Piffissami kingullermi Kommune Qeqertalimmi Siumup qinersisartuniit tapersersorneqarnera killeqarsimasoq, taamaattumillu unammilligassaqartoq - taamaakkaluartorli kommunalbestyrelsimut qinersisoqarnissaanut borgmesterip issiaviata kissalaartup tigoriarnissaanut piareersaatit piffissami tullermi aallartinneqasssasut, Kommune Qeqertalimmi kommunabestyrelsimut ilaasortaq aamma kommunalbestyrelsemi Siumut gruppiani siulittaasoq, Aqqa Samuelsen oqarpoq.
Siumulli makeqqeriassaguni annertoorujussuarmik suliassaqartoq, Siumut tunuliaqutigalugu kommunalbestyrelsimut ilaasortaasimasoq, Siumullu pillugu ilisimasaqarluartoq, 82-inik ukiulik oqarpoq.
Piffissami kingullermi Kommune Qeqertalimmi Siumup qinersisartuniit tapersersorneqarnera killeqarsimasoq, taamaattumillu unammilligassaqartoq - taamaakkaluartorli kommunalbestyrelsimut qinersisoqarnissaanut borgmesterip issiaviata kissalaartup tigoriarnissaanut piareersaatit piffissami tullermi aallartinneqasssasut, Kommune Qeqertalimmi kommunabestyrelsimut ilaasortaq aamma kommunalbestyrelsemi Siumut gruppiani siulittaasoq, Aqqa Samuelsen oqarpoq.
Siumulli makeqqeriassaguni annertoorujussuarmik suliassaqartoq, Siumut tunuliaqutigalugu kommunalbestyrelsimut ilaasortaasimasoq, Siumullu pillugu ilisimasaqarluartoq, 82-inik ukiulik oqarpoq.
Sunniuteqarsinnaaneq mikinerulertoq
Kommune Qeqertalik 2018-imi pilersinneqarmalli kommunalbestyrelsimi Siumut amerlanerussuteqarnikuunngilaq, partiillu sunniuteqarsinnaanerata annikipallaarnera pissutaalluni anguniakkat piviusunngortikkuminaassimasut, Siumut tunuliaqutigalugu kommunalbestyrelsimut ilaasortat arlaleriarlutik oqariartuutigisarpaat.
Siumulli politikkikkut inissisimanera piffissami kingullermi suli ajornerulerpoq, Kommune Qeqertalimmi Siumut tunuliaqutaralugu kommunalbestyrelsimut ilaasortat marluk, Enok Sandgreen, Aasiaat, aamma Otto Jeremiassen, Kangatsiaq, maaji aallartilaartoq Siumuniit ilaasortaajunnaarniarlutik aalajangermata.
- Kommunitsinni innuttaasunut atorfilittanullu atugassarititaasut pitsaasuunnginneri arlaleriarluta uparuartarsimavarput, tamannalu Siumumut ilaasortaajunnaartut isumaqatigisimanngilaat. Taakkuli aninissaat pinngitsoortinniarlugu oqaloqatigiinnikkut aaqqiisoqarsimasinnaagaluarpoq, matuli matorlullugu aninerat uggornartorujussuuvoq, Aqqa Samuelsen oqarpoq.
Siumumut ilaasortat partiimiit aninerisigut Siumut tunuliaqutaralugu kommunalbestyrelsimut ilaasortat arfinilinniik sisamaanut ikileriarput.
Tapersersorneqarneq milliartortoq
Kommune Qeqertalimmi Siumup immikkoortortaqarfiisa ilaasa ileqquusumik ataatsimeersuartitsiniartarnerigalui takkuttut ikippallaarnerat pissutaalluni iluatsinneq ajorput taamaattumillu siulersuisunik nutaanik qinersisoqarsinnaasarsimanngilaq.
- Immikkoortortaqarfiit, soorlu Qasigiannguani Qeqertarsuarmilu, siulersuisoqarnikkut ilaasortaqarnikkullu unammillernartumi inissisimapput, tamannalu ilungersunartutut nalilerneqartariaqarpoq, Aqqa Samuelsen oqarpoq.
Ukioq upernaarlu Qeqertarsuarmi Siumup immikkoortortaqarfia marloriarluni ataatsimeersuartitseriaraluarmat ilaasortat, allaallumi siulersuisut ilaat takkutinngillat, tamaattumillu siulersuisunik nutaanik qinersisoqarsinnaasimanngilaq.
Borgmesterip issiavia tiguneqassasoq
Inatsisartunut kommunalbestyrelsinullu kingusinnerpaamik aappaagu upernaakkut qinersisoqarnissaanut piareersaatit piffissami aggersumi aallartinneqassapput.
- Qinersinissap tungaanut piareersarnissaq aallartissavarput aammali Kommune Qeqertalimmi Siumup iluani kinguaariit nikinnissaannut piffissanngormat, qinersinissap tungaanut inuusuttunik suleqatissarsiussaagut, taanna oqarpoq.
Aappaagu kommunalbestyrelsinut qinersinermi Kommune Qeqertalimmi borgmesterinngortitsinissaq pimoorullugu anguniarneqassasoq, Aqqa Samuelsenip ilanngullugu oqaatigaa.
Siumut kinguariartoq
2018-mi Kommune Qeqertaliup pilersinneqarnerata kingorna Siumut kinguariartulersimasoq sulilu kinguariartortoq, partiilu siuariartoqqilissaguni annertuumik suliassaqartoq, 82-inik ukiulik Maaliannguaq Svendsen oqarpoq. Taanna Qeqertarsuup kommunerisimasaani qinigaaffinni marlunni kommunalbestyrelsimut ilaasortaasimavoq, Siumullu politikkikkut inissisimanera pillugu malinnaalluni.
- Siumut partiitut makeqqissappat, partiinit allanit sunnersimaneqarnini naalagarsiorpalaartumillu inissisimanini qimallugu, ersarissumik siunnerfeqarnini takutittariaqarpaa, 82-inik ukiulik Maaliannguaq Svendsen, Qeqertarsuup kommunerisimasaani qinigaaffinni marlunni kommunalbestyrelsimut ilaasortaasimasoq, Siumullu inissisimaffia pillugu malinnaasoq, oqarpoq.
Assiliisoq: Heidi Cortzen
- Ukiut kingulliit ingerlaneranni Kommune Qeqertalimmi Siumup qinersisartunit tapersersorneqarnera appariarsimavoq, taamaattumillu partiip kommunalbestyrelsi aqqutigalugu anguniakkaminik piviusunngortitsiniarnera ajornarnerulersimavoq.
- Taamaattumik Siumut makeqqissappat, partiinit allanit sunnersimaneqarnini naalagarsiorpalaartumillu inissisimanini qimallugu, ersarissumik siunnerfeqarnini takutittariaqarpaa.
- Tamannalu anguniagassatut siunniunneqanngippat, qinersinissami tullermi Siumup inissisimanera maannakkorniit suli sanngiinneruleratarsinnaavoq, Maaliannguaq Svendsen, naliliivoq.
Siumumi kinguariit nikinnissaat iluatsinngitsoorneqarsimasoq, taanna isumaqarpoq.
- Siumup immikkoortortaqarfiini inuusuttunik Siumumut ilaasortassarsiortarneq iluatsissimanngilaq. Aammali piffissami kingullermi Kujataata Kommuniani Kommune Qeqertalimmilu Siumut sinnerlugu kommunalbestyrelsimut ilaasortat partiimiit aninerat, partiip inuusuttuniit ornigineerukkiartorneranik kinguneqarsimasinnaavoq.
- Tamannallu kommunalbestyrelsinut qinersinissamut tullermi Siumumut akisoratarsinnaavoq, Maaliannguaq Svendsen oqarpoq.
Kommune Qeqertalimmi Siumup maannakkut inissisimera immikkoortaqarfiini ataasiakkaani siulersuisut sanngippallaarnerannut ersiutaasoq, taanna isumaqarpoq.
