Sisimiuni eqqartuussineq naammassivoq
Sisimiut eqqartuussiviani angutit inuusuttut pingasut eqqartuunneqarneranni eqqartuussut ullumikkut tallimanngornermi saqqummiunneqarpoq. Ulluni arlalinni eqqartuussisoqareersoq angutit inuusuttut pingasut pisuni arlalinni ilungersunartunik pisuusutut eqqartuunneqarput, aammali unnerluussutit ilaanni pinngitsuutinneqarlutik.
Foto: Dorthea Reimer-Johansen
Unnerluutigineqartoq siulleq ukiumi ataatsimi qaammatinilu arfinilinni pinerluuteqarsimasunut inissiisarfimmiittussanngorlugu pineqaatissinneqarpoq. Nakuusersimanerminilu innarlikkaminut, tassa angutip inuusuttup tallumigut napineqartoq pillugu aningaasanik 7.025 koruuninik taarsiiffigisussanngorlugu.
Taassuma saniatigut iisartakkanik arsaarinnissutigineqarpoq. Pisunut arfinilinnut pisuutinneqarpoq, pisumullu ataatsimut ilaannakortumik pisuutinneqarluni.
Eqqartuussiviup aalajangernerminut tunngavigaa unnerluutigineqartoq siulleq misileraaffittut iperagaanermi kingorna ullut sisamat qaangiutiinnartut inatsimmik unioqqutsitsimmat.
Pinngitsaaliilluni atoqateqarsimasutut pinngitsuutinneqartoq
Angutip inuusuttup aappaa qaammatini sisamani pinerluuteqarsimasunut inissisarfimmiittussanngorlugu pineqaatissinneqarpoq, kisiannili taanna januaarimili tigummigallarneqarsimammat maanna iperagaavoq.
Taanna pisimasunut arfinilinnut pisuutinneqarpoq, pisimasunulli marlunnut pinngitsuutinneqarluni. Tassani pinngitsaaliilluni atoqateqarsimasutut pinngitsuutinneqarpoq. Eqqartuussisut uppernarsisorinngilaat pinngitsaaliilluni atoqateqarsimasutut unnerluutigineqarnera. Tamanna tunngaviginerullugu iperagaavoq.
Maanna iperagaasumut ilaqutaasut eqqartuussiviup iluani eqqissiallannerat takuneqarsinnaavoq.
Unnerluutigineqartut pingajuat nukarlersaasoq pineqaatissinneqarsimasunut iniissisarfimmiittussanngortinneqanngilaq, taamaattorlu isumaginnittoqarfimmiit nakkutigisassanngortinneqarpoq.
Eqqartuussutip inernera saqqummiunneqalermat ini eqqartuussiviusoq inunnik ulikkaarpoq, issiaviit tamarmik atorneqarmata isersimasut ilaat nikorsapput.
Eqqartuunneqartut tamarmik eqqartuussinerup inernera akueraat. Unnerluussisussaatitaasut ulluni 14-ini eqqarsarfeqassapput.
