Donald Trumpip oqaaserisai pissutigalugit innuttaasut arlallit
maannakkorpiaq ernumallutillu toqqissisimajunnaarput.
- Piffissami tamatumani eqqissisimanissaq pingaaruteqarpoq. Itisuumik
anersaartorit eqqissisimaniaannarlutillu, tarnip pissusiinik ilisimasalik Niina
Isaksen siunnersuivoq.
Donald Trumpip oqaaserisai pissutigalugit innuttaasut arlallit
maannakkorpiaq ernumallutillu toqqissisimajunnaarput.
- Piffissami tamatumani eqqissisimanissaq pingaaruteqarpoq. Itisuumik
anersaartorit eqqissisimaniaannarlutillu, tarnip pissusiinik ilisimasalik Niina
Isaksen siunnersuivoq.
OQALOQATIGIISSUTIGIUMINAAT- SUNUT UNICEF-IP SIUNNERSUUTAI PITSAASUT
Angajoqqaatut aamma isumassuisutut sorsunnerit
akerleriinnerillu pillugit qanoq pitsaanerpaamik oqaloqatigiittoqarsinnaanersoq
nalunarsinnaasarpoq. Qanoq ililluta meeraq pisunik oqaluttuussinnaavarput,
meeraq toqqissisimajunnaartinngikkaluarlugu? Unicef Danmarkip siunersuutaasa
ilaat aajuku:
· Meeqqat illersorsinnaatillugu
illersoruk
Meeqqat sorsunnerit,
peqqarniisaarnerit, ajunaarnersuit, piitsuussuseq kaannersuillu pillugit
aatsaat pinngitsoorneqarsinnaanngitsumik tusartinneqartariaqarput, tassa atualereernerisa kingorna.
· Fjernsyni, radio inoqatinullu
attaveqaqatigiittarfiit eqqumaffigikkit
Nutaarsiassat ulloq unnuarlu
aallakaatinneqartarput, internetikkullu inoqatinut attaveqaqatigiittarfiit
nunarsuarmi pisartunik oqaluttuanik ulikkaartuaannarput. Nutaarsiassat
sakkortuut meeqqat annilaangassutigisarpaat sunnertarlugillu. Isiginnaakkaminni
susoqarpiarnersoq paasineq ajorpaat – takorluuisinnaanerallu
ingerlarsulersinnaalluni.
Meeqqat ikiorneqartarnerat meeqqannut
nassuiaruk.
Ikiuiniaqatigiiffiit nunami akerleriiffiusumi
meeqqanut qanoq ikiuisarnersut meeqqannut oqaluttuariuk, aamma paasitiguk
inoqarmat eqqissiviilliornerit unitsinnissaannik meeqqallu
illersorneqarnissaannik sulissuteqartunik.
Najoqqutaq: unicef.dk
Trumpip Nunatsinnik pisinissamik oqaasii, inuit assigiinngitsunik
qisuariarfigisaraat nammineq maluginiarsimavaa.
Innuttaasut arlallit nittartakkani inoqatinut attaveqaqatigiittarfinni
annilaanganertik piviusorsiunngitsunillu pisussanik takorluuillutik
allaaserisaqarlutik ersersitsisarput.
- Annilaanganeq ernumanermik pilersitsisarpoq. Inoqatitsinnut
eqqissisimannginnerput malugitikkutsigu, tamanna anneruliinnarsinnaavoq
allanullu sunniuteqarluni. Misigissuseqarpugut immitsinnullu
sunneqatigiissinnaalluta. Taamaattumik nammineq aalajangersinnaavarput,
eqqarsartaaserput annilaanganermik 'immerniarnagu', immitsinnullu aamma allanut
eqqissisaasinnaalluta, Niina Isaksen oqarpoq.
Qisuariaataasartut pingasut
Annilaangagaangattali eqqarsartaaserput qanoq iliortarpa?
Tarnip pissusiinik ilisimasalik nassuiaavoq, annilaangagaangatta
annilaartitaasimagaangattaluunniit qarasatta 'kalerriisartua' sulilertarpoq.
- Qaratsatsinni kalerriisartup inuuinnarnissarput isumagisarpaa,
qisuariarnerillu pingaarnerit pingasut peqataaffigisarlugit: Akiuunneq,
qimaaneq imaluunniit soriarsinnaajunnaarneq, oqarpoq, itisiliillunilu
oqaatigalugu qisuariaat „akiuunneq“ tassaasoq imminut illersorniarluta
akiuulluta iliuuserisartagarput. Akinissarput kissaatigilersarparput: Sooruna
taamaaliortusi? Taama pisoqartillugu kamaqqajaasarpugut, Niina Isaksen
oqaluttuarpoq.
- Qimaarusunneq tassaavoq, pissutsinit ersigisanit qimaarusunneq,
imaluunniit matumani nunamit qimaarusunneq, annilaanganarpallaarnera
pissutigalugu. Kingulleq tassaavoq soriarsinnaajunnaarneq, tamatumani timi
qimaasinnaananilu akiuussinnaasarani, oqarpoq.
Taamatut qisuariartoqartillugu eqqarsarluarsinnaaneq
eqqarsariataallaqqissuunerlu ajornakusoorsinnaasarput.
- Kalerriisartup aniguiniarnissaq pingaarnerpaatut suliassarilertarpaa,
kalerriisartullu takusinnaasanngilaa suna ersigineripput, ersigisarput
nanuunersoq aggersoq imaluunniit facebookimi allaaserisaq atuaqqammigarput,
Niina Isaksen oqaluttuarpoq.
Eqqissisimaniaannarit
Taamaattumik uippakajaalernaveersaassagutta
eqqarsarluarsinnaajumallutalu itisuumik anersaartortariaqarpugut
eqqissisimaniarsaralutalu.
- Itisuumik naakkut anersaartoraangatta qaratsatta timerput
nalunaarfigisarpaa, annilaangagisassaqanngitsugut. Tamanna qaratsap
eqqissisimanissaanut ersersitsisarpoq,
taamaalilluta pisoq pitsaanerusumik iliuuseqarfigisinnaaniassagatsigu, Niina
Isaksen oqarpoq.
Tupaallatsitaarujussuarsimagaanni ernumavallaaraanniluunniit imminut
oqarfigisoqarsinnaavoq, maannakkorpiaq pisut eqqarsaatigisariaqartut eqqarsaatipiloqarnaveersaartariaqartorlu.
-
Massakkorpiaq maaniinnerit imminut oqaatigiuk, imminut eqqaasigit Trumpip
pisiariniarluta takkutilinngitsoq. Tamanna ernumanermik
minnerulersitsisinnaaavoq. Politikerit nuimasut arlalissuit, politikikkut
tunuliaqutertik apeqqutaatinnagu ajornartorsiut pineqartoq
suleqatigiissutigaat, oqarpoq.
Donald Trumpip oqariartuutai Tiktok-imi nittartakkanilu inoqatinut
attaveqaqatigiittarfinni allani sukkasuumik siaruarterneqarput, inuusuttunit
amerlasuunit atorneqartartuni, siammarterneqapallattarlutik.
Tarnip pissusiinik ilisimasallip aamma siunnersuutigaa, tamanna pillugu
meeqqat pitsaanerpaamik qanoq oqaloqatigineqarsinnaanersut. Siullertut
angajoqqaat eqqissisimanissaat pingaaruteqarpoq, aamma nammineq
isumakuluuteqarpallaaraanni imaluunniit pitsaanngitsunik eqqarsaateqaraanni,
imminut ‘eqqissisaqqaaarnissaq’ pingaaruteqarpoq.
- Eqqissisimanngikkutta imaaliallaannarluta qitornavut
sunnersinnaavavut. Nunarsuarmi tamarmi pisartut pillugit angajoqqaat
oqaloqatiginninnissamut periarfissaqarluarput, oqarpoq.
Aamma angajoqqaat pissutsinik ingasattajaarpallaanngitsumik
nalilersuinissaat pingaaruteqarpoq.
- Pisoq ingasattajaartunngortinnagu minnerusunngortinnaguluunniit
nassuiaruk. Ammasunik soorlu ima apeqquteqarit: ”Una qanoq isumaqarfigaajuk?”
Imaluunniit ”Apeqqutissaqarpit?” Apeqqut akissutissaqartinngikkaanni
oqartariaqarpoq: ”Marluulluta misissoriartigu”. Taamaalilluni ammasumik
oqaloqatigiissutigineqarsinnaavoq, periarfissanut ernumanissamullu
inissaqartitsisumik, pisariaqanngitsumik ernumalersitsinngikkaluarluni.
Inersimasut meeqqallu akornanni oqaloqatigiinneq taama aallartissaaq,
aamma tarnip pissusiinik ilisimasallip meerartatsinnut qanoq
apersueriaaseqarsinnaanerput siunnersuuteqarfigaa.
“Apeqqutissaqarpit, tamanna qanoq isumaqarfigaajuk, aamma qanoq
eqqarsarpit?”
- Aamma
unneqqarissuuneq pitsaasuuvoq. Apeqqut akissutissaqartinngikkaanni qitornamut
ima oqartoqarsinnaavoq: Tamanna ilisimaqqissaanngilara, marluulluta
misissussavarput? Taamaalilluni ilaqutariit oqaloqatigiinnerat
pilersinneqarsinnaavoq, annilaangalersitsinngikkaluarluni, oqarpoq.
Toqqissisimaneq
Tarnip
pissusiinik ilisimasalik nassuiaavoq, ilisimatuussutsikkut
uppernarsarneqarsimasoq inuit meeraanerminniilli allat qisuariartarnerat malugisinnaallugulu
misigisinnaasaraat.
- Ingammik
Danmarkimi tusagassiorfinni sakkortuunik ilanngutassiisoqartarnera nammineq maluginiarsimavara. Taamaattumik
eqqissisimalluinnarnissaq piviusorsiorlunilu eqqarsarnissaq
sunnerneqannginnissarlu pingaaruteqarput, Niina Isaksen oqarpoq
itisiliillunilu:
- Tamatta
ataatsimoornitsigut eqqissisimanerput kikkunnut tamanut misinnarsinnaassaaq,
kikkunnik tapersersuinerput apeqqutaatinnagu. Politikerit inuiaqatigiillu
ataatsimooraangata tamanna takusareerparput. Tamanna ineriartortissinnaavarput,
oqarpoq.
Inuiaqatigiittut
ataatsimoorluta toqqissisimaneq tamanna pilersissinnaagutsigu, nukissamik
annertuumik pilersitsisinnaavugut, Niina Isaksen isumaqarpoq.
