UKIAANERANI ATAATSIMIINNEQ 2025
Sikuki Ports A/S pillugu Naalakkersuisut siunnersuutertik tunuartippaat
Naalakkersuisut pilersaarutigigaluarpaat "Sikuki pillugu inatsisissaq" pilersissallugu, tassungalu atatillugu Sikuki Nuuk Harbour A/S-ip nunatsinni umiarsualivinnik allanik toqqakkanik tigusisinnaanera qulakkeerneqassasoq, taamaammallu ingerlatseqatigiiffik Sikuki Ports A/S-imik taaguuteqartussanngorlugu siunnersuuteqarlutik. Kisianni naalakkersuisut siunnersuut pingasunngornermi nassuiaatitaqanngitsumik tunuartippaat.
Naalakkersuisut Sikuki pillugu inatsisissatut siunnersuummik saqqummiussipput, kisianni pingasunngornermi aalajangerput siunnersuut tunuartinniarlugu, ullormi tassani Inatsisartuni siullermeerneqarfissaraluani.
Asseq toqqorsivimmit: Leiff Josefsen
Kalaallit Nunaanni imaatigut, nunami aammalu silaannakkut attaveqaatit annertuumik misikkariffiupput. Ukiuni kingullerni timmisartuussinermut attaveqaatinut sammisumik annertuumik allannguisoqarnikuuvoq, tassanilu ilaasunik assartukkanillu silaannakkut timmisartuutileqatigiillu angallassinerat allannguuteqartarsimalluni.
Timmisartuussinermut attaveqaatit nutaat naammassititernermata, Naalakkersuisut aalajangerput Inatsisartunit akuersissummik qinnuteqarniarlutik umiarsualivinnut tunngatillugu allannguinissaminnut.
Tassunga atatillugu Naalakkersuisut siunnersuutigaat Sikuki Nuuk Harbour nunatsinni umiarsualivinnik allanik piginnittunngorlunilu iluarsartuussinermik nutarterinernillu ingerlatsisinnaalissasoq.
Taamaattorli suli ilisimalinngisatsinnik pissutilimmik Naalakkersuisut aalajangerput ineriartortitsinissaq taanna unikaallatsinneqassasoq, tassa Naalakkersuisut namminneq "Sikuki pillugu inatsisissatut" taasartik Inatsisartuni pingasunngornermi oqaluuserisassatut siunnersuut tunuartimmassuk.
Biilmann Egede pilersaarut pillugu qularuteqanngikkaluarpoq
Allaaserisap matuma allanneqarnerani Sermitsiamit suli akissutissarsinngilarput siunnersuut ullormi oqaluuseriffissami tunuartinniarlugu aalajangerneqarsimasoq, tassami ineqarnermut attaveqaasersuutinut, isorliunerusunullu Naalakkersuisoq, Aqqaluaq Biilmann Egede (IA), saqqummiussissutissaagaluamini qularuteqarani pilersaarummik saqqummiussisussaagaluarmat:
- Sikuki Ports A/S-ip Nuup avataani umiarsualivinnik pisinissamut ingerlatsinissamullu inatsisitigut tunngavissinneqarnerani, Sikuki Ports A/S-ip umiarsualivinnik ingerlatsinermik misilittagaasa immikkullu ilisimasaasa tamanit iluaqutigineqarsinnaalernissaat iluaqutaassaaq.
- Iluaqutissaq taanna innuttaasunut tamanut iluaqutaasussaavoq.
Umiarsualiviit Namminersorlutik Oqartussanit pigineqartut toqqakkat Sikuki Ports A/S-imut tunniunneqarnerisigut aserfallatsaaliuinissamut kinguaattoorutit angummaffiusinnaapput, Sikuki-p umiarsualiviit toqqarneqartut niuernermik tunngaveqarluni ingerlassinnaammagit.
- Taamaattumik Sikuki pillugu inatsimmut allannguutissaq akuerineqassasoq qularinngilluinnarpara, taamaalilluni Sikuki-mi piginnaasat kinguaattoorutit, ullumikkut Nunap Karsianut artukkiingaatsiartut peerneqarnissaannut atorluarneqarsinnaassammata.
Ineqarnermut attaveqaasersuutinut, isorliunerusunullu Naalakkersuisoq oqaaseqartinniarlugu Sermitsiamit sulissutigaarput .
