PEQQINNISSAQARFIK
Spiralilersuisimaneq pillugu isumaqatigiinnginneq: Innuttaasut innarlerneqaqqusaanngillat
Spiralilersuisimaneq pillugu kanngunartuliaq pillugu ilisimatusartoqatigiit sooq paasissutissanik pingaarutilinnik pissarsisinnaannginnerat peqqinnissaqarfiup maanna nassuiarpaa, tamannalu misissuinerup kinguaattoorneranut maannakkullu unitsikkallarneqarneranut pissutaavoq.
Toqqorsivimmit assiliartaq
Kalaallit Nunaanni peqqinnissaqarfik qulaajaalluni sulinermut "tunngaviusumik tapersersuivoq, ilisimatusartoqatigiillu ingerlariaqqinnissaannut akornutaarusunnani".
- Atortunut attuumassuteqartunut isersinnaatitaanerup pingaaruteqarnera peqqinnissaqarfimmit paasineqarpoq. Kisianni aamma peqqissuseq pillugu paasissutissat inummut tunngasut innuttaasut paasissutissaataannik paarsinissaq peqqinnissaqarfimmut suliassatut pingaaruteqarpoq, Namminersorlutik Oqartussat nittartagaat aqqutigalugu aamma Sermitsiaq.AG-mit toqqaannartumik saaffigineqarnerup kingorna, Peqqinnissaqarfik taama ilisimatitsivoq.
Nassuiaat
Ilisimatusartoqatigiit allagaatinik takunnikkumanerannut itigartitsineq pillugu peqqinnissaqarfiup oqaaseqaatai imaapput:
- Misissuinissaq siunertaralugu peqqissuseq pillugu innuttaasut ataasiakkaat paasissutissaataannut inatsisinut naapertuutinngitsumik killeqanngitsumik pissarsisinnaatitaanissap peqqinnissaqarfimmit akuerineqarsinnaannginnera unammillernartuuvoq. Taamaattoqassappammi innuttaasoq akuersiteqqaarnagu 1992 sioqqullugu inunngorsimasunut innuttaasut ataasiakkaat pillugit inummut tunngalluinnartunik paasissutissanik pissarsisinnaatitsisoqassaaq. Taamaattumik paasissutissat suut katersorneqassanersut qanorlu taakku nalunaarsorneqarnissaannik erseqqissumik nassiuaasoqarnissaa pisariaqartinneqarpoq, taamaalilluni spiralilersuisimaneq pillugu suliami pingaaruteqartumi qulaajaanissaq pillugu anguniakkami innuttaasup arlaannaataluunniit nammineq inuunera innarlerneqassanngilaq, Peqqinnissaqarfik nassuiaavoq.
Aaqqiissutissamik nassaarnissamut piareersimasoq
Peqqinnissaqarfik aamma Peqqissutsimut Naalakkersuisoqarfik "soorunami inatsisit iluanni aaqqiissutissamik nassaarnissamut piareersimasoq" naqissuserneqarpoq.
- Ilisimatusartoqatigiit paasissutissanik pisariaqartunik pissarsisinnaanissaat innuttaasullu isertuussisinnaatitaanerisa attatiinnarneqarsinnaanissaa aaqqiissutissap qulakkeertariaqarpaa. Paasissutissanik pissarsisinnaanermut periarfissat pillugit ilisimatusartoqatigiinnik oqaloqatiginninneq kinguneqarluartussamik ingerlavoq, piaartumik paasiniaanissaq pisariaqartinneqartoq tungitsinnit paasineqarluni, tusagassiuutinut nalunaarummi taama naggasiisoqarpoq.
