Sukuutsertarfik torrallataq

Ukiornissaa nalliutilerpoq aputeqarlunilu sikoqartussaq sisorarfiullunilu. Immaqa aamma sukuutserfiusussaq?

Tasiilami tamanna takorloorneqarpoq, innuttaasummi ilaata sukuutsertarfeqalernissaanik siunnersuutaa tapersersorneqarluarmat, Kommuneqarfik Sermersuumi politikikkut suliaq aallartinneqarpoq.

Sulili pineqartoq pillugu aalajangiisoqanngilaq.

Tasiilami suliniummik suliaqartut neriuutigaat, inuit (qassinilluunniit ukiullit) sukuutsertarfik iluaqutigiumaaraat, illoqarfimmimi aamma katersuuffiusinnaassammat.

- Isumaqarpit isumassarsiat illoqarfinni allani aamma misilinneqarsinnaassasoq?

- Tamanna upperilluinnarpara, Rasmus Poulsen Tasiilaq Toursimik pilersitsisoq suliniummullu nassuiaammik allagaqaammik Kommuneqarfik Sermersuumut Aningaasaqarnermut Ataatsimiititaliami qanittukkut oqaluuserineqartumik suliaqartoq oqarpoq.

Sukuutsertarfik peertagaq

Aallussilluartut oqaluttuarisaanerup ingerlanerani Nunatsinni sumiiffinni amerlasuuni sukuutsertarfiliorniarsarisarput. Nuuk siulliulluni sukuutsertarfittaarpoq. Sukuutsertarfik atugaalluarpoq, tamannalu AG-mi 1965-imi allaaserisami takuneqarsinnaalluni. Tassani allaaserineqartutut pilersaarutit ilagaat, nunanit allaneersunik ilitsersuisartunik illoqarfimmut tikisitsisoqarnissaa, timersuummik nutaamik siuarsaaqataasinnaasunik. Tamannali piviusunngortinneqanngilaq.

Tasiilami siullertut tikkuarneqartoq tassaavoq sukuutsertarfik arsaattarfiup pioreersup, ukiukkut apummit qallerneqarsimagajuttup, qaavanut inissinneqassasoq.

- Arsaattarfik sukuutsertarfissatut piukkunnarluartuugami, manissuugami ungalusaalluni qullilersugaareerlunilu. Tassani sukuutsertarfiliornikkut ukiuunerani illoqarfimmiut katersuuffissaqalissapput. Soorlu aamma sukuutsinik attartornermut aamma najoqqagassanik kissartunik tamulugassanillu tuniniaasoqassappat, aningaasartuutit appasinnerussallutik, tamaanimi innaallagiaqareermat, suliniummik suliaqartut politikerinut nassuiaataanni taama allassimavoq.

Teknikikkut aaqqiissutissaq aamma innersuussutigineqarpoq:

- Sukuutsertarfik suliarineqassaaq arsaattarfiup plastimik qallerneratigut. Taanna siaarneqareerpat arsaattarfiup sinaatigut tuussassianik ikkussuunneqassapput. Tamatuma kingorna sermimik qallersornissaa aallartissaaq. Tamannalu pissalluni arsaattarfiup imermik annaarnagu serpartarneratigut. Imermik qallerneqarneri tamaasa qerinissaa utaqqeqqaariarlugu qerippat imermik serpalittarneqaqqissalluni. Sermip issusuup taamaalilluni manngersimatissavaa, taamalu arsaattarfiup qalliutaa sukuutsinit ajoquserneqarnissaa pinaveersaartissallugu, suliniuteqartut allapput.

Rasmus Poulsenip oqaatigaa, sukuutsertarfik oktobarimit apriilimut ammasinnaassasoq. Aningaasaqarnermut ataatsimiititaliaq aalajangerpoq siunnersuut Tasiilami sunngiffimmi sammisassanut immikkoortortaqarfimmut misissoqqissaarneqarnissaanut nassiunneqassasoq, periarfissat allat, soorlu sukuutsertarfik arsaattarfimmut qalliullugu pilersinneqarsinnaasussaq ilanngullugu nalilersorneqarniassammata.