DANMARKIP KALAALLIT NUNAATALU SULEQATIGIINNERAT
Suleqatigiinneq aallunneqassaaq nutarterneqarlunilu
Naalakkersuisut siulittaasuat, Jens-Frederik Nielsen ullumi Marienborgimi Statsminister Mette Frederiksenimik ataatsimeeqateqassaaq. Ataatsimiinnerup kingorna tusagassiortunik katersortitsisoqassaaq Kalaallit Nunaata nalunaaqutaa malillugu nal. 11:30 .
Ministeriunerup Mette Frederiksenip (S), Naalakkersuisut siulittaasorisimasaa, Múte Bourup Egede, maannakkullu Naalakkersuisut siulittaasuat Jens-Frederik Nielsen, Sea Hawk helikopterimik angalareerlutik illersornissaqarfiup alapernaarsuisartuata Vædderenip Nuup eqqaani angalaarnermit, sisamanngorneq 3. apriili 2025. Maanna Jens-Frederik Nielsen Danmarkimiippoq ullumilu ministeriuneq ataatsimeeqatigissavaa.
Assi: Mads Claus Rasmussen/Ritzau Scanpix
Kalaallit Nunaata Danmarkillu suleqatigiinnerat oqaluuserineqassaaq, Naalakkersuisut siulittaasuat Jens-Frederik Nielsen apriilip 27-ianiit 28-ianut Danmarkimut tikeraarnerani. Taanna siullerpaamik Naalakkersuisut siulittaasutut Danmarkimut tikeraarpoq.
Statsministerip Kalaallit Nunaannut kingullermik tikeraarnerata nanginneratut tikeraarneq isigineqassaaqq, statsministeri tusagassiorfinnut nalunaaruteqarluni allappoq Naalakkersuisut siulittaasuanik ataatsimeeqateqarnissani sioqqullugu.
Statsminister Mette Frederiksen (S) aamma Naalakkersuisut siulittaasuatJens-Frederik Nielsen (D) ataatsimeeqatigiissapput Marienborgimi Kongens Lyngbymi, sapaammi 27. april 2025.
Assiliisoq: Mads Claus Rasmussen/Ritzau Scanpix
KALAALLIT NUNAANNI NAALAKKERSUISOOQATIGIINISSAMUT ISUMAQATIGIISSUMMI 2025-2029-MI IMA ALLASSIMASOQARPOQ
Danmarkimik isumaqatiginninniarneq
Inatsisartuni inissitsiterluni ataatsimiinnerup kingorna siunissami suleqatigiinnissamut sinaakkutinik
nutartikkanik muteerninillu pilersitsinissaq siunertaralugu, qallunaat naalagaaffiannik Naalakkersuisut
isumaqatiginninniarlutik aallartissapput. Pissutsit taamaaginnartinneqarnerat periarfissaanngilaq.
Isumaqatiginninniarnerni makku aallaavigineqassapput:
- Kalaallit Nunaata Danmarkillu kiisalu kalaallit qallunaallu tamakkiisumik naligiissinneqarlutillu assigiimmik naleqartinneqarnissaat pillugu paaseqatigiinneq isumaqatigiissuteqarnerlu. Naalagaaffeqatigiit naligiissut
suleqatigiinnerat pineqassaaq.
- Siunissami aningaasaqarnikkut suleqatigiinnermut isumaqatiginninniarnerit piviusorsiortut
aallartinneqassapput, tassani Kalaallit Nunaanni ineriartornermik pilersitsinissaq pillugu aningaasaliinerit
pisariaqartut ilanngullugit.
Tusarfik: Naalakkersuisooqatigiinnissamut isumaqatigiissut D, A, IA, S 2025
- Suleqatigiinneq ineriartortissavarput nukittorsarlugulu
- Piffissami matumani inuuffigisatsinni ataatsimoornissarput pisariaqartipparput. Nunani allani politikkikkut pisut nalunartortaqaqisut Kalaallit Nunaata Kunngeqarfiullu nalaappaat. Kalaallit Nunaata Danmarkillu akornanni attaveqaatigut ineriartortittariaqarpagut nukittorsartariaqarlugillu.
- Eqqortumik alloriarpugut. Kisianni suli angusassagut angunngilagut. Danmarkip tungaanut Kalaallit Nunaata tunngavissaanik nukittorsaanissamut ikiuinissatsinnut piareersimavugut. Taamaattumik Naalakkersuisut siulittaasuanut tikilluaqqusinissara qilanaaraara, pitsaasumik qanittumillu oqaloqatigiinnerput nangissallugu, statsministeri Mette Frederiksen oqarpoq.
Angalanissaminut atatillugu Naalakkersuisut siulittaasuat, Jens-Frederik Nielsen ima oqarpoq:
- Siullermik nunat marluk akornitsinni suleqatigiinnerput, nunarsuarmilu pissutsit pillugit ministeriunermik oqaloqateqarneq ingerlateqqissavara. Siunissami suleqatigiinnissatsinnut maannakkorpiaq pilersaarusiornissarput pingaaruteqarpoq.
Ataatsimiinnerup kingorna tusagassiortunik katersortitsinissamik taakku pilersaaruteqarput, taannalu Kalaallit Nunaata nalunaaqutaa malillugu nal. 11:30, Danmarkillu nalunaaqutaa malillugu 14:30 pissaaq.
