Kalaallit Nunaat qitiusoq
Kalaallit Nunaat Europap avannaani aalisarneq pillugu nittarsaassinerit annersaanni Aalborgimi marlunngornermi ammarneqartumi sammineqarpoq.
Aalborgimi Kalaallit Illuutaanneersut Nanna Kristensen Wedde aamma Nikoline Eugen Sørensen peqataasunut Kalaallit Nunaat pillugu oqaluttuarput.
Assi: Jesper Hansen
Europap avannaani aalisarneq pillugu nittarsaassinerit annersaanni Danfishimi marlunngornermi ullaap tungaani ammarneqartumi Kalaallit Nunaat qitiuvoq.
Aalborg Kongres og Kulturcenterianeersut nittarsaassinermik aaqqissuussisuupput, kalaallillu peqataasut illorsuup qeqqani katersuullugit inissinneqarsimallutik. Tamatumalu saniatigut Aalborgimi Kalaallit Illuutaat suleqatigalugu kalaallit nunaanni aalisarneq kulturilu pillugit saqqummersitanik paasisaqarfigineqarsinnaasunik ikkussuussisimallutik.
Tassani peqataasut allaaserisat, assit, nerisassanik misiliinerit qarasaasiarlu atorlugu isaruarsualerlutik Kalaallit Nunaat qanimut misigisinnaavaat.
Kalaallit saqqummersitaat Aalborg Kongres og Kulturcenterip pisortaanit Nicolaj Holmimit ammaanersiornermi aamma eqqaaneqarput, peqataasunullu tamanut kalaallit nittarsaassinerat alakkarteqqullugu kajumissaarutigalugu.
Borgmesteri ammaanersiornermi peqataasoq
Avannaata Kommuniani borgmesteri Lars Erik Gabrielsen ammaanersiornermi peqataasut ilagaat. Taassuma kommunimi pisortaaneq Nick Nielsen sulisullu allat peqatigalugit Polar Expo Ilulissani oktobarimi pisussaq ulluni tulliuttuni nittarsaatissallugu.
Aalborg Kongres og Kulturcenterip saqqummersitsiviani allami Ilulissani Polar Expo aamma Nuummi Arctic Expo upernaaru siullermeerluni pisussaq nittarsaanneqarpoq. Aaqqissuussat taakku marluk AKKC teknikkut aaqqissuussisoraat.
Avannaata Kommuniani borgmesteri Lars Erik Gabrielsen Danfiship ammarneqarnerani peqataavoq. Kommunimi pisortaaneq Nick Nielsen tunuaniittoq takuneqarsinnaavoq.
Assi: Jesper Hansen
Alluni pingasuni nittarsaassinermi nunanit 50-init 12.000-it 15.000-illu akornanniittut peqataassasut aaqqissuisut naatsorsuutigaat.
Kalaallit Nunaanneersut amerlasuut Danfishimut peqataaniarlutik ukiakkut sulinngiffeqartarput – aamma kalaallit Danmarkimiittut amerlasuut nittarsaassinermut peqataasarput, taamaattumik aaqqissuussaq kalaallinut naapittarfittut ileqqunngorsimalluni. Nittarsaassisunut nunaniillu allaniit peqataasunit tamanna maluginiarneqartarpoq.
Kalaallit Nunaannit Danfishimi nittarsaasseqataasut tassaapput Tusass, Nalunaarasuartaateqarnermut Aqutsisut, Avannaata Kommunia, Qalut Vónin, KNAPK, KONFIFA, Royal Arctic Line aamma Aalisarnermut Piniarnermullu Naalakkersuisoqarfik.
