KL

DK

Ukiortaami oqalugiaat: Borgmesteri Avaaraq Olsenip ukioq 2025 nukittuutut takorloorpaa

Nuuk2035, mittarfissuup atulernera meeqqanut ilaqutariinnullu ukkatarinninneq Kommuneqarfik Sermersuumut piujuartussamik siunissaqalersitsivoq.

Tôrtia Reimer-Johansen
Journalist
Offentliggjort

Kommuneqarfik Sermersuumi borgmesteri, Avaaraq Olsen (IA) aappaluttumik taartumik annoraalerluni ukiortaami oqaluiarami 2024-imi pisimasunik kingumut qiviarpoq.

Taassuma innuttaasut kommunimilu sulisut sulissuarsimaneranut tunniussaanullu qutsavigai.

-  Ukioq 2024 pisoqarfiusimaqisoq qaangiuteriikatappoq ukiorlu pissanganartoq nutaaq 2025 appakaaffigaarput. Ukiut nikinnerini ileqqorisarparput pereersimasunik nalilersuissalluta pisussanullu aggersunut, inuunitsinni suliffitsinniluunniit allannguutissanik, siunnerfinnilluunniit nutaanik pilersaarusiussalluta, Avaaraq Olsen oqarpoq nangillunilu:

- Pisut qaangiuttut ineriartorfiusut unammillernartullu tamarmik alloriaqqinnissatsinnut ilinniutaallutillu siunissatsinnik ilusilersueqataasarput. Ukiullu nutaap aallartinnerani, takorluukkagut angorusutagullu, tamatigut ikummarissarneqartutut ittarput, – tassami ukiut nikinnerisigut piumassusermik nukissamillu nutaamik neriunnermillu tunineqarnermik misigiffiugajuttarput.

Borgmesterip ukiortaami oqalugiarnermini Nuuk2035-p saqqummiunneqarnera eqqaavaa, taannalu innuttaasunik, suliffeqarfinnik kattuffinnillu qanimut suleqateqarluni pilersinneqartoq oqaluttuaraa.

-  Taamaattumik pisariaqarpoq eqqarsaatigilluakkamik ataqqinnittumillu illoqarfiup ineriartorteqqinnissaa. Aatsaammi ataatsimut isiginnittumik aamma akuutitsisumik suliniuteqarnikkut ataatsimoortumik angusaqarsinnaavugut. Illoqarfimmi sukkasuumik ineriartorfiusumi innuttaasut kissaataat kommunip kisimi kivissinnaanngilai, ataatsimoorlutalu akornatsinni suleqatigiinnissarput pisariaqartipparput, taamaattumik innuttaasut soqutiginnittullu matumani peqataasutut imminnut takusinnaanissaat misigisimanissaallu pingaaruteqarpoq.

Mittarfissuaq takornariaqarnerlu

Nuummi mittarfissuup ammarneqarnera nunanut allanut qaninnerulertoq, ilanngullugu oqaatigaa.

-  Mittarfissuaq mittarfiinnaanngilaq nalinginnaasoq, pilersitaavorli nunatta politikkeeriisa namminneerlutik aalajangikkaminnik, Nunattalu siunissamut ilusilersorneqarnissaa tunngavigalugu nunarsuarmioqatigiinnut ammaassisuusoq. Takornariaqarnikkut, inuussutissarsiornikkut, timersornikkut kulturikkullu tikikkuminassuseq aallaavigalugu innuttagut piumassuseqarluarlutik inerisaaqataasut periarfissagissaarnerulissapput, ineriartornissamut nuna ataasiinnaq tunngavigiunnaarlugu, nunalli tamalaat akornanni alakkaamasaqarnerulernermik kinguneqartumik.

Meeqqanut ataatsimut isiginnittaaseq

Avaaraq Olsenip erseqqissarpaa kinguaariinni tulliuttuni tunngavissaqarluartumik pilersitsinissamut siusissukkut iliuuseqarneq ilaqutariinnillu qanimut suleqateqarneq pingaaruteqartut.

- Toqqissisimaneq, isumassuineq ataatsimoornerlu tassani qitiussapput, siusissukkullu iliuuseqartarnissaq annertuumik iliuuseqarfigineqassaaq, tassuunakkut ilaatigut meeqqeriveqarfiit atuarfiit isumaginninnikkullu neqeroorutaasartut aqqutigalugit, meeqqat siunissaasa pitsaasuunissaannik toqqammaveqarluarnissaannillu tunngavissiissalluta. Kommunitsinni meerartatta pitsaasumik meeraanissaannut tapersersuillutalu sapinngisarput tamaat qulakkeerinninniaqataassaagut ulluinnarni angajoqqaat, meeqqanik paarsisartut ilinniartitsisut, angajoqqaarsiat il.il. suleqatiginerisigut.

Avaaraq Olsen oqalugiaammini naggasiinermini oqaatigaa imminut piumaffigisinnaaneq tamatigut pitsaasuusoq:

- Asasakka innuttaasut. Maanna tassa ukiumut nutaamut appakaannitsinni ataatsimut siunnerfeqaqatigiilluta immitsinnut aallaavigaluta siuariartornissatsinnut nikeriarfissanngorpoq. Tamatta inuttut ataasiakkaatut imminut naalaarnissarput aammali piumaffiginissarput pisariaqarpoq.

kommuneqarfik sermersooq inuiaqatigiit samfund nuuk nytårstale avaaraq olsen

ATORFIIT Se alle jobs

Powered by Labrador CMS