Watsonip illersuisui piumasaqarput uppernarsaatit saqqummiunneqassasut

Eqqartuussivimmi eqqartuussisarfik ini mikisoq, tusagassiortunik inunnillu nunanit allaneersunit Paul Watson-ip tapersersortigisaanik ulikkaavippoq, Paul Watson-ip siunissaa qaninneq ullaap tungaani aalajangiiffigineqartussanngormat.

Illersuisut kingumut piumasaqarput uppernarsaatissanik saqqummiussisoqassasoq. Taakku isumaat naapertorlugu uppernarsaatini taakkunani uppernarsarneqassammat Japan pissutissaqanngitsoq Paul Watson sassartissallugu.

Kisianni eqqartuussisoq videoliamik takutitsinissamut akuersivoq. Videoliarli taanna tassaavoq Japanimiit umiarsuarmik arfanniartartumit immiussaq, Japanimiullu Paul Watson-imut suliassami uppernarsaatitut atorneqartoq.

Umiatsiamit pullattakkamit videoliaq takutinneqarusukkaluarpoq

Paul Watson-ip illersuisui naammagittaalliuuteqarput videoliaq umiatsiamit pullattakkamit immiussaq takutinneqarsinnaanngimmat. Illersuisoq Jonas Christoffersen, eqqartuussivimmi najuulluni illersuisuuvoq, taassuma Watsonimik illersuisut allat peqatigalugit eqqartuussut Nunatta Eqqartuussivianut ingerlateqqippaat:

- Isumaqarpugut videoliat pineqartut takutittussaagaat, pingaarnerpaamik pisoq, tassa inuk ajoquserneqarsimasoq, qaartartoq tipittuliortartoq umiarsuarmut igeriunneqarmat, taanna umiarsuarmi sumiiffimmiinngitsoq uppernarsarneqassaaq, taannalu videoliami takuneqarsinnaavoq, taannalu eqqartuussivimmi takuteqqusaanngilarput, ilimagilluinnaraluarparpummi eqqartuussisup videoliaq takuguniuk, taava eqqartuussisup takusinnaassavaa pisoq Japanimiut oqaatigisaattut ingerlasimanngitsoq, taamaalillunilu eqqartuussivitsigut suliassaqanngitsoq.

Taamaattumik videoklipi pineqartoq suliap inerneqarneranut pingaaruteqarluinnarsorivarsi?

- Aap, taama isumaqarpugut. Isumaqarpugut videoklipi, umiatsiamit pullattakkamiit assilineqarsimasoq, qaartartoq tipittuliuut umiarsuarmut igeriunneqarmat, pingaaruteqarluinnartuusoq, igeriussinerup assilinerani susoqarpiarsimanersoq takuneqarsinnaavoq aammalu umiarsuaq tunuatungaani takuneqarsinnaalluni, tassanilu takuneqarsinnaavoq igeriussiffigineqartoq inoqanngitsoq aamma ajoqusertoqanngitsoq, massa Japaniumiut taamaanneraagaluartut. Video pileqartoq tamanit takuneqarsinnaanngorlugu saqqummiunneqarnikuuvoq...

Kisianni kikkut tamarmik takusinnaasimappassuk ilissinnut sooq taama pingaaruteqartigaa eqqartuussivimmi taanna videoliaq takutissallugu, tassami tamanut siammarneqareermat?

- Tassunga pissutaavoq eqqartuussiviup naliliiffigisussaavaa inuk pineqartoq pasillissallugu tunngavissaqartoqarnersoq, uagullu oqaatigaarput pasilliuteqarnissamut pissutissaqartoqanngitsoq, tamannalu videoliap takutissinnaavaa, Jonas Christoffersen Sermitsiamut nassuiaavoq.

Japanimiut videoliaata eqqartuussivimmi takutinneqartup saniatigut Watsonip illersuisuisa video takutikkusutaraluartik - maannamulli inerteqqutaagallartup - Sermitsiamut nassiuppaat.

Illersuisut Jonas Christoffersen aamma Nunatta illersuisuunera Finn Meinel, Paul Watsonimut ullumi eqqartuussivimmi illersuisuupput.

Unnerluussisuuneq: Uppernarsaatit qallorneqartinnagit aalajangiisoqareertariaqarpoq

Videoliaq eqqartuussivimmi takutinneqartoq tassaavoq japanimiut uppernarsaataat, Watsonillu uppernarsaatiginngisaa.

Aamma videoliamik takutitsineq sioqqullugu, unnerluussisussaatitaasut pisortaat  akerliliigaluarpoq dommeri pisinnaatitsimmat videomik takutitsinissamut, taamaattorli dommerip aalajangiusimaannnarpaa videoliaq aalajangersimasoq takutinneqarsinnaasoq.

Kisianni sooq unnerluussisussaatitaasut illersuisullu videolianik takutitsinissamik isumaqatigiinnginnerat taamak annertutigiva?

- Tamanna pissuteqarpoq unnerluussisussaatitaasunit isumaqaratta, uppernarsaatit eqqartuussivimmut qallornissaat pissusissamisuussanngitsoq aalajangiisoqarsimatinnagu, Kalaallit Nunaanni unnerluussisussaatitaasut pisortaat Mariam Khalil akivoq nangillunilu:

- Assersuutigineqarsinnaavoq tillinniartoqarsimappat videoliuutitigullu tamanna immiunneqarsimappat, taava illersuisut videoliaq tusagassiorfinnut tamanullu agguaannavianngilaat, tamannami aatsaat pisinnaammat eqqartuussinermi isumaqatigiinniarnerit ingerlanerini.

Alloriarnerit tulliit suuppat?

Videoliamik takutitsineq takutikkumanngikkallagaqarnerlu qanorluunniit pigaluarpata, maanna Paul Watson pineqaatissinneqarsimasunut inissiisarfimmut Nuummiittumut utertinneqarpoq. Tassaniitinneqalerporlu ulloq tigusarineqarfimminiit, tassa juulip 21-anniit.

Maanna unnerluussisussaatitaasut ilalerneqarput pineqartup tigummigallagaanera sapaatip akunnerinik sisamanik sivitsorneqassasoq , taakkulu sapaatip akunneri pisariaqartinneqarput.

Aappassaa tigummigallarneqarnerup sivitsorneqarnera maanna killiffigineqarpoq, sulilu sivitsueqqissinnaanissaq periarfissaalluni, piffissaq qanoq sivisutigisoq pisariaqartinneqarpa pineqartormi  pineqaatissinneqarsimasunut inissiisarfimmiitinneqarmat?

- Suliaq ilungersunartuuvoq, tamannalu isumaqarpoq justitsministeria aalajangernissaminut pitsaasumik aalajangiinissamut tunngavissiuunneqarnissaa pingaaruteqartuusoq. Paul Watsonimummi sunniuteqangaatsiassaaq, Japanimut tunniunneqassappat. Taamaattumik isumaqarpunga piffissaq pisariaqartinneqartoq tamarmi atorneqartariaqartoq.

- Maanna justitsministeriamiit misissuinissamik suliakkerneqarnerput tunngavigalugu sulivugut, tassani ataasinngornermi kingullermi suliakkerneqarpugut, kisianni utaqqisariaqarsimavarput Watsonip illersuisuisa tikinnissaat, taamaalilluta aamma Watsonimik apersuinissarput suliarisinnaajumallugu. Paasissutissat tamarmik qulakkeerniartariaqarpavut, Japanimeersut aammalu illersuisunit. Maanna piffissaavoq Watson Japanimut tunniunneqassanngitsoq isumaqarsimagaanni. Misissuineq pitsaasoq pisariaqarpoq taannalu piffissamik atuiffiusariaqarpoq.

Watsonip paarnaarussaaqqanerata sapaatip akunnerinik sisamanik ilaneqarnerata malitsigisaanik sorpiaat suliarineqassappat?

- Misissuinerit ingerlatileruttorpavut, aallarniutigaarput pineqartup killisiorneqarnera, taava uppernarsaatinik katersivugut, videoliat suliamut attuumasut tamaasa pissarsiaraagut suliamullu pingaarutillit paasissutissat katersorlutigit. Taakku tunngavigalugit nalunaarusiussaagut justitsministeriamut, nalunaarusiarlu maanna suliarileruttorparput. Oqaatigineqareersutut suliaq pineqartoq ilungersunartuuvoq, taamaattumik piffissamik atuiffiuvoq, naatsorsuutigaaralu sapaatip akunnerata ataatsip marlullu akornanni oqaaseqaasiatsinnut suli piffissaqassasugut, tamatumalu kingorna oqaaseqaat  justitsministeriamut nassiussinnaassallutigu. Kingorna justitsministeriap aalajangiiffigissavaa qanoq suliaq inerneqassanersoq, unnerluussisuuneq Mariam Khalil Sermitsiamut.