Sisimiut: Nakuusertoqarneranik takunnissimasinnaasunik ujartuisoqarpoq
Nukappiaqqap 16-inik ukiullip sakkortuumik nakuuserfigineqarneranut takunnissimasinnaasunik politiit ujaasipput. Maannamut politiit pasisaqanngillat.
Assi: Leiff Josefsen
Sisimiuni nukappiaqqap 16-iinnarnik ukiullip arfininngorneq novembarip aappaata unnuaani saassunneqarnera pillugu suliaq annertuumik nakuusernerusoq Kalaallit Nunaanni Politiit misissorpaat.
- Pisimasoq pivoq arfininngormat unnuakkut nalunaaqutaq 02.00-ip aamma 03.00-ip akornanni, politiillu takunnissimasinnaasunik ujartuipput. Takusaqarsimaguit pisumulluunniit atatillugu ilisimasaqaruit Sisimiuni politiinut sianersinnaavutit normumut 70 13 22-mut, politiit Facebookiminni allapput.
Nakuuserfigineqartoq nukappiaraq 16-inik ukiulik Sisimiuni GUX-imi atuartoq aqqunartitersimavoq Rigshospitalimullu qimagussortinneqarsimallu. Tamanna 16-inik ukiullip ilaqutaanit Sermitsiamut ilisimatitsissutaavoq.
Sumiiffik suli ilisimaneqanngitsoq
Nakuuserneq sumiiffimmi sumi pinersoq pillugu tusatsiakkat siulliit naapertorlugit Sisimiuni katersortarfiup eqqaani pisimavoq.
Sisimiunili politikommissærip Karl Jørgen Lennertip tamanna uppernarsarnaguluunniit ilumuunnginnerarsinnaanngilaa.
- Suliaq misissorneqarpoq, periarfissallu tamaasa maannamut ammatippavut. Sumi pisoqarsimanera ilisimanngilarput, Karl Jørgen Lennert Sermitsiamut oqarpoq.
Politiit pisortaat oqarpoq suliamut atatillugu politiit maannakkut pasisaqanngitsut.
