Peqqinnissaqarfik spiralilersuisimaneq pillugu qulaajaanermik akornusiivoq

Ilisimatusartoqatigiit, kalaallit qallunaallu naalakkersuisuinit pilersinneqartut, "atortussanik takunnissinnaanerinut piumasaqaatit aamma periarfissat pillugit nalornissuteqartoqalernera pissutigalugu" akuersissutit Kalaallit Nunaanni peqqinnissaqarfimmi qullersanit ulloq maajip 20-ani 2024 utertinneqarsimasut, suliap qiterpaarnerani ilisimatusartoqatigiit nalunaarusiaanni ilisimatitsissutigineqarpoq.

Spiralilersuisimaneq pillugu suliamik misissuinermi paasissutissat taakku pingaaruteqarluinnarput.

- Suliap ingerlaavartumik ingerlanneqarsimanerata aamma naleqqussarneqarneqarsimanerata kiisalu oqartussanit, suliffeqarfinnit aamma oqartussani atorfilinnit akuusimasunit eqqarsaatersuutaasimasut, aalajangiunneqarsimasut aamma iliuuserineqarsimasut kiisalu suliap Kalaallit Nunaanni ingerlanneqarsimanerpiaata misissornissaannut pingaarutilinnik atortussanik Kalaallit Nunaanni peqqinnissaqarfimmeersunik  ilisimatusartoqatigiit ilimaginngisamik massakkuugallartoq takunnissinnaannginnerinik tamanna isumaqarpoq, nalunaarusiami allassimavoq, imalu nangippoq:

Qulaajaasoqarsinnaanngitsoq

- Piffissap ingerlanerani Kalaallit Nunaanni Kalaallit Nunaannilu nunap immikkoortuini peqqinnissaqarfinni, ukioqatigiiaallu assigiinngitsut akornanni suliaq qanoq ililluni atuutilersinneqarsimanerpiaa ilisimatusartoqatigiit taamaalillutik qulaajarsinnaanngilaat. Taamaalilluni ajornartorsiummut iluarsiissutissamik nassaartoqartinnagu qulaajaanermi suliassamut nassuiaammi suliakkiutigineqartumik eqqortitsisoqarsinnaanngilaq.

Taama pisoqarnera suliallu ingerlateqqinnissaanut nalorninartoqalersitsinera, ilisimatusartoqatigiit ajuusaarutigisorujussuullugu naqissusiipput.

Ilisimatusartoqatigiit maajimi allagaatinik toqqorsivimmik takunnissinnaannginnertik pissutigalugu peqqinnissaqarfimmut qinnuteqaammik nutaamik nutarterneqartumillu nassiussipput. Tamannali iluaqutaanngilaq. Qinnuteqaammut itigartitsissummik ulloq juunip aqqaneq-aappaani 2024 ilisimatusartoqatigiit tigusaqarput.

Atortussanik takunnissinnaaneq tunniutiinnarfigineqanngitsoq, "qanorlu takuneqarsinnaanissaat pillugit oqaloqatigiinnerit aallartinneqartut" ilisimatitsissutaavoq.

Nalunaarusiaq inaarutaasumik saqqummiunneqartussaq kinguartinneqarpoq

Qulaajaanerup naammassineqarnissaa qaammatit pingasut missaannik kinguaattoornissaa naatsorsuutigineqartariaqartoq, tassa septembarip aallaqqaataani 2025-mi tunniunneqarnissaa naatsorsuutaasoq, suliap qiterpaarnerani nalunaarusiami aamma atuarneqarsinnaavoq. 

Ataatsimut isigalugu unammilligassanik taaneqartunik suliaqarneruneq pissutigalugu kinguaattoortoqarpoq.

- Ilaatigut ilisimannittutut oqaluttuarineqartut, ilisimatusartoqatigiinnit tiguneqartut, amerlassusissaattut naatsorsuutigineqartunit amerlanerusut paasineqarpoq. Ilaatigut naatsorsuutigineqartumit allagaatit amerlanerujussuit misissorneqartariaqarsimapput, oqartussat, suliffeqarfiit il.il. arlallit suleriaaserineqarsimasumut akuusimanerat pissutigalugu, ilisimatitsissutaavoq.

Aningaasaliissuteqaqqinneq

Suleqatigiinni allannguuteqartoqarnera allaffissornikkullu suliassat naatsorsuutiginngisamik annertoorujussuunerat pissutigalugu, suliniummut  aningaasaliissuteqartoqaqqinnissaanik pisariaqartitsisoqarsimavoq.

Aningaasaliissuteqartoqaqqinnissaanik qinnuteqaammik ulloq februaarip 13-iani 2024 ilisimatusartoqatigiit nassiussaqarput. Danskit peqqinnissaqarfimmut ministeriaqarfianit aningaasaliissutigeqqinneqartunik juunip 30-ani 1,7 millionit koruuninik ilisimatusartoqatigiit tigusaqarput, suliap qiterpaarnerani nalunaarusiami ersersinneqarpoq.

Immikkoortortat pingasut

Ilisimatusaatigalugu sulineq pingaarnernik pingasunik immikkoortoqarpoq:

• Katersuineq
• Misissueqqissaarneq
• Ingerlatitseqqinneq

- Ilisimatusartoqatigiit nalunaarusiap uuma saqqummiunneqarnerani suli katersuinermiipput, oqaluttuanik aamma allagaatinik katersuineq suli ingerlanneqarmat. Massakkumut misissueqqissaarneq aallartinneqarpoq, kisiannili naammassineqarnissaa suli ungasilluni, suliap qiterpaarnerani nalunaarusiami, Christiansborgimi Kalaallit Nunaat pillugu ataatsimiititaliamut tunniunneqaqqammersumi, siuleqummi tamanna atuarneqarsinnaavoq.