Sisimiuni Sarfalerisut ApS-imi sulisut sapaatip-akunneranut nalunaaquttap akunnerini 37-ni sulisarput: Uippakajaarnerit napparsimanerillu annikinnerupput
Sisimiuni innaallagisserinermik suliaqartut Sarfalerisut ApS sapaatip-akunneranut akunnerit 37-t misiliutigalugu sulisareerlutik aalajangersimasumik atuuttussanngorlugu aalajangerput. Suliffiup sunngiffiullu sulisunut oqimaaqatigiissarnissaat anguniarlugu akunnerit suliffiusut ikilisinneqartut suliffeqarfiup pisortaa piginnittoq Maannguaq Philip Lauritzen Sermitsiamut oqarpoq. Misiliinermi angusat ajunngigaarmata sapaatip-akunneranut akunnerit suliffiusut ikilisinneqarnerat aalajangersimasumik atuutsitsisoqalerpoq.
Sarfalerisut ApS-imi sapaatip-akunneranut nalunaaquttap akunneri 37-t suliffiupput.
Privat
Sarfalerisut ApS-imi tallimanngornerup ullaava eqqissiivilluni aallartippoq.
Sulisut ataatsimoorlutik ullaakkorsioreerput ullormullu suliassatik suliarileruttorlugit.
Nalunaaquttap-akunneri arlaqanngitsut qaangiuppata nalunaaqutaq ataatsimut angerlarnissartik qilanaarilereersinnaavaat, tassa sapaatip-akunneranut nalunaaquttap akunnerini 37-ni sulisarnerminni soraajaarsinnaatitaagamik.
Suliffeqarfik Sarfalerisut ApS innaallagisserisunik ilinniartunillu katillugit 17-inik sulisoqarpoq.
2023-mi marsip 27-aniit qaammatini marlunni misiliilluni sapaatip-akunneranut sulisarnerup sivikillinissaanik suliffeqarfiup piginnittua Maannguaq Philip Lauritzen aalajangerpoq. Misiliinerlu iluatsilluarmat aaqqissuussaq maanna aalajangersimasumik atuutsinneqalersimavoq.
- Suliffiup sunngiffiullu oqimaaqatigiinnissaat sulisutsinnut pingaaruteqarpoq, Maannguaq Philip Lauritzen allaffimmi issiavimmini issialluni oqaluttuarpoq.
Sulisut sapaatip-akunneranut ataasinngornermiit sisamanngornermut nalunaaqutaq arfineq-pingasuniit tallimat tungaanut sulisartut, nalunaaquttap akunnerani ataatsimi ulloqeqqasiortarlutik, nassuiaatigaa. Tallimanngornermi allatut periuseqarput. Tassani arfineq-pingasuneertoqartarpoq, ullaakkorsioqatigiittoqartarluni ulloqeqqasiortoqaranilu nalunaaqutaq ataatsimut soraartoqartarluni.
Isertitakinnerusut - iluaqutitaqarlunili
Suliffeqarfik sapaatip-akunneranut akunnerni 37-ni sulisarnerup kingunerisaanik ukiumut 1,5 millionit koruunit missaannik iluanaarutikinnerugaluarluni, Maannguaq Philip Lauritzenip siunissaq ungasinnerusoq eqqarsaatigalugu iluaqutaasumik kinguneqarumaartoq takusinnaavaa. Sulisut aningaasarsiaat ikinnerulinngillat, tassa imatut paasillugu naak sapaatip-akunneranut akunnerni 37-ni sulisaleraluarlutik ikinnerusunik aningaasarsiaqalinngillat.
Sapaatip-akunneranut akunnerit suliffiusut ikinnerulernerat iluaqutaalluartoq Maannguaq Philip Lauritzen oqarpoq.
- Napparsimasarnerit napparsimasoornerillu ikilisut maluginiarparput, sulisullu akornanni uippakajaarneq annikinnerujussuanngorluni. Ingammik sulisunut meerartalinnut sapaatip-akunneranut akunnerit suliffiusut ikinnerulernerat ilaqutaariittut ataatsimoorsinnaanerulernermik kinguneqarpoq, oqarpoq.
- Sulisut qasuersaarnerullutik suliartortaramik aalaakkaannerulerput angusaqarluarnerusalerlutillu, oqarpoq.
Sapaatip-akunneranut akunnerni 35-ni sulisarneq mianersuunneqarli
Maannguaq Philip Lauritzenip Demokraatit siunnersuutaat nutaaq, tassa sapaatip-akunneranut akunnerit suliffiusut 40-niit 35-nut ikilisinnissaat pillugu misissuinissaq, qularaa.
Siunnersuummi, Inatsisartunut ilaasortap Anna Wangenheimip saqqummiussaani, kingunerisinnaasaanik sukumiisumik misissuisoqaqqullugu Naalakkersuisut piumaffigineqarput.
Taama annertutigisumik alloriaateqarnissaq aarlerinaateqartoq Maannguaq Philip Lauritzen isumaqarpoq.
- Akunnerit ikilisikkiartuaarlugit aallartinnissaq pitsaanerusoq isumaqarpunga. Akunnermik ataatsimik ikiliartuaartillugit. Ingammik Namminersorlutik Oqartussat kommunillu pineqartillugit, siunnersuivoq.
