UKIARISSAMMUT KATERSUINNEQ 2025
Utoqqalisunut nutaarsiassatsialanngorsinnaasoq: Suliffeqaannarit utoqqalinersiatillu pigiinnarlugit
Inatsisartut ilaasortaatitaat, Mariane Paviasen Jensen (IA) siunnersuuteqarpoq utoqqalinermi soraarnerussutisiat pigiinnarlugit utoqqalisut sulisinnaalissasut ilanngarteriffigineqaratik. Partiit akornanni annertuumik siunnersuut pillugu isumaqatigiittoqarpoq, kisianni qanoq piviusunngortinneqassanersoq assigiinngitsunik isumaqartoqarluni.
Kalaallit Nunaanni sulisussameertoqarpoq, taamaakkaluartoq utoqqalisut sulilu sulisinnaagaluartut allatut ajornartumik toqqaasariaqartarput, utoqqalinersiat imaluunniit sulinermi akissarsiat. Tamanna Mariane Paviasen Jensenip allanngortikkusuppaa, taamaalillutik utoqqalisut ilanngarteriffigineqaratik suliinnarsinnaanissaminnik toqqaasinnaalersillugit.
Asseq toqqorsivimmit: Leiff Josefsen
Siunnersuut pillugu partiit akornanni annertuumik isumaqatigiittoqaraluartoq, taamaattoq naalakekkersuisooqatigiit partiivini avissaartuunneqartoq takuneqarsinnaavoq, qanoq iliorluni qaqugulu utoqqalisut utoqqalinersiaqaatigalutik suliffeqaannarsinnaanerat pillugu.
Inuit Ataqatigiit, Siumut aamma Naleraq kissaateqarput Naalakkersuisut utoqqaat utoqqalinersiallu pillugit iluarsaassinera utaqqinagu, kisianni 2026-imi inatsit allanngortinneqassasoq, innuttaasut utoqqalinersiallit suliffeqarnermi peqataasinnaanissaat tamakkiisumik utoqqalinersiaqarlutik aqqutissiuunneqarusulluni, maannakkutut periuserineqartoq atorunnaarsillugu, ullumikkummi utoqqalisut suligaangamik pisortanit utoqqalinersiaat ikilisarneqartarput isertitaat apeqqutaallutik.
- Kisianni piviusuuvoq nunarput sulisinnaasunik amigaateqartoq, tamatumalu peqatigisaanik utoqqalinersiallit amerlasuut sulisinnaagaluarlutik utoqqalinersiat kisiisa isertitarisariaqartarpaat saniatigut sulissagunik utoqqalinersiaminnik ilanngarteriffigineqartaramik. Massa utoqqalisut ikigisassaanngitsut sulinermi suli peqataarusukkaluartut, siunnersuuteqartoq Mariane Pavisen Jensen (IA) oqarpoq.
- Misissuinerillu ingerlanneqareernikuupput tamanna pissappat qanoq aningaasatigut kinguneqassanersoq, tassa utoqqalinersiat imaluunniit suliffimmi peqataaneq arlaat toqqanngikkaluarlugu suliinnartoqarsinnaappat, taava inuiaqatigiinni sulisinnaasut amerlanerulissapput, tamannalu pisariaqartipparput.
Naalakkersuisut immikkut ilisimasalinnik misissuisitsineq siulliukkusuppaat
Naalakkersuisulli akipput siulliullugu misissuititat immikkut ilisimasallit sulisinneqaqqaartariaqartut innersuussuteqaqqaartariaqartullu:
- Ilanngullugu nassuiaammi takuneqarsinnaavoq, toqqammaviusumik aningaasartanut aamma utoqqalinersianut tapinut appariartuaartitsinissamut periaatsit peerneqarpata, tamanna piffissami 2025-2050-mi ukiumut 79-118 mio. kr-inik saniatigut akeqassasut, Naalakkersuisut ilaatigut akissuteqarput ilanngullugulu erseqqissaatigivaat, utoqqalinersianik appariartuaartitsinissamut periaatsit atorunnaarsinneqarpata pisuunerpaanik aningaasarsiaqarnerpaanillu kisimi iluaqusiissasoq.
Taamatuttaaq Naalakkersuisut erseqqissaatigivaat tatiginnillutik immikkut ilisimasallit soraarnerussutisiaqarnermut aaqqissuusseqqinnermut ataatsimoortumik sinaakkutit allaatigineqartut iluanni
inassuteqassasut, ilaatigut sivisunerusumik suliffeqarnermiiginnarnissamut aningaasaqarnikkut kajuminnarnerulersillugu.
Siunnersuut ilaqutariinnut peqqissutsimullu ataatsimiititaliamut ingerlateqqinneqarpoq, taamaalillutilliu Inatsisartut allannguisoqarnsisaanik aalajangiisinnaapput, taamak piumasaqassappata 2026-imi atuutilersinnaasumik.
