Spiralilerneqarsimasunut utoqqatserneq Danmarkimi aamma malunnartinneqassasoq
Arnanut spiralilerneqarsimasunut utoqqatsernerup malunnartinnissaanut Folketingimi Kalaallit Nunaannut tunngasunut ataatsimiititaliaq qaaqqusivoq.
Kalaallit Nunaannut tunngasunut ataatsimiititaliap spiralilersorneqarnikunut utoqqatserneq Christiansborgimi oktobarip arfineq-pingajuanni malunnartissavaa.
Assi: Leiff Josefsen
Spiralilerneqarsimasunut pisortatigoortumik utoqqatserneq Nuummi sapaatip-akunnerata siuliani malunnartinneqarmat qullilisoqarpoq, eqitaarisoqarpoq erinarsoqatigiittoqarlunilu. Tassani arnat ministeriunermit Mette Frederiksenimit (Socialdemokraterne) Naalakkersuisullu siulittaasuannit Jens-Frederik Nielsenimit (D) assamminneqarnissaminnut sanileriiaallutik piareersimapput.
Taamaakkaluartoq pineqartut ilaannaat najuussinnaapput. Taamaattumik Folketingimi Kalaallit Nunaannut tunngasunut ataatsimiititaliaq utoqqatserneq malunnartinnissaanut qaaqqusivoq. Aaqqissuussaq Christiansborgimi Landstingip ataatsimiittarfiani oktobarip arfineq-pingajuanni nalunaaqutaq 18.00 aallartissaaq.
Folketingip nittartagaani atuarneqarsinnaavoq.
Nammineq misiginissaa pingaaruteqartoq
Arnat eqqugaasut, qanigisaasut inuillu taakku aqqusaarnikuusaat pillugit iliuuseqartoqarnissaanik suliniuteqarnikut utoqqatsernerup Kalaallit Nunaanni malunnartinneqarnerani peqataasinnaanngitsunut tapersersuineq tusaaneqarnerallu takutinniarlugu aaqqissuussinerup siunertaraa.
- Arnat spiralilerneqarnikut ikinnerpaamik 30-t 40-llu akornanniittut Danmarkimi najugaqarput. Arnat utoqqatserfigineqarneq namminneq misiginiassammassuk Kalaallit Nunaannut tunngasunut ataatsimiititaliap tamanna malunnartikkusuppaa. Qaangiiniassagaanni tamanna pisariaqarpoq, Inuit Ataqatigiit sinnerlugit folketingimut ilaasortaq Aaja Chemnitz Sermitsiamut oqarpoq.
Peqataanissamik nalunaartoqassaaq, pisoq immiunneqassaaq Folketingillu nittartagaani toqqaannartumik aallakaatinneqassalluni.
Mette Frederiksenip Jens-Frederik Nielsenillu kalaallit arnat akuersiteqqaarnagit naartunaveersaaserneqarsimasut pisortatigoortumik augustip 27-ani utoqqatserfigaat.
Sapaatit-akunneri marluk missaat qaangiummata spiralilersuisimaneq pillugu qulaajaanermit arlaannaannulluunniit attuumassuteqanngitsumik nalunaarusiaq saqqummersinneqarpoq, tassanilu 1970-ip naanerani niviarsiaqqat arnallu ikinnerpaamik 4070-it spiralilerneqarsimasut atuarneqarsinnaavoq.
