Tasiilami nuna annikitsumik sajoqattaareersorlu kommuni eqqissisaavoq

Tasiilami eqqaanilu sapaatip-akunnerata siuliani nunap sajunneri annikitsut nalunaarsorneqarsimasut Kommuneqarfik Sermersooq nittartakkamini ilisimatitsivoq.

Nunap sajunneri 40-t tungaannut amerlassuseqartut uuttortarneqarsimapput, amerlanerilli sakkukimmata malugineqarsinnaasimanatik.

Nunap sajoqattaarnerani innuttaasut ilaannik ernumalersitsisoq Tunumi immikkoortortaqarfimmi pisortaq, Hjørdis Viberg, oqarpoq, taassumalu GEUS, Tasiilami napparsimmaviup eqqaani uuttortaasarfeqartoq, attaveqarfigisimavaa.

GEUS-ip pisortaa naapertorlugu nunap sajunneri annikinnerupput, taakkualu ilaat marluk sakkortunerusimallutik.

Apriilip tallimaani nal. 23:57 nunap sajunnera 2,3-usoq, aamma apriilip arfineq-pingajuani sumiiffimmi nal. 8:45 Richterip nunap sajunneranik uuttuutaa naapertorlugu 2,4-raavoq.

- Apriilip tallimaani nunap sajunnera napparsimmaviup eqqaani uttortavimmiit 4 kilometeriinnarmik ungasitsigisumi pivoq, taamaattumillu malunnarnerpaasimalluni, immikkoortortaqarfimmi pisortaq Hjørdis Viberg nassuiaavoq.

Aarlerinartoqannginnera taassuma erseqqissaatigaa. Nunap taama annikitsumik sajuttarnera nalinginnaasuuvoq, sumiiffimmilu pisut GEUS-imi immikkut ilisimasalinnit malinnaaffigineqarput.