Utoqqaat angerlarsimaffii pillugit kommunalbestyrelsi oqallisiginnissaaq
Ullumi marlunngornermi juunip 25-ani Kommuneqarfik Sermersuumi utoqqaat inissiaataasa amerlanerulernissaat pillugu siunnersuut kommunalbestyrelsimut ilaasortap Peter Davidsenip saqqummiutissavaa. Kommunip utoqqartaasa 76 procentii Nuummi najugaqartut kisitsisit kingulliit takutippaat.
Utoqqaat illuanni utoqqaat
Assiliisoq: Leiff Josefsen
Kommuneqarfik Sermersuumi utoqqaat pisinnaanerusut inissaqartinneqarnerusariaqarput. Pisariaqartitsinerlu annertusiartorpoq. Kommunip utoqqartaasa 76 procentii Nuummi najugaqartut kisitsisit kingulliit takutippaat. Nuummi ukiut qulit ingerlaneranni utoqqaat 63 procentinik amerleriarsimapput, Ittoqqortoormiini 26 procentinik ikileriarsimasut, tamanna Isumaginninnermut Suliffeqarnermullu Ingerlatsiviup kisitsisaataasa takutippaat.
- Siullermik illoqarfiit pingaarnersaanni utoqqaat amerliartornerat inissaqarniarnikkut unammillernartuusoq misissuinerit ilisimasallu takutippaat, massakkullu iliuuseqarfiginngikkutsigu siunissami annertuumik utoqqarnut inissaqartitsiniarnikkut unammilligassat angummaffiginissaat qularutigaara – iliuuseqartariaqarpugut, utoqqarnut pisinnaanerusunut amerlanerusunik inissialiornissaq pillugu oqaluuserisassatut siunnersuuteqartoq Peter Davidsen (S) oqarpoq.
Utoqqaat illui tatineqartut
Kommuneqarfik Sermersuumi Suliffeqarnermut Isumaginninnermullu Ingerlatsivimmit akissut naapertorlugu utoqqarnik paaqqutarinnittarfinni, utoqqaat najugaqatigiiffiini kiisalu oqilisaassinermi inissaqassutsimik siunissami qanoq pisariaqartitsisoqarnissaanik naatsorsuuteqartoqarsinnaanersoq siulittorlugu naammattunik kisitsisaatigineqanngillat.
Taamaakkaluartoq utoqqaat 20-t sinnillit kommunimi utoqqaat illuannut oqilisaassussinermullu inissaminnik utaqqisut kisitsisit takutippaat.
Aamma Nuummi inunnut innarluutilinnut utoqqarnullu inissiat naleqqussakkat 133-upput, taakkunannga 65-it INI-meersuupput 68-illu Iserimmeersuullutik. Inissiaatileqatigiiffiit ukiut tamaasa inissiat qanoq inissisimaneri allanngortittarmatigit inissiat amerlassusaat allanngorartarput, ingerlatsivik ilisimatitsivoq.
paasissutissiisoq: Isumaginninnermut Suliffeqarnermullu Aqutsisoqarfik, Kommuneqarfik Sermersooq
Siunissami utoqqaat amerliartortillugit, utoqqaat eqqarsaatigalugit inissiat amerliartortinneqartariaqartut Peter Davidsen isumaqarpoq:
- Taakkununnga inissiat siunissami piareersimanngitsut aamma ilisimavarput, taamaammat Nuummi utoqqarnut pisinnaanerusunut inissialiornissaq piffissanngorpoq, allassimavoq.
Siunnersuummi ullumi marlunngornermi juunip 25-ani kommunalbestyrelsip ataatsimiinnerani oqaluuserineqartussami inissiat qassit pineqarnersut oqaatigineqanngilaq.
