KL

DK

Trumpi nalunaaruteqareersorlu Inatsisartuni ataatsimiititaliaq qisuariarpoq

Nunanut Allanut Sillimaniarnermullu Ataatsimiititaliap Naalakkersuisut siulittaasuat nunanut allanut sillimaniarnermullu tunngasunik matoqqasumik isumasioqatigiinnissamut qaaqquaa.

Inatsisartut nunanut allanut sillimaniarnermullu ataatsimiititaliaata siulittaasua, Pipaluk Lynge (IA), ataatsimiititaliaq tallimanngornermi isumasioqatigiinnissamut qaaqqusisimasoq ilisimatitsivoq.
Thomas Munk Veirum
Tusagassiortoq
Saqqummersinneqarpoq

Minitseriunerup Mette Frederiksenip Folketingimi ilaasortat USA-p præsidentinngortuanik Donald Trumpimik oqaloqateqarnini pillugu sisamanngornermi ilisimatippai. Trumpip Kalaallit Nunaannut soqutiginninnera oqaluuserisassaammat Naalakkersuisut siulittaasuat, Múte B. Egede (IA), oqaloqatigiinnerup kingorna ingerlaannaq ilisimatinneqarsimasoq aamma oqaluttuaraa.

Maanna Inatsisartut Nunanut Allanut Sillimaniarnermullu Ataatsimiititaliaani politikerit Donald Trumpip juullilernerani Kalaallit Nunaata USA-p isumannaatsuuneranut aalajangiisuulluinnarneranik oqariartuuteqarnerata kingorna pissutsit qanoq innerat pillugu aamma paasisaqarusupput.

Taamaammat ataatsimiititaliap Naalakkersuisut siulittaasuat nunanut allanut sillimaniarnermullu tunngasut pillugit aqagu tallimanngornermi matoqqasumik isumasioqatigiinnissamut qaaqquaa.

Naalakkersuisut siulittaasuata oqaaserisai taperserai

Taama ataatsimiititaliaq tusagassiuutinut nalunaarummi ilisimatitsivoq, tassanilu ataatsimiititaliami siulittaasup Pipaluk Lyngep (IA) erseqqissarpaa nunanit allanit Kalaallit Nunaat soqutigineqarnerujartuinnartoq.

- Nunanut Allanut Sillimaniarnermullu Ataatsimiititaliap taamaattumik erseqqissumik oqaatigerusuppaa partiit isumaqatigiissutaat tunuliaqutseramiuk Naalakkersuisut Siulittaasuatalu oqaatigeriigaa, ”Qallunaajorusunngilagut. Amerikarmioorusunngilagut. Kalaaliuvugut.” isumaqatigalugu.

Oqaluuserineqartussat mianernartuummata isumasioqatigiinneq matoqqasumik ingerlanneqassaaq.

Ataatsimiititaliap aamma Naalakkersuisut eqqaasippai:

- Naak siunersiuineq matoqqasumik ingerlanneqartussaagaluartoq Nunanut Allanut Sillimaniarnermullu Ataatsimiititaliap erseqqissarpaa Kalaallit Nunaata nunanut allanut sillimaniarnermullu tunngatillugu inissisimanera pillugu Naalakkersuisut Inatsisartunik tamarmiusunik ingerlaavartumik paasissutissiisarlutillu siunnersuisarnissaat pingaaruteqarmat.

- Naalakkersuisuutitaqartut kisimik Naalakkersuisunit paasitinneqaratik Inatsisartut tamarmiusut peqataatinneqartarnissaat aalajangiisuuvoq aalajangiinerit pingaarutillit pisariaqartumik tunngavissaqarluarlutik tapersersorneqarlutillu pisarnissaannut.

inuiaqatigiit inatsisartut donald trump mette frederiksen samfund naalakkersuisut

ATORFIIT Se alle jobs

Powered by Labrador CMS