Tuniluuttoqarnissaa pinngitsoortinniarlugu angerlarsimaffimmi ikiorteqarneq unitsinneqarpoq

Kommuneqarfik Sermersuumi angerlarsimaffimmi ikiorteqarfimmi saaluallaat ajornartorsiutaapput.

Tamanna Isumaginninnermut Suliffeqarnermullu Ataatsimiititami siulittaasup Inge Olsvig Brandtip (IA) kommunalbestyrelsip sapaatip-akunnerani kingullermi ataatsimiinnerani ima paasissutissiissutigaa:

- Utoqqarnik suliassaqarfimmit utoqqaat namminneq angerlarsimaffimminni najugallit angersimaffimmi ikiorteqartartut akornanni saaluallannik ajornartorsiuteqartoqartartoq naammattoorneqartarpoq, nalunaarummi allassimavoq, imalu nangippoq:

- Uumasunik ajoqutaasinnaasunik naammattuuinermi angerlarsimaffimmi ikiorteqartarneq unitsinneqarallartarpoq, uumasut akornutaasinnaasut angerlarsimaffinnut allanut tuniluutinnginnissaat pillugu.

Inissiaatileqatigiiffiup INI A/S-ip saaluallannik piiaaneq pingaartikkaa ilisimatitsissutaavoq, Inissiaatileqatigiiffiullu Iserit A/S-illu assinganik taamaaliornissaa Utoqqarnik suliassaqarfimmit neriuutigineqarpoq.

Ikiuinerit pisariaqartut unitsinneqassanngitsut

Angerlarsimaffimmi ikiorteqartarneq saaluallaat kinguneranik unitsikkallarneqarpat utoqqaat qanoq ikiorneqarumaarnersut, Sermitsiap kommuni aperaa.

Siusinaartumik pensionisiallit utoqqalinersiallilluunniit angerlarsimaffianni saaluallaqartoq sulisut maluginiarpassuk, innuttaasup atugai apeqqutaatillugit arlalinnik pisoqarsinnaasoq, Kommuneqarfik Sermersuumi Utoqqaat immikkoortortaqarfiani pisortap Karen Lund Mølgaardip Sermitsiamut allakkatigut akissuteqarnermini erseqqissarpaa:

- Siullertut saaluallaat innuttaasunut allanut tuniluutinnginnissaat qulakkeerniarlugu innuttaasoq angerlarsimaffimmini ikiorteqarunnaarsinneqarallartarpoq.

- Inuttaasulli atugai apeqqutaajuaannarput. Innuttaasut angerlarsimaffimminni ikiorneqarnissamik innersuunneqarsimappata ikiorneqarnissartillu pinngitsoorsinnaanngippassuk, taava ikiorneqarunnaarsitaassanngillat, pisortaq Karen Lund Mølgaard allappoq.

"Saliinertalimmik" misissortissinnaasut

Immikkoortortami pisortaq naapertorlugu innuttaasoq saaluallannik ajornartorsiummik aaqqiinissamut ikiorsiissutinik pisartagaqarnersoq innuttaasumik sullissisup misissussavaa. Aamma sullissisup innuttaasut ajornartorsiummik namminneq aaqqiisinnaanerat pillugu siunnersorsinnaavai.

Suliffeqarfik Arctic Cleaning Services saaluallannik misissuisinnaasoq Karen Lund Mølgaardip ilanngullugu oqaatigaa, utoqqalinersialinnullu saliinertalimmik misissuisoqarsinnaanerarpaa:

- Siusinaartumik pensionisiallit angerlarsimaffimminniittut pigisatik inigisatillu misissortissinnaavaat. Pigisat aalartinneqartarput, angerlarsimaffillu toqunartunik minguiarneqarsinnaalluni.

- Nakkutilliisoqarfik, oqartussat immikkoortortaqarfiat ACS-ilu isumaqatigiissuteqareerpata ullormi aalajangersimasumi saliisoqarsinnaavoq, tassani innuttaasoq uffassaaq, inissiaq pigisaalu salinneqassallutik. Tamatuma kingorna innuttaasoq angerlarsimaffimminut utertinnani najugaqarfigigallakkamiiginnassaaq, immikkoortortaqarfimmi pisortaq allappoq.

Innuttaq saliinermik aqqusaagaqassappat angerlarsimaffimmi ikiorti ikiuussinnaavoq, soorlu uffarnermut, atisanik nutaanik atisinermut inissinneranullu.