16-inik ukiulik Sisimiuni sakkortuumik persuttarneqartoq
GUX-ertunut nutaanut ilassinninnissamut nuannersumik aaqqissuussaq, 16-inik ukiulimmut sakkortuumik persuttarneqarnermik kinguneqarpoq. Angut inuusuttoq taanna angerlariartornermini tassanngaannaq saassunneqarsimavoq. Maanna Rigshospitalemut Danmarkimiittumut aallarunneqarpoq, tassani ajoquserneri annertuut suliarineqassammata.
Angut inuusuttoq ukiunik 16-inik ukioqartoq Sisimiut napparsimavianut arfininngornerup sapaatillu akornanni unitsinneqarpoq, kingornalu Dronning Ingridip napparsimavissualiaanneqarpoq. Tassanngaanniit ullumi ataasinngornermi aalajangerneqarpoq angut inuusuttoq Danmarkimi Rigshospitalimut suliaritikkiartortariaqartoq.
Assiliisoq (toqqorsivik): Leiff Josefsen
Angutip inuusuttup ataataa, ilaquttani pillugit kinaassutsiminik isertuussisoq, tuparujussuaqqavoq. Ataataasup ernini takugamiuk, ilisarisinnaanngilaa, taamaallaat ernerata "ataata" oqarneratigut ilisarisinnaavaa:
- Nakuuserfiginnissimasup imaluunniit nakuuserfiginnissimasut ernera niaquatigut annertuumik isimmittarlugulu tukkarsimavaat, allaat pisup kingorna takoqqaarakku ilisarinngisinnaanngilara.
- Ernerma allerui uluaatalu saarngi niaqualu tamarmi annertuumik ajoquserneqarsimapput, niaqunngualu pullangaarmat pisimasup kingorna takoqqaarakku ilisarisinnaanngilaraluunniit, taamaallaat isussuffigimmanga "ataata", nipinnguatigut ilisarivara.
Tikilluaqqusilluni introfestimiit inuunermik ulorianartorsiornermut
Angutip inuusuttup ataataa suli akissutissaqanngitsunik apeqqutissarpassuaqarpoq. Taassuma ernera ukiunik 16-inik ukioqarpoq siullerpaamillu angerlarsimaffimminit aallarsimavoq, Danmarkimi efterskolimiissimanera eqqaassanngikkaanni.
Taannami angut inuusuttoq GUX-imi Sisimiuni aallarteqqammerpoq, arfininngornermilu atuarfiup ilinniartui ilinniartunut nutaanut tikilluaqqusillutik aaqqissuussipput Sisimiuni katersortarfimmi. Katersortarfimmiit angerlarsimaffimminut ingerlaarnermini saassunneqariasaarpoq annertuumillu persuttaasoqarluni.
Angutip inuusuttup taassuma ataataa Sermtisiamit ataasinngornermi oqaloqatigigatsigu, suli sukumiinerusumik paasisaqarsimanngilaq. Angajoqqaatut ernertik qanoq pineqarsimanersoq GUX-imit imaluunniit politiinit suli attavigineqarsimannginnamik susoqarsimanersorlu nassuiaanneqarlutik. Taamaattorli pisoq peqqammertoq Sisimiuni napparsimmavimmit telefonikkut ataataasoq sianerfigineqarpoq, sapaammi ullaassakkut pingasut missaanni oqaluttuunneqarporlu ernertik morfinitortinneqarsimasoq.
- Morfiinermik ernersi tunivarput, sinippoq. Arlaliutsilluni saassunneqarsimavoq, nunami innangasoq tukkarneqarsimavoq. Nuummut timmisartumik ikiuuttagaq atorlugu nal. 11:00 aallartinneqarpoq, Sisimiut napparsimavianiit ilanngullugu kingusinnerusukkut nalunaarutigineqarpoq.
Sermitsiaq GUX-Sisimiut-ip rektorianut, Poul V. Jensenimut attaveqarpoq. Taassuma erseqqissaatigaa tikilluaqqusilluni aaqqissuussinermut, tassa introfestimik aaqqissuussinermut ilinniarfik attuumassuteqanngitsoq, aamma ilinniartut namminneerlutik tikilluaqqusilluni fiisterfissaq attartorsimagaat, tassanilu introfesti aaqqissuunneqarsimavoq.
Kalaallit Nunaanni Politiit uppernarsarpaat Sisimiuni nakuusertoqarsimaneranik suliaqartoqartoq, GUX-imilu ilinniartoq pinerluffigitissimasoq, kisianni suliaq suli misissuiffigineqarmat itinerusumik oqaaseqarfigisinnaanngikkallaritsik.
