”Imermut nilannullu pilersaarut” nutaaq aningaasaleerusutsitsilissaaq

Naalakkersuisut 2017-milu imermik nilannillu avammut niuernerup annertusinissaanik annertuumik kissaateqarput.

Ingerlalluartoqarsimanngilarli, inuussutissarsiornermillu ingerlatsisut siuariarnermik ineriartornermillu kissaatigineqarsimagaluartumik misiginngillat.

Maanna inuussutissarsiornermut, aatsitassanut, nukissiuutinut, inatsisit atuutsinneqarnerannut naligiissitaanermullu naalakkersuisoqarfik periusissiamik nutaamik saqqummiussivoq, taannalu inatsimmik iluarsiinissaq peqatigalugu ataqatigiinnerusumik sinaakkusiillunilu imermik ingerlataqartunut siuariarnissamut periarfissanik pitsanngorsaassaaq. Sermersuarmit erngup nilaallu immikkuullarillunilu annertoorujussuarmik periarfissaqarnera, avammullu niuernissamut aamma periarfissaqarnera qularutissaanngilaq. Tamannali qanoq ilillugu niuerninngortinneqarsinnaava? 

Sulianik eqaannerusumik ingerlatsineq

Periusissiaq immikkoortunik pingaarnernik pingasuni imaqarpoq.

Siullertut inatsit aaqqissuuteqqillugulu pitsanngorsarneqassaaq, tassani royaltyp aaqqiissutaaneranut tunngavissiaq ilaassaaq. Aappassaattut suliamik ingerlatsisarneq eqaallisarneqassaaq, taamaalilluni akuersissummik qinnuteqartarneq eqaannerulerlunilu ajornaannerulersillugu. Pingajussaattut sinaakkutit soqutiginninnerlu aningaasaliisartunik aallarnisaasunullu pilerilersitsisut pilersinneqassapput. Periusissaq malillugu sermersuarmit imeq nalituutut tunisassiatut kiisalu annertoorsuanngorlugu nunarsuarmi piumanermut annertusiartortumut aaqqiissutitut neqeroorutitut sulissutigineqassaaq.

Nunarsuarmi niuerfinni nunat soorlu Frankrig, Italia Schweizilu imermik puiaasaaqqanik puulinnik avammut niuernermi siuttuupput. Kalaallit Nunaat niuernermut tassunga ilanngutissappat, piseqqusaarinerup nittarsaassinerullu nukittorsarnissaa pisariaqarpoq. Periusissiaq malillugu nittarsaassinermut periusissiamik meqqilersuinermillu pitsaassutsimik suminngaanneerfimmillu aallussisumik suliaqartoqassaaq.

USA-mut containeritigut periarfissat

Periusissiaq malillugu siusinnerusukkut misilittakkat Kalaallit Nunaani tunisassiornermik aallartitsinerup pisariullunilu annertoorsuarnik aningaasartuuteqarfiusarnera takutippaa. Tamatumalu saniatigut assartuussinermut aningaasartuutit qaffasipput.

Periusissiaq malillugu attaveqaasersuutit pitsanngorsarnissaat sulissutigineqassaaq: ”Sermimik imermillu avammut tunisassiornermi Amerikami niuerfinnut attaveqaasersuutit pitsaanerusut aammalu containerinik angallassisinnaanermut periarfissat pitsaanerusut iluaqutigilluarsinnaavai.”

Ingerlatseqatigiiffiit tallimat akuersissutinik pigisaqartut

Ingerlatseqatigiiffiit nunatsinneersut nunanillu allaneersut arlallit piffissap ingerlanerani misissueqqaarnissamut iluaquteqarnissamullu akuersissutinik tunineqartarput.

Naalakkersuisoqarfilli malillugu ingerlatseqatigiiffiit tallimaannaat ullumikkut iluaquteqarnissamut akuersissutaateqarput.

Taakku tassaapput Arctic Ice, 2024-mi Nuup Kangerluanit sermimik Dubailiaassisut. Ingerlatseqatigiiffiup Ilannguaq Lennert Olsen siulittaasoraa.Ingerlatseqatigiiffik allattorsimaffimmiittoq alla tassaavoq 

Glacier Water Company Jørgen Wæver Johansen siuttuuffigineqartoq. Glacier Water Company Imivimmik taaguutilimmik imermik puiaasaaqqanut puukkamik tunisassiorpoq. Ingerlatseqatigiiffiulli Imiviup nunanut allanut nioqqutiginiarnera ajornakusoortippaa. 

Ingerlatseqatigiiffik nutaaq akuulersoq 

Nutaartaqarpullumi: Arcticulture ApS, qanittumi Kangilinnguit eqqaanni akuersissuteqalerpoq. Ingerlatseqatigiiffik siusinnersukkut illoqarfimmi inerisaanermik suliffeqarfimmi Nuuk City Developmentimi pisortaasimasumit Jens B. Frederiksenimit, siusinnerusukkut Greenland Mineralsimi pisortaasimasumit, Johannes Kyedimit kukkunersiuisummillu Jan Richardimit pigineqarpoq.

Imermik nilannullu tunngasumik inatsisip oqaasertassaasa nutaat Inatsisartut 2026-mi upernaakkut ataatsimiinneranni saqqummiunneqarnissaat ilimagineqarpoq. Inatsisartut inatsisissatut siunnersuummik suliaqareerpata, sulianik ingerlatsinermut ilitsersuut nutartigaq inaarsarneqassaaq.