq.
Akuerineqassappat
ataatsimeersuarnermi piffissaq kingulleq atorlugu siulittaasutut
sassartoqarsinnaalissaaq, Jess G. Berthelsenilu siulittaasutut piffissaq
kingulleq unammillerneqaratarsinnaalissalluni. Tamannali pissanngitsoq
inuttaata neriuutigaa.
- Kina
ukiuni tulliuttuni siulittaasuussanersoq pillugu peqatigiiffiit
immikkoortortaqarfiillu isumasiornissaannut periarfissaqartinneqartarmata
siumoortumik nalunaarsinnaaneq illersorusuppara, taanna oqarpoq.
Siunnersuummilli
allamik aamma takkuttoqarpoq, siulittaasumummi sassarusukkaanni nalunaarfissamut
killissarititaasoq qaammatinut marlunnut sivikillineqassasoq siunnersuutinut
ilaavoq. Taanna inooqataaffigisinnaallugu Jess G. Berthelsenip oqaatigaa.
“Aatsaat
67-iliivunga”
Ukiut
qulikkuutaat pingasut sinnerlugit siulittaasuusoq upernaaq inuuissiorami
soraarninngorsinnaaleraluarpoq, periarfissarli atorusunngilaa.
– Aatsaat
67-iliivunga. Sulilu nukissaqartutut misigisimallunga, Jess G. Berthelsen
illarluni oqarpoq.
Suna
tunniussinnaagakku?
- Tunniussinnaasara
tassa sapinngisamik ilaasortatta atugarissaarnissaat.
- Isumaqatigiinniarnerni
angusaqarluarsinnaavugut. Kisianni sumut iluaqutaava aningaasarsiat 10
procentimik qaffappata, aqaguanilu suna tamarmi qaffanneqarluni?
Nunatsinni
aningaasarsiorfissanik nutaanik pilersitsisoqarpat ineqarnerup, innaallagissap
meeqqeriveqarnerullu akii appartinneqarsinnaasorai. Tassaniluuna politikerinut
sunniiniarsinnaalluarluni siulittaasumut sassaqqittoq isumaqartoq.
- Politikerinut
sunniiniartariaqarpugut, taannalu annertuumik atortarpara, kisianni aamma
kattuffiup iluani suliassaqarpugut annertuunik.
Aningaasarsiorfissatullu
tikkuarsinnaasaa siulleq tassaavoq aatsitassarsiorneq.
- Aatsitassarsiorfiit
ammarniartigit, uranimik akoqarpata akoqanngippataluunniit, siulittaasoq naggasiivoq.
