Aqqusaartut misigisalikkersaarutaat

95-inik ukiullip Svend Petersenip ullorsiutai ukiunik 36-nik pisoqaassusillut AG-p aviisimi kingullermi (AG nr. 43) saqqummertumi allaaserai. Ullorsiutaasa akornanniipput allattaaviit aqqusaartut misigisalikkersaarutaannik imallit. Allattaaviinni angisuuni tungujortuni, nungullalaarsimasuni, unikkaarut siulleq ukiut 36-t matuma siorna 1988-imi allataavoq.

Inuulluaqqussutit naatsut, qujassutit pinngortitamilu misigisat assigiinngitsut, soorlu nunap sajunnera uumasumillu perngarnerit aqqusaartut misigisalikkersaarutaasa, Svend Petersenip ukiorpassuani toqqoqqasimasaani, ilagaat.

Svendimiit allakkat

- Piffissanngorsorigakku, ukulu oqaluttuat aviisini naqinneqarnissaat pingaartikkakku, Svend Petersen tusagassiorfimmut sapaatip-akunnerata siuliani ullorsiutimi allattaaviillu misigisalikkersaarfiit tunniukkiartornerani oqarpoq.

Aqqusaartut misigisalikkersaarutaat illuaraani Nuup kangerluaniittumi Natsilimmi ukiuni 40-ngajanni allaffigineqarsinnaalutik uninngasimapput. Svend Petersenip illuaraa angalasunit aqqusaartunit tamanit ukiorpassuarni atorneqarsinnaasimavoq. Svend Petersen 1992-ip tungaanut kisimi allattarsimavoq.

Allakkaangamilu silap qanoq innera eqqaajuaannarlugu. - 27/5-88. SVP. Ullut marluk maaniippugut torsuusaliorpugut. Sila atoruminarpoq pujorlunilu avannaannguarluni.

- 7/11-88. SVP. Puisinut qassutit suliarineqarput. Aqissillu 6 pisarineqarlutik. Silageqaaq allaaqqillunilu issililerlunilu.

- 2. juni 1988. SVP. Unnuiartorpugut aqagumut suaat unittussaammata. Atuaajartorluta ajorpatalu qassutit piiartussaavagut.

- Ullaakkut iterpugut sila tujorminaqisoq, avannerujussuarluni nittaalaq imaliliorluni. Suna qaammataatinneramiuk.

Aqqusaartut allattaaviat qupperaqqippara.

Inuit allat 1992-imi allattalerput. Sila, pisatik misigisatillu pillugit aamma allattarput. Angummik qajartortumik titartagartalik ingerlaannaq soqutigiummerpara.

- 11/6-1994. Ulloq seqinnerpoq. Kisianni kujasimmik anoreqaraluarpoq sukkut tamaana sakkortusillattaalluni, taamaattormiaasiit nuannisaarnaqaaq. Qaannamik angalaarluni ila nalissaqanngilaq, Nuummiit Ilulissanut qajartorniaq. PS. Kaagimut qujanaq. Wow, eqqarsarpunga. Nuummiit Ilulissanut toqqaannartumik uuttortaraanni ungasissusaa 560 kilometerit missiliorpaa.

Tuluk misigisassarsiortartoq Mike Keen, Qaqortumiik Qaanaamut qajartornikoq eqqaavara. Taannamaa angalanermini kalaaliminiinnarnik nerisaqarniarluni pilersaarnikoq. Kaar, takorluulaaruk nunami kusanartorsuarmik qajartorluni imaannaanngippasik, eqqarsarpunga qupperaaqqilerlungalu.

Spiderman

Arnarpassuit anguterpassuillu aqqusaartut allattaaviannut naatsunnguanik allattarlutillu oqaluttuaminnik allattarsimapput. Ilaasa allattaaviit Svend Petersenimut qujassuteqarlutik allaffigisarpaat, allat misigissutsitik pillugit allattaaviit aniatitsiffigisarlutik.

Soorlu una angut:

Illuaraq perngaammik aqqusaarpaa. Aappaa Nuummi meerartaaqqammersoq.

Allamik arnamik najorunnaarsimasaminik meeraqarfeqarluni allappoq.

- Inooqatigiinneq aserorfinngorpoq. Inuttut ingerlariaqqiffissanngorpoq. Aalajangerneq imaannaanngitsoq, allappoq.

Inooqatigiikkunnaarnermiit ullut ingerlapput; ukiut aamma ingerlapput.

Angutip arnaq ukiut 25-t matuma siornatigut naapissimasani ujarniarlugu. Arnaq nunaqarfimmi najugaqartoq sivitsunngitsoq paasivaa. Ullut ilaanni sulitilluni arnap nunaqarfigisaanut orsussamik pajuppoq. Qanoq iliussanerluni naluaa. Oqaloqatigissavaa? Qanoq oqassava? Arnaq inooqateqarnersoq ilisimanngilaa, aamma oqarasuaataata normua naluaa.

Nunaqarfimmiit ingerlaqqitsinnani allakkanik nunaqarfimmiumut tunniussivoq. Arnaq attaveqarfigeqqilerpaa asannilersoorlutillu.

Arnaq meeqqanik paarsisartuusoq sivitsortumillu aappaqanngitsoq kingorna paasivaa.

- Arnaq inuuserissuuvoq. Kisimiimmallu meeqqat aperisarsimavaat: ”Naammi illit angutaatit?”. Arnap nalunngilaa meeqqat Spiderman nuannarigaat. Meeqqallu akisarsimavai Spiderman angutaatigalugu, angut allappoq allatamilu eqqaanut qungujuttumik titartaalluni.

Piffissaq sivisunngitsoq qaangiuttoq arnaq nunaqarfimmut tikeraarpaa. Pisiniarfimmukarujoortilluni meeqqat arnap paarisartagai naapippai.

- Meeqqat tunginnut suaartaatilerak: Spidermaan! Spidermaan! Inequnarrativillutik. Peqqusiileqiummilaarpunga, nuannersumik, allappoq.

Maanna najorput, arnarlu allaaserisaa Nuummut erniartorluni meerartaaqqammerpoq.

- Uannut peqqinnaqaaq.

- Illuaqqamik piginnittoq qutsavigerusuppara. Inuttaa ataqqinarsili. Sunniuteqarsimaqaatit. Qanortoq ilaqutaasa ingerlateqqissagaat. Illuaqqallu peqqussutai ataqqillugit.

Qungujulallunga aqqusaartut allattaaviat qupperaqqilerpara. Taannalu soqutiginarsigaluttuinnarpoq.

Pernarneq nunallu sajunnera

Illuaqqami eqqaanilu inuit namminneq misigisaat allat allattaavimmi aamma allaaserineqartarput. Illuaraq silarlutsillugu oqquiffissaqqissimaqaaq.

Arnap ukiut 24-t matuma siorna allassimasup misigisimasaatut. ”Silagissuugaa ippassaq maanga pivugut. Unnukkut sialussualermat tupersinnaannginnatta maanga illuaqqamut inissilaarpugut. Qujanaqaarlu. Taqqama anori sialuk. Tuperfigalugu tujorminarunaqaaq. Qujanaq illuaqqamiinnitsinnut.”

Aqqusaartut allat pinngortitap peqqarniissinnaanera aamma misigisimavaat.

”Arfininngorneq 12. juni 1997. Ullumikkut siallerpoq (siallerunnaartarlunilu). Qulingiluanngoriartortoq makippunga, ullaaq arfininngoriartortoq nuna sajukkami. Natsilimmut ullut marluk matuma siorna tikippugut, aatsaavissuarlu takullugu nuanneqaa. Naamik illoqarfissuagut! Natsilik silaannareqaaq, silagittarlunilu (seqinnertarlunilu siallilertarpoq). 14. juli akianut aalisariaraluarpugut, John susaarpoq. Nallin! Silaasit siallerpoq.”

Angut alla, D-mik imminut taasoq, tuttumik perngarnilersaarpoq.

D ikinngutinilu illuaqqamut arfininngornermi juulimi 2002-mi apuuteqammerput. D-p tuttumik perngarnissani siunertaraa.

- Ukiut qulit qaangiupput kingullermik maaniikkama, allappoq.

”Takusarput eqqaakkaluarakku sukkavallaarmat qimaasoorutigaara. Sangatak!”

Ullut ingerlapput.

”Sisamanngorneq 18. juuli 2002.

Ullukkut kangiatungitsinnut tuttunik alakkarterigaluarama soqanngilaq. Uterlunga qinngutinik kuup akiani tuttu takugakku ilakka oqarfigeriarlugit alakkarpara. Kiisamilu ualigaa tallimap missaani perngallarlunga. Nammineq aattorpara. Pisaqarluni sunaana misigisaq taama nuannertigisoq. Aa nuan. Hep hep hurraaaa...”

Aqqusaat allattaaviat ilivara, misigisalikkersaaruterpassuillu eqqarsaatigerusaarlugit. Inuppassuit illuaqqami tassani unnuinikut tamarmik oqaluttuassallit eqqarsaatigaakka. Arnat, angutit meeqqallu illuaqqamiinnerminni nuannersunik puiunaatsorsisimasut, innarfissaqartinneqarlutillu. Svend qujanaq.