ROYAL GREENLAND

Amigartooruteqartoqartillugu aqutsisut ajunngitsorsiassarsisarnerat unitsinneqarpoq

Ukiuni amigartoorfiusuni Royal Greenlandip pisortaanerisa bonusisisarnerat unitsinneqassaaq. Ingerlatseqatigiiffiup siulersuisuisa siulittaasuat Maliina Abelsen erseqqissaavoq.

Siulersuisuni siulittaasoq Maliina Abelsen oqaluttuarpoq, Royal Greenlandimi naatsorsuutit amigartooruteqarneranni bonusisitsisarnerit unitsinneqassasut.

PISARTAGAQARTUNUT

Allaaserisaq una Nutaarsiassaqartitsivimmi aviisit naqitat ilaanni allaaserisaavoq.

Allaaserisat pisartagaqartunit siunissami taamaallaat atuarneqarsinnaajumaassapput.

Atuarluarna.

- Isumaqarpugut naatsorsuutinik 200 millionit sinnerlugit amigartooruteqarneq pitsaanngitsoq, taamatuttaaq tamatuma qaavatigut ingerlatseqatigiiffimmi aqutsisut bonusinik pissarsitinneqarnerat pitsaanngitsoq, massa ingerlatseqatigiiffik ingerlanerliortoq, Sermitsiamit apersorneqarluni Maliina Abelsen oqarpoq .

2023-mi akileraarutit ilanngaatigereerlugit 211 millionit koruuninik amigartooruteqarneq ilisimaneqalereersoq, Royal Greenlandip pisortanut millionilikkaanik bonusisitsinik tunniussisoqarpoq. Sermitsiami sapaatip akunnerata siuliani allaaserisami “Royal Greenlandimi ajunngitsorsiassarsinersuaq”-mi pisortat akissarsiaasa annertuut pillugit allaaserinnittoqarnera, aalassatsitsivoq.

Royal Greenlandip ataatsimeersuarnerani tallimanngornermi kingullermi pisumi Naalakkersuisut siulittaasuat, Mute B. Egede, erseqqissaavoq Naalakkersuisut kissaatigigaat “siulersuisut unitsittariaqaraat aaqqissuussinerit taamaattut nutaamillu akissarsianut tunngatillugu periaaseqartoqartariaqalersoq”.

- Isumalimmik siunertaqanngilaq

Royal Greenlandip siulersuisuunerinit qisuariaat maanna takkuppoq.

- Amerlanerpaat akornatsinni paasiuminaatsorujussuuvoq, taamak annertutigisumik akissarsiaqartitsinerup qaavatigut ajunngitsorsiassaqartitsisarneq, pingaartumik naatsorsuutit amigartooruteqartillugit. Tamanna isumalimmik siunertaqanngilaq. Aamma uagutsinnut. Taamaattumik siulersuisut aalajangiuppaat siunissami bonusisit tunniunneqassanngitsut, naatsorsuutini amigartoorfiugaangata, tassa sinneqartoortoqanngikkaangat. Tamanna nutaajuvoq Royal Greenlandimut, kisianni aalajangiunneqarpoq 2023-mi suli naatsorsuutit inerneri saqqummiunneqanngikkallarmata. Taamaattorli suliunnaarnermut atatillugu isumaqatigiissuteqartoqartassaaq, Maliina Abelsen oqarpoq.

Sapaatip akunnerata siuliani Sermitsiaq allaaserisaqarnermini allappoq 2023-mi pisortaaneq Susanne Arfelt Rajamand 8,1 millionit koruuninik katillugit akissarsitinneqarsimasoq. Taakkunannga 3,0 millionit bonusitut 5,1 millionillu akissarsiatut aalajangersimasutut. Naatsorsuutini tamanna takuneqarsinnaavoq.

- Kisitsisit ilumoorput, kisianni taakku bonusitut tunniunneqartut naatsorsuutit inernerannut attuumassuteqanngillat, Royal Greenlandimi siulittaasoq oqarpoq.

Millioninik bonusi qulakkeerneqarpoq

Maliina Abelsen nassuiaavoq, Susanne Arfelt Rajamand 2023-mi 1 million koruuninik aalajangersimasumik, tamatumalu qaavatigut 2 millioner koruuninik ajunngitsorsiassaqartinneqartoq atorfinitsinneqarnerminut tunngassuteqartumik, tassa sign-on fee-mik pineqartartumik, imaluunniit atorfinitsitsinermi ajunngitsorsiaritinneqartutut taaneqarsinnaasumik.

- Susanne Arfelt Rajamand 2023-mi naatsorsuutit tamakkiisut pillugit akisussaatissinnaanngilarput, tassami ukioq tamaat sunniuteqarsinnaanngimmat, tassami ukioq tamakkerlugu atorfeqarsimanngimmat, taamaattumik isumaqatigiissutigineqarpoq atorfinitsitaanermini 2023-mut millionimik ataatsimik bonusisassasoq, siulittaasoq oqarpoq.

Royal Greenland Susanne Rajamand pisortatut isumaqatigiissuteqarfigaa 2022-mi.

Arsaattartumik pisisoqartarneratut assersuunneqarsinnaavoq

- Susanne Arfelt Rajamand-imut sign-on fee-mik sooq tunniussivisi?

- Singaporemi atorfigisimasaanit kaanngartissallugu taamak akiliisimavugut. Immuliorfimmi Fonterra-mi pisortatut atorfeqarneraniit pisiaralugu akiliuteqarpugut. Akiliut taanna tassaavoq, taassuma siornatigut atorfeqarnermini pissarsiarisimasaata matussuserneqarnerata naleqataa. Arsaattartut pisiarineqartarneratut periaaserineqartoq assersuunneqarsinnaavoq. Akiliut taanna 2023-mi Royal Greenlandip sinneqartooruteqaraluaruniluunniit amigartooruteqaraluaruniluunniit taamaaginnassagaluarpoq, Maliina Abelsen oqarpoq.

Maliina Abelsen aamma erseqqissaavoq, allaaserisami siusinnerusukkut apersorneqarnissani kissaatigisimassagaluarlugu, kisianni attavigineqarsimannginnerarpoq.

- Ajuusaarpunga, RG-p aaqqissuussaaneranit oqaatigineqarsimappat apersorneqarnissara kissaatigisimanngikkiga. Tassami paarlattuanik kissaatigisorujussuuara Royal Greenlandimi ammasuunissarput qulakkeersimassagipput, siulersuisut akisussaaffigisaannut tunngatillugu siulersuisuni siulittaasutut oqaaseqartarnissara pingaaruteqarpoq.

Powered by Labrador CMS