Siunnersuut: Borgmesteri kommunalbestyrelsesimilu ilaasortat ima akissarsiaqassapput

Kommunip akissutaa ilanngunneqarpoq.

Kommuneqarfik Sermersuumi ingerlatsiviit ammanerusumik sulinissaanut atatillugu ingerlatsiviup borgmesterip kommunalbestyrelsillu ilaasortaasa akissarsiassaannik siunnersuummik tamanit atuarneqarsinnaasumik saqqummiussisimavoq.

Siunnersuut kommunimi aningaasaqarnermut ataatsimiititaliap ataatsimiinnerani oqaluuserisassanut ilanngunneqarsimavoq, siunnersuulli oqaluuserisassanit kingusinnerusukkut peerneqarsimalluni.

Aqutsisoqarfik siunnersuuteqartuuvoq, kommunalbestyrelsili nammineq akissarsiaminik akuersisussaalluni.

Siunnersuutit uani takuneqarsinnaapput:

Takussutissaq naapertorlugu borgmester Avaaraq S. Olsen (IA) qaammammut 81.000 koruuningajannik akissarsisassaaq.

Siunnersuut aningaasaqarnermut ataatsimiititaliap 3. juni ataatsimiinnissaanut oqaluuserisassani saqqumisooriarluni sooq peerneqarsimanersoq paasiniarlugu Sermitsiamit kommuni saaffigineqarsimavoq.

Kommune allappoq allattoqarfiup suliami misissueqqinnissani pisariaqartimmagu siunnersuut oqaluuserisassanit peerneqarallarsimasoq.

- Naatsorsuutigaarput Aningaasaqarnermut Inuussutissarsiornermullu Ataatsimiititaliap augustimi ataatsimiinnissaanut siunnersuut oqaluuserisassanut ilanngunneqassasoq, kommuni ilisimatitsivoq.