KL

DK

Uppernarsaatit: Oqallinnermit oqaatigineqartut tamarmiusut

Aki-Matilda Høegh Damip Rasmus Jarlovillu oqallinnerat Folketingimi ilaasortap kalaallip Folketingip Siulittaasoqarfianut naammagittaalliutigisaa tamaat uani Sermitsiap saqqummiuppaa. Siulittaasoqarfiup maalaarut kinguneqartissanagu aalajangiuteqqammerpaa.

Rasmus Jarlovip Folketingimi oqallinnermi oqaasii Folketingip Siulittaasoqarfianut Aki-Matilda Høegh-Damip maalaarutigai
Saqqummersinneqarpoq

Folketingip ataatsimiittarfiani maajip 29-ani 2024-mi ataatsimiinnermi imaqarniliami ilaatigut ima allassimavoq:

»Nal. 22:43 Rasmus Jarlov (KF):

Qujanaq (kalaallisut, aaqq.) oqalugiaammut. Qallunaat kalaallillu oqaasii eqqarsaatigalugit marluinnik oqaaseqarninnut kalaallisut taama oqalussinnaatigaanga. Oqalugiaatip ilaa siulleq sooq Kalaallit Nunaat Danmarkimi Folketingimi marlunnik ilaasortaatitaqarnersoq apeqqummut tunngavoq. Kalaallit Nunaat Folketingimi ilaasortaatitaqarpoq 1380-imiilli Danmarkimut atagami, ullumikkullu Kalaallit Nunaat nammineq kajumissutsiminik kunngeqarfimmi Danmarkimiiginnarnissaminik aalajangermat. Nammineq kajumissutsimik aalajangerneq tunngavigalugu naammagittaalliortoqarsinnaanngissoraara.

Taamaattumik apeqqutip aappaa aamma tupigusuutigaara, tassa sooq Aki-Matilda Høegh-Dam issiaviit aappaanni issianersoq, issiavimmi Danmark pillugu ajortumik oqaaseqarnissamut kisingajammi atorneqartartoq isumaqarama. Sivisuumik oqalugiartoqarneranut, siullermik kalaallisut kingornalu Aki-Matilda Høegh-Damip ilitsoqqussaralugu oqaasii atorlugit danskisut oqalugiartoqarneranut, tusarnaarpunga, isumaqarpungalu Folketingimi issiaviit qanoq atorneqarnissaannik ersersitsisoqanngitsoq. Taamaattumik aperivunga maani Folketingimi suut pilersaarutigineqarnersut. Aki-Matilda Høegh-Dam Kalaallit Nunaannut sunik angusaqarusuppa?

[...] Nal. 22:44 Aki-Matilda Høegh-Dam (SIU):

Siullermik oqaatigeqqaartariaqarpara De Konservativenit kalaallisut oqaluttoqarnera tusaallugu nuannersuusoq. Tamanna tusarnerusinnaavarput. De Konservativenit apeqquteqartoq ilitsoqqussaralugu oqaatsikka suunersut pillugit isummiussereermat naleqqutinngilaq. Ilitsoqqussaralugu oqaatsikka qallunaatuujusut eqqortuunngilaq. Arfinillit/arfineq-marlunnik ukioqarlunga qallunaatut ilinniarsimagama, angajoqqaamma ilinniartissimammanga taamaattumillu qallunaatut oqalulluarsinnaagama nuannaarutigaara.

Kalaallit Nunaat nammineq kajumissutsiminik Danmarkimut ilaaginnartoq apeqquteqartoq aamma oqarpoq, immaqa oqalugiartoq oqalugiaatima ilaanut tusarnaarsimanngilaq, Kalaallit Nunaatami naalagaaffinngortinneqarnissaanik kalaallit inatsisartui ippassaq akuersisut oqaqqammerpunga.

[...] Nal. 22:45 Rasmus Jarlov (KF):

Siorna aasakkut Kalaallit Nunaanniikkama nunnaarutigeqisannik Fru Damip ilaqutai naapippakka. Ilaqutariit tamarmik Nuummi katersortarfimmi uannut apersuiartornerini oqaloqatigilluaqattaarpakka, taamaammat ilaqutariit taakku qallunaajulluinnartut nalunngilara.

Suli paasisinnaanngilara sooq Aki-Matilda Høegh-Dam Folketingimi issianersoq. Danmark pillugu ajortumik oqalunnissani pinerullugu? Maanimi issiavik atorlugu Kalaallit Nunaannut angusaqarniarnermik aalajangertoqarsinnaavoq. Illersornissamut tunngatillugu sumik kissaateqartoqarpa, inatsisinillu atuutsitsinermut tunngatillugu sumik kissaateqartoqarpa? Siunnersuutinik aalajangersimasunik peqarpa? Aki-Matilda Høegh-Dam tusarniaarusuttoq kisimi tusaavara. Allanik aamma oqaluuserisassaqassagaluarpoq.

[...] Nal. 22:46 Aki-Matilda Høegh-Dam (SIU):

Nuannaarutigaara De Konservativenit apeqquteqartartoq Kalaallit Nunaannut tunngatillugu malinnaanerujumammat. Tassa imaappoq, apeqquteqartartoq Kalaallit Nunaat pillugu ataatsimiititaliami ataatsimiititalianilu allani suliatsinnik malinnaanerusimasuuguni aamma ilisimasimassagaluarpaa, ilaatigut pineqaatissinneqarsimasunut inissiisarfinni nakkutilliisut naligiinnerusumik atugaqalernissaat sorsuutigisimagipput, aamma politiit naligiinnerusumik atugaqalernissaat qulakkeersimagipput, aamma ilaatigut kunngeqarfiup ilaani Kalaallit Nunaanni illersornissaqarnissaq qulakkeerniarlugu annertuumik sulissuteqarsimasugut. Tassami qallunaat suliassaq tamanna kisimiillutik isumagisinnaasimanngimmassuk, NATO-mik suleqateqarnerusariaqarsimavugut.«

Siuklittaasoqarfiup maalaarummik itigartitsineranut tunngavilersuutit atuakkit – una tooruk.

samfund inuiaqatigiit

ATORFIIT Se alle jobs

Powered by Labrador CMS