KL

DK

Watsonip eqqartuussissuserisua: Ministereqarfik aalajangiiliivippoq

Arfernik illersuiniap Paul Watsonip tunniunneqarnissaanik japanimiut kissaateqarnerat Inatsisinik atortitsinermut ministereqarfiup akuerissanerlugu sapaatip-akunneri marluk iluini aalajangerniarpaa. Watsonip eqqartuussissuserisua naapertorlugu ministeriaqarfik taama ilisimatitsivoq.

Paul Watsonip iperagaanissaa pillugu eqqartuussineq ataasinngornermi decembarip aappaani Nuummi ingerlanneqaqqissaaq. Asseq una oktobarimeersuuvoq.
Ritzaus Bureau
Saqqummersinneqarpoq

Ullut 14-it tulliuttut ingerlaneranni Watson Japanimut tunniunneqassanersoq aalajangerneqassasoq naatsorsuutigineqartoq, Julie Stage, arfernik illersuiniap Paul Watsonip eqqartuussissuserisua, Inatsisinik atortitsinermut ministereqarfimmit ilisimatinneqarsimalluni oqarpoq.

Paul Watson juulimili Nuummi parnaarussivimmiippoq.

2010-mi Sikuiuitsumi kujallermi pisimasoq pissutigalugu Japanip tunniunneqassasoq eqqartuunneqassasorlu piumasaraa.

Japanimi oqartussaasut naapertorlugit tassani Watsonip arfanniut ajoquserlugulu, Japanimiunik arfernianik akornusersuisimallunilu inuttaq ataaseq ajoqusersimavaa.

Watson Canadamiuullunilu Amerikamiuusoq pisuunnginnerarpoq.

Paul Watson tunniunneqassanersoq tunniunneqassannginnersorluunniit aalajangerneqartinnagu Inatsisinik atortitsinermut ministereqarfik paasissutissanik amerlanerusunik Japanimit piumasaqarsimanerarsimasoq, Julie Stagep aamma oqaluttuaraa.

Inatsisinik atortitsinermut ministereqarfiup tunniussinissamik aalajangiiniarnermini Kalaallit Nunaanni Politiit aamma Naalagaaffiup unnerluussisussaatitaa isumasioqqaarpai.

Paul Watsonip tunniunneqarnissaa tunngavissaqartoq, taavalu taanna eqqartuussivimmut suliassanngortitsinissamut periarfissaqartoq, Inatsisinik atortitsinermut ministereqarfik naliliivoq.

Paul Watson Nuummi pineqaatissinneqarsimasunut inissiisarfimmiiginnassanersoq ataasinngorpat Nunatta Eqqartuussiviani eqqartuussisoqassaaq.

/ritzau/

samfund inuiaqatigiit

ATORFIIT Se alle jobs

Powered by Labrador CMS