Trump nutaamik oqariartuuteqartoq: - Kalaallit Nunaat pisariaqarparput

USA-p Kalaallit Nunaat "sillimaniarnermut tunngatillugu2 pisariaqartikkaa USA-p præsidentiata Donald Trumpip sisamanngornerup unnuaani uteqqiippaa.

Nutaarsiassaqartitsivik Reuters allappoq.

Præsidenti Miamimi Floridamiittumi ataatsimeersuarnermi unnuaq taanna siusinnerusukkut peqataavoq. Air Force Onemut ilaaluni Washington D.C.-mut uternermini pisut assigiinngitsut pillugit oqaaseqarpoq.

DR.dk-p Air Force One-miit tv-kkut immiussaq saqqummiuppaa, tassanilu Trump ima oqarpoq:

- Kalaallit Nunaat nunap isumannaatsuunissaa nunallu tamalaat isumannaatsuunissaat pissutigalugit pisariaqartipparput. Kalaallit Nunaat iliuuseqarfigisariaqarparput. Kalaallit Nunaat illersortariaqarparput, kisianni Kalaallit Nunaat nunatta isumannaatsuunissaa pissutigalugu immaqalu suli pingaarnerusumik nunat tamalaat isumannaatsuunissaat pissutigalugu pisariaqartipparput.

- Kalaallit Nunaat pigisariaqarparput

Tamatuma kingorna Trump Kalaallit Nunaat pillugu aperineqaqqippoq, taassumalu USA-p Kalaallit Nunaat pisariaqartikkaa uteqqippaa:

- Naalagaaffiup isumannaatsuunera eqqarsaatigalugu Kalaallit Nunaat pisariaqarparput, ukiut 20-30-t matuma siornatigorniit pisariaqartinneruarput.

- Ukiorpassuit matuma siornatigut Kalaallit Nunaat eqqartortarpaat, maannakkulli sakkussianik nutaaliaasunik, timmisartunik, timmisartunik sukkasuunik tamakkuninngalu tamanik peqarneruleramik Kalaallit Nunaat pisariaqartipparput.

Trumpip Kalaallit Nunaat pigilerusullugu oqariartuuteqareernerata kingorna USA-p Danmarkillu attaveqatigiinnerat allanngorluinnarpoq, soorlu aamma Kalaallit Nunaanni uissuummissutigineqarujussuarpoq.

Truth Socialimi Kalaallit Nunaata oqartussaaffigilernissaanik aqukkusunneranillu eqqarsaatini decembarimi inuit attaveqaqatigiittarfianni saqqummiummagilli pisoq pillugu oqallittoqangaatsiarpoq.

Kingornatigut arlaleriarluni qeqertaq pigilerusullugu oqaaseqartarpoq.

- Isumaqarpunga pigilerumaaripput, præsidenti CNN-imit januaarip naanerani apersorneqarnermini oqarpoq.

TimmisartumiAir Force One-mi tusagassiortunik februaarip qulingani apersorneqarnermini USA-p nunanut allanut tunngasunut oqartussaaffia Kalaallit Nunaannut, Canadamut kingusinnerusukkullu Gazamut annertusarneqassasoq præsidentip aalajangiusimavaa.

Isumaqatigiissutip atuuttup sinaakkutissai siammasissut

Præsidentip Kalaallit Nunaannik aqutsinissamik kissaateqarnera Naalakkersuisut siulittaasuannit Múte B. Egedemit (IA) ministeriunermillu Mette Frederiksenimit itigartinneqarpoq.

Donald Trumpip præsidentitut atuuffimini kingullermi Kalaallit Nunaata 2019-imi pisiarerusunnera siullermeerluni saqqummiuppaa.

USA-p Kalaallit Nunaanniinneranut tunngatillugu Danmarkip USA-llu illersornissaq pillugu 1951-imi isumaqatigiissutaasa sinaakkutaat siammasereerpoq.

Isumaqatigiissut naapertorlugu USA-p Nato-p ataani Danmark Kalaallit Nunaata illersorneqarnerani ikiortussaavaa, USA-llu Kalaallit Nunaanni sumiikkaluaruniluunniit isersinnaassaaq.

USA Pituffik Space Basemi maanna sakkutooqarfeqarpoq, tassanilu USA-p Danmarki Kalaallit Nunaallu apereqqaarnagit sakkutooqarfik annertusisinnaavaa.

Trumpip oqaasii tunngavigalugit Amerikamiut Kalaallit Nunaannik Danmarkiluunniit tiguaanavianngitsut Mette Frederiksenip januaarip naanerani oqaatigaa.

/ritzau/