KL

DK

Taamaattumik Angallannermut Aqutsisoqarfiup timmisartortitseqatigiiffiit nutaat Nuummi mittarfimmut tikinnissaat unitsippaa

Nuummi mittarfittaap ammarnissaanut oqartussat immikkut ittunik piumasaqaateqarput. SAS-imut nunanilu tamalaani timmisartortitseqatigiiffinnut allanut illoqarfiit pingaarnersaata silaannartaa ammarneqartinnagu suli akuersissuteqartoqartariaqarpoq. Sooq taamaannersoq Sermitsiap Angallannermut aqutsisoqarfik aperaa.

Greenland Airportsip inaarutaasumik piareersarnerani sillimaniarneq isumannaallisaanerlu aaqqissuunneqartariaqartut timmisartortitseqatigiiffiup piumasaqaatigaa, allaffimmi pisortaq Henrik Ellermann oqarpoq.
Morten Okkels TUSAGASSIORTOQ
Offentliggjort

Piffissaq kingullerpaaq atorlugu novembarip 27-ata 28-atalu akornata unnuaani Angallannermut Aqutsisoqarfik Nuummi mittarfissap nutaap atulernissaanut akuersissuteqarpoq.

Taamaalilluni timmisartoq angisooq, Air Greenlandip Københavnimit aallartussaa, pilersaarutit malillugit ullup affaata missaa qaangiummat Nuummut siullermeerluni missinnaalerpoq.

Tamatuma saniatigut mittarfik immikkut ittumik akuerineqartoq erseqqippoq. Ilaatigut timmisartortitseqatigiiffiit Nuummut timmisartuussisanngereersut timmisartuussisanngikkallarnissaannik akuersissut imaqarpoq.

Allatut oqaatigalugu SAS aamma Amerikamiut timmisartortitseqatigiiffia United Airlines timmisartuussisalernissaminnut, juunimi 2025-mi aallartittussaagaluartumut, akuersissutinik arlalinnik pissarsisariaqarput.

Suli inissivinngitsoq

– Nuup mittarfia nunat tamalaat akornanni timmisartuussinermut tunngatillugu killeqarpoq, maannakkummi timmisartut annerusut Air Greenlandimeersut aamma Icelandairimeersut, kiisalu timmisartut namminersortut minnerit nunanit allanit tikittartut mittarfik nutaaq atorsinnaavaat, Angallannermut Aqutsisoqarfimmi allaffimmi pisortaq Henrik Ellermann uppernarsaavoq.

Angallannermut Aqutsisoqarfimmilli akuerineqarpat timmisartortitseqatigiiffik Narsarsuup kangerluani anorlersumi mittarfimmut naappallaartumut aserfallatsaalineqarsimanngitsumullu sorsunnersuup nalaani sananeqarsimasumut missinnaasoq, taava sooq timmisartortitseqatigiiffik taanna Nuummut tulluanngila?

– Mittarfiup nunanit tamalaanit timmisartuussiffiunissaanut akuersinissatsinnut naammasseqqusat piumasaqaataapput. Tamatumunnga pissutaavoq mittarfik suli tamakkiisumik inissinneqanngimmat, suliniutit nutaat suleriaatsillu nutaat, nunanit tamalaanit mittarfimmik ingerlatsinermi tunngaviusumik piumasaqaatigineqartut eqqarsaatigalugit. Nuuk mittarfiuvoq annerujussuaq ajornakusoornerungaartorlu, assersuutigalugu Narsarsuarmit angallaffiunerusoq, Henrik Ellermann akivoq nangillunilu:

– Taamaattumik piumasaraarput mittarfik immikkut ittumik aaqqissuussissasoq killilersuissasorlu, amigaataasut aaqqiiviginiarlugit. Taamaattumik inaarutaasumik aaqqiissutissat utaqqitillugit isumannaallisaaneq suli ajunngitsumik inissisimavoq.

– Pisumi matumani nunat tamalaat akornanni timmisartuussinerit Air Greenlandimut aamma Icelandairimut killilersornissaannik piumasaqarneq pineqarpoq, taakkua timmisartortartui Kalaallit Nunaanni pissutsini immikkut ittuni timmisartuussinissamut sungiusarsimammata – aamma Nuummi mittarfimmi sulisut timmisartortitseqatigiiffiit taakku marluk timmisartuinik sullissinissamik sungiusarsimammata.

Mittarfik aalajangiisuussaaq

Nangaassut tamanna atorunnaarsinniarlugu mittarfik qanoq iliortariaqarpa?

– Timmisartuussinermut nakkutilliisutta nakkutilliinerminni mittarfik piumasaqaatigisatsinnik tamanik iliuuseqarsimanersoq misissoreerpassuk tamanna pissaaq. Qaqugu tamanna pissanersoq Greenland Airports aalajangiisuussaaq. Mittarfik piareerpat piariissaagut.

Timmisartortitseqatigiiffik Nuummut timmisartuussiumappat, Angallannermut Aqutsisoqarfik qularunnaarsinniarlugu nammineq iliuuseqartoqarsinnaava?

– Naamik. Pingaarnertut pineqarpoq Nuup mittarfiata timmisartortitseqatigiiffinnit allanit timmisartuussinernut nunanit tamalaanit tikittartunut piareersarneqarnera. Tamatuma kingorna timmisartortitseqatigiiffinnit nutaanit aallartitat nalinginnaasumik mittarfimmut tikeraassapput pissutsit misissorniarlugit timmisartumillu taakkua timmisartuutaannik qanoq pitsaanerpaamik ingerlatsisoqarsinnaanersoq paasiniarlugu, allaffimmi pisortaq Henrik Ellermann oqarpoq.

inuiaqatigiit samfund

ATORFIIT Se alle jobs

Powered by Labrador CMS