Inatsisissatut siunnersuut: Ingerlatseqatigiiffik nutaamik taaguuteqalerlunilu nunami tamarmi umiarsualivinnik ingerlatsisinnaalissaaq
Sikuki Nuuk Harbour inatsisissatut siunnersuut nutaaq naapertorlugu nutaamik taaguuteqalerlunilu nunami tamarmi umiarsualivinnik ingerlatsisinnaatitaalissaaq.
Sikuki Nuuk Harbour Nuummi umiarsualivinnik piginnittuullunilu ingerlatsisuuvoq.
Assiliisoq: Leiff Josefsen
Umiarsualivinnik aningaasarsiutigalugu ingerlatsineq ukiuni aggersuni Nunatsinni sumiiffinni amerlanerusuni atulersinnaavoq.
Namminersorlutik Oqartussat suliffeqarfiutaat Nuuk Sikuki Harbour maannamut Nuummiinnaq umiarsualivimmik ingerlatsivoq, inatsisissatulli siunnersuummi nutaami ingerlatseqatigiiffik nuna tamakkerlugu umiarsualivimmik ingerlatsisinnaalissaaq.
Inatsisissatut siunnersuut tusarniaassutigineqaqqammerpoq, tassanilu ingerlatseqatigiiffiup aqqa Sikuki Ports-imik allanngortinneqassasoq, ingerlatseqatigiiffiullu suliaanut inatsisitigut tunngavissaq annertusineqassasoq allassimavoq:
- Inatsisissamut siunnersuummi matumani Sikuki Nuuk Harbour A/S nunarput tamakkerlugu umiarsualivinnik piginnittuunissamut ingerlatsinissamullu periarfissinneqassaaq. Tamanna Sikuki Ports A/S-ip Nuup avataani umiarsualivinnik pisinissaminut, attartuinissaminut, sanaartornissaminut ingerlatsinissaminullu aporfigaa, Naalakkersuisut tusarniaanermut allakkaminni allapput.
Nunap karsiata tatineqarnera annikillisinneqassasoq
Sikuki Nuuk Harbour A/S-ip nuna tamakkerlugu umiarsualiviliortitsisinnaanissaata, umiarsualivimmik pisisinnaanissaata, umiarsualivimmik piginnittuusinnaanissaata umiarsualivimillu ingerlatsisinnaanissaata qulakkeerneqarnissaa inatsimmik allannguuteqarnermi siunertarineqarpoq, taamaalillunilu attaveqaasersuutit nukittorsarneqassapput.
Sikuki umiarsualivinni aningaasarsiutigalugu ingerlatsileruni ingerlatsineq aserfallatsaaliinerlu aningaasalersorniarlugit umiarsualivinni atuisunut akiliisitsisisalissaaq, taamaalillunilu nunatta karsianut aningaasartuutaassanani:
- Maanna umiarsualivinni najukkami oqartussat sullissinerminni Nunatta karsianit akilerneqartarput, umiarsualivinnik atuinermut akiliuteqartitsisarneq Kalaallit Nunaanni taamaallaat Nuummi atorneqarpoq. Umiarsualiviit niuernerpalaartumik ingerlanneqartussat, namminneq aningaasartuutitik aallaaviatigut matussusertassavaat, tusarniaanermi allassimavoq.
Umiarsualivinni akitsuusiisoqassappat tamanna Naalakkersuisunit akuerineqartariaqarpoq.
Aammali Sikuki Portsip umiarsualiviit tamaasa, amerlanersaalluunniit, umiarsualivinnik aserfallatsaaliinissamut nutarsaanissamullu aningaasaliissutissanik qulakkeerinninniarluni sullissinissamut isumaqatigiissusiortoqarnissaa pisariaqarsinnaasoq allassimavoq.
