Takornariat umiarsuaannik tikeraartoqaqqaarneq iluatsilluartoq
Nunaqarfik Qeqertarsuatsiaat, Nuuk aamma Paamiut akornanni inissisimasoq, siullerpaamik umiarsuarnit takornariartaatinit tikeraarneqarpoq, tamannalu naatsorsuutigisamit iluatsilluarneruvoq.
Qeqertarsuatsiaat-imi najugallit umiarsuarnik takornariartaatinik siullernik tikilluaqqusillutik, takornariartunut immikkut ittumik misigisaqartitsipput
Assilisaq toqqorsivimmeersoq
Ullut 14-it matuma siorna Hurtigrutenimit ilisimasassarsiorluni takornariartut umiarsuaat nunaqarfimmut Qeqertaesuatsiaannut tikippoq, nunaqarfimmilu innuttaasut takornariat Kalaallit Nunaata pinngortitaanik kulturianillu immikkut ittumik qanimut paasisaqartinnissaat isumagaat, Kommuneqarfik Sermersuumi paasissutissiinermut immikkoortortaqarfik ilisimatitsivoq.
- Nunaqarfiup oqaluttuarisaaneranik najugaqartoq oqalulttuarpoq. Ujaqqanik silisisarfik ammatinneqarpoq, takornariallu ujaqqanik silisanik pisisinnaatinneqarlutik. Oqaluffimmi takornariartitsisoqarpoq. Oqaluffiup saavani nipilersortoqarlunilu erinarsoqatigiit erinarsorput, utoqqaallu illuanni tikeraat eqalunnit suppiliamik qajuusalinnik kalaallit kaagiannillu sassaallerfigineqarput, Kommuneqarfik Sermersuup nunaqarfiup immikkoortortaqarfiani immikkoortortami pisortaq, Toni Lynge oqaluttuarpoq.
Akissarsilluartut
Tikeraarneq 122.000 koruuninik aningaasartuuteqarfiuvoq, aningaasat taakku peqataasut akissarsiaannut aamma oqaluffimmut utoqqarnullu peqatigiiffimmut tunissutitut atorneqarput.
Ataasinngornermi juulip 15-ianni umiarsuaq takornariartaat alla Aurora Expeditionsimit aamma tikeraarpoq. Takornariat allaffissianik, qalipaatinik 1.400 koruuninillu nunaqarfiup atuarfianut tunissuteqarput. Ujaqqanillu silisisarfimmi aamma pisisoqarluni.
Inuussutissarsiornermut pisortap Mads-Daniel Skiftep nunaqarfimmiut nuannersumik misigisaqarsimanerat nuannaarutigaa.
- Qeqertarsuatsiaani innuttaasut takornarianik tikisitsiniarlutik iliuuseqartarnerat nuannerpoq. Misissueqqissaarluni takornariartitsisarneq nunaqarfinnut taamaaliorusuttunut isertitaqartitsilluarsinnaavoq, Sermersooq Businessimi pisortaq Mads-Daniel Skifte oqarpoq.
