Kilisaatinik tunisassiorfimmillu piginnittoq Hanseeraq Enoksen Aalborgimi Danfiship nittarsaassinerani ulluni kingullerni ulapippoq. Nittarsaassineq sisamanngormat naammassisoq Sisimiuni Angunnguaq A/S-imeersunit peqataaffigineqarpoq.
Kilisaatini tunisassiorfimmilu atortussanik pisiniartoqarluarpoq.
Kilisaatinik tunisassiorfimmillu piginnittoq Hanseeraq Enoksen Aalborgimi Danfiship nittarsaassinerani ulluni kingullerni ulapippoq. Nittarsaassineq sisamanngormat naammassisoq Sisimiuni Angunnguaq A/S-imeersunit peqataaffigineqarpoq.
Kilisaatini tunisassiorfimmilu atortussanik pisiniartoqarluarpoq.
Hanseeraq Enoksenip nittarsaassinermi aningaasat qanoq amerlatigisut atorsimanerlugit oqaatigiumanngilaa, aningaasalli ikittuinnaanngitsuusut oqarpoq.
- Suliffeqarfipput angisuujuvoq arfinilinnik umiarsualik, tunisassiorfilik namminerlu amutsivilik. Taamaammat pisiassarpassuaqarpugut.
- Taamaaliortuaannarpugut. Aallartinnanga pisariaqartitavut allattorlugit piareersarluartarpunga. Taava tunisassiortut nittarsaassinermi qanimut naapillugit isumaqatiginiartarpakka. Nittarsaassinermut atatillugu immikkut ittunik neqerooruteqakkajuttarput - taamaammat pisiniarfissatsialaasarluni.
Siunnersuutitsialak
Hanseeraq Enoksenip kalaallit aalisarnermik inuussutissarsiutillit taamaalioqqullugit kaammattorpai.
- Nittarsaassinermut peqataanissamut pilersaarusiorluarluni pisariaqartitat ilisimanissaat pingaaruteqarpoq. Taamaalioraanni aalajangersimasunik anguniagaqarluni isumaqatigiinniartoqarluarsinnaammat.
- Ukioq manna pilersaarutaasumit aningaasanik atuinerunerput nassuerutigisinnaavara, tamannali isumakuluutiginngilara ukiorpassuarnimi niuernermik suliaqartuugama - neqeroorutit pitsaasuunersut nalilersinnaasarakkit.
Hanseeraq Enoksen Danfishimi peqataajuaannarpoq.
- Pilersuisut suleqatillu naapittarnerat uannut pingaaruteqarpoq. Isumassarsiffiginiarlugit aammali niueqatiginiarlugit. Aalisarneq ineriartortuarpoq, taamaammat unittoorata nutaarsiassanut ammasuusariaqarpugut. Nittarsaassineq isumassarsiarpassuarnik pissarsiaqarfiuvoq – aamma pilersuisut qanimut naapinnerat pitsaasunik neqeroorutinik pissarsinissamut ajornannginnerulersitsisarpoq.
Kalaallit Nunaat ukkataralugu
Nittarsaassisut aamma naammagisimaarinnipput.
- Ingerlalluartoq isumaqarpunga, Qalut Vóninimeersoq Cuno Jensen oqarpoq.
- Vóninimi suliffeqarfiit allat peqatigalugit nittarsaassisarnikuugaluarpugut, ukioq mannali Kalaallit Nunaanni immikkut ittumik saqqummersitsisarfiusumi nammineq nittarsaassivugut. Iluaqutaavoq.
Qalut Vóninimi pisortap Cuno Jensenip Danfish naammagisimaarluarpaa, ukiullu marluk qaangiuppata peqataaqqinniarluni aalajangereerpoq.
Assi: Jesper Hansen
- Saqqummersitsivitsinnut alakkarterisut amerlavallaanngikkaluartut inuit qanimut naapinneqarput. Taamaammat pisisartorilersinnaasavut sivisunerusumik oqaloqatiginissaannik periarfissiivoq - ilimagisanniillu ingerlalluarnerulluni.
- Ukiut marluk qaangiuppata peqataaqqikkumaarpugut, neriuppungalu suliffeqarfiit kalaallinit namminersortunit ingerlanneqartut amerlanerusut kalaallit ataatsimoorlutik saqqummersitsinerannut tapersersuiumaartut. Amerlanerulerutta nukittunerulissaagut, Cuno Jensen oqarpoq.
Danfish sisamanngormat ualikkut matunissaata tungaanut nunanit 49-neersut 13.708-t takuniaasimapput.
- Danfish 2025 iluatsilluarsimanera taamaammat qularutissaanngilaq, Europap avannaani aalisarneq pillugu nittarsaassinerit annersaannik aaqqissuussisoq, Aalborg Kongres og Kulturcenterimeersoq, nuannaarpasilluni oqarpoq.
