Timmisartunik sorsuutinik F-16-inik aasaru tikiussiniarlutik Biden Frederiksenilu neriorsuipput — Zelenskyj qujavoq

Danskit Hollandimiullu timmisartui sorsuutit F-16-it aasaq manna Ukrainemi Ruslandimut sorsugiassapput.

Det Hvide Husimit tusagassiuutinut nalunaarummi USA-p præsidentia Joe Biden taama neriorsuivoq. Ministeriunermik Mette Frederiksenimik (S) Hollandillu ministeriuneranik Dick Schoofimik suleqateqarnikkut tamanna pissaaq.

- Danmarkimi Hollandimilu naalakkersuisut USA-p tapersersuineratigut Ukrainemut timmisartunik F-16-inik Amerikami sanaanik tunissuteqarniarlutik aallartipput.

- F-16-it taakkua nuunneqarnissaannik suliaqarneq ingerlavoq, Ukrainelu aasaq manna F-16-inik timmisartuussisinnaalissaaq. Sulinerup isumannaatsuunissaa eqqarsaatigalugu maannakkorpiaq sukumiinerusumik paasissutissiisinnaanngilagut, allassimavoq.

Taamaalilluni timmisartut Ukrainemut nassiunneqarnissaannut piffissaliussaq, aasaq manna pinissaa naatsorsuutigineqartoq, Danmarkip malippaa.

Tamanna ministeriunerup Mette Frederiksenip nuannaarutigaa, Washingtonimi Nato-p ataatsimeersuarnerani taama oqarpoq.

- Suliaq imaannaanngilaq. Ukrainermiut timmisartunik sakkunillu pingaarutilinnik pissarsipput, aammali annertuumik iliuuseqartariaqarsimavugut. Pilersaarusiorluta sulivugut, Mette Frederiksen oqarpoq.

Norgep timmisartui F-16-it arfinillit ukiup ingerlanerani Ukrainemut aallartinneqassapput, pingasunngornermi nalunaarutigineqarpoq.

Timmisartut F-16-it marluk atorlugit Flyvestation Skrydstrupimi Ukrainemiut timmisartortartuinik ilinniartitsinermut nuna sanilerisaq peqataavoq.

Ukiup naanerani Ukrainemiut 20-t missaat F-16-inik timmisartortartutut Danmarkimi ilinniartinneqareerpata Danmarkimi ilinniartitsineq unitsinneqassaaq.

Illersornissamut ministeri Troels Lund Poulsen (S) naapertorlugu Ukrainemiut timmisartunik F-16-inik timmisartornermik aserfallatsaaliuinermillu ilinniartinneqarnissaat tunissutip pingaarnersaasa ilagaat.

- Timmisartut F-16-it siulliit aasap ingerlanerani tunniussinnaangajalerpavut.

Ukrainemiut timmisartortartut ukiumi ataatsimi sungiusareerunik timmisartumik F-16-imik aqutsisinnaalissapput.

- Suliniut annertuvoq ullormiit ullormut suliarineqarsinnaanngitsoq. Timmisartut aallarpata aamma taakkuninnga tigusisinnaasoqartariaqarpoq aserfallatsaaliuisoqartariaqarporlu.

Illersornissamut ministerip timmisartut qaqugu Ukrainemut tikinnissaat oqaatigiumanngilaa.

- Aasap ingerlanerani tunniunneqassapput, ingerlatsinerlu eqqarsaatigalugu tamanna itinerusumik sammissanngilarput. Ukiup siuliani suliarisimasatsinnut sanilliullugu kinguaattoornavianngilagut, Troels Lund Poulsen oqarpoq.

Mittarfiit, Ukrainep timmisartuinik F-16-inik Ukrainep iluaniit timmisartuussisoqarsinnaassappat pisariaqartut, Ruslandip saassussiffiginerulerniarai upernaaq manna Ukrainemit nalunaarutigineqarpoq .

Sakkutuut tungaannit immikkut ilisimasallit isumaqarsimapput timmisartut F-16-it Ukrainep avataani inissinneqarsinnaasut, Ukrainemili Nato-milu qanoq pilersaaruteqartoqarnersoq oqaatigineqanngilaq.

Ukrainep præsidentiata Volodymyr Zelenskyjip timmisartut F-16-it pillugit nalunaarut X-imut ima oqaatigaa:

- USA, Danmark Hollandilu Ukrainemiut tamarmik anguniagaat anguniarlugu iliuuseqarsimammata qujamasuutigeqaara: Ukrainep silaannartaa timmisartunik F-16-inik nukittorsarniarlugu anguniagaq, Zelenskyj allappoq.

/ritzau/