Sunoorsimut inerteqquteqarnissamik "sapiiserluni" siunnersuut Naalakkersuisut tunuartippaat
Pujortartartut, ingammik meeqqat inuusuttullu, ikilisarniarlugit siunnersuut annertooq Naalakkersuisut sisamanngormat tunuartippaat. Siunnersuut inerteqquterpassuarnik imaqarpoq, katsorsaaviullu Allorfiup sapiisernertut pisarialittullu oqaatigaa.
- Pujortartarneq puakkut kræfteqalertarnermut pissutaasartoq uppernarsaatissaqarluarpoq, ataasiakkaanut artukkiisuulluni pisortanullu aningaasartuuterujussuulluni. Taamaattumik inuiaqatigiinni nikotinimik pinngitsuuisinnaajunnaartarnerup akiornissaanut sakkussat tamaasa atornissaannut pissutissaqarluarpoq, Inatsisartut ataatsimiinneranni siunnersuutip maanna tunuartitaasimasup tunuliaqutaa pillugu Agathe Fontain paasissutissiivoq.
Assi: Leiff Josefsen
Inatsisissatut siunnersuut annertooq ilaatigut tupamik pujoqanngitsumik soorlu sunoorsimik, sukuluumik, tupamik tamuasartakkamik e-cigarettimillu inerteqqutaalersitsiniarnermik imalik, sisamanngormat ukiakkut ataatsimiinnermi tunuartinneqarpoq.
Naalakkersuisut inatsisissatut siunnersuutaat Inatsisartuni sisamanngornermi siullermeerneqartussatut pilersaarutigineqaraluarpoq, taamaaliortoqanngilarli.
Siunnersuutip ilaani nioqqutissat nikotinillit assigiinngitsut inerteqqutigineqarnerisa saniatigut aamma tupanik tunisassiat pisiniarfinni ersarissumik nittarsaanneqarnissaat inerteqqutigineqarpoq.
Pujortartalersut nikotinimillu akulinnik allanik atuilersut, ingammik meeqqat inuusuttullu, ikilisarnissaat inatsip taassuma siunertaraa.
Siunnersuutip sooq tunuartinneqarnera pillugu peqqissutsimut naalakkersuisoq Agathe Fontain (IA) oqaaseqartinniarlugu Sermitsiap sulissutigaa.
Katsorsaaviup Allorfiup siunnersuut sapiisernertut pisarialittullu taagaa, inatsisissatut siunnersuut pillugu paasissutissani ilaatigut allassimavoq.
Katsorsaaviup siunnersuut nersualaaraa
Sunoorsip e-cigarettillu inerteqqutaalernissaat pillugu siunnersuut Allorfimmi nersualaarneqarluarpoq:
- Pingaartumik nioqqutissanut
nikotinilinnut soorlu sunoorsinut aamma e-cigarettinut inerteqquteqarnermut atatillugu inatsisissami
sukasaaneq pingaaruteqarpoq, taakku nioqqutissat qalipaatigissaarajummata tipigillutillu, kiisalu
nikotinimik amiilaarnaannartumik annertussusilimmik imaqartarmata, nioqqutillu taakku
pingaartumik meeqqanik inuusuttunillu atorneqartarlutik, Allorfik tusarniaanermut akissummini allappoq.
Tusarniaanermili akissuteqartut ilaat ernumanerminnik oqariartuuteqarput. Inatsisissatut siunnersuutip imarisaata annersaa Sulisitsisunit tapersersorneqarpoq, kisianni nioqqutissanik inerteqquteqalersitsineq unioqqutitsilluni niuerfimmik aqunneqanngitsumik
pilersitsisinnaasoq, suliniaqatigiiffimmit ernumassutigineqarpoq.
Tupat pujoqanngitsut soorlu sunoorsip inerteqqutaalernera nunatta karsianut aamma annaasaqaataassaaq, tassami tunisassiat taakku ukiut pingasut kingulliit ingerlaneranni agguaqatigiissillugu ukiumut 17 millionit koruuninik akitsuutinit isertitaqaataasimapput.
