Royal Greenland tunisassiakinnerugaluarluni sinneqartooruteqarpoq

Namminersorlutik Oqartussat suliffeqarfiutaat Royal Greenland ukiuni arlalinni ingerlanerloreerluni sinneqartooruteqarpoq.

Pisat ikiligaluartut aningaasatigut ingerlalluaqqilernissamut tamanna alloriarnerusoq pingaarutilik, suliffeqarfik tusagassiuutitigut nalunaarummi allappoq.

Royal Greenlandip aningaasartuutit appartillugillu ingerlatsineq pisariillisarpaa. Royal Greenlandip 2025-mi tunisassiai ikinnerungaluartut 6 mio. koruuninik angusaqartoqartoq suliffeqarfiupput nammineq nalunaarutigaa.

Ingerlatsinermi angusat 299 millionit koruuniusut, 2024-milu 161 millionit koruuniusut ingerlatseqatigiiffimmit tikkuarneqarput.

Akileraarutit ilanngaatigalugit 107 mio. koruuninik amigartoortut

Akileraarutit ilanngaatigereerlugit angusat misissuataaraanni 107 millionit koruuninik amigartoortoqarpoq.

Pisortaaneq Toke Binzer angusat pillugit ima oqarpoq:

"Tunisassiassanik ikinnerusunik suliaqaraluarluta kaaviiaartitat attatiinnarsinnaasimavagut. Tamanna niuerfinni akit qaffakkiartornerannik pissuteqarpoq, kisiannili annerpaamik aamma suliffeqarfimmi siunnerfilimmik suliniuteqarnermik, aningaasartuutinik sukannersumik aqutsinermik sunniuteqarluartumillu aaqqissuussinernik pissuteqarluni, taamaalilluta naggataatigut tunisassiassanit naleqarnerusumik pissarsisinnaalerluta,“ Toke Binzer oqarpoq nangillunilu:

“Isertitaqarnerput aningaasaqarnikkullu toqqavipput nukittorsarpavut , tamannalu ukiuni aggersuni Nunatsinni tunisassiornermut aamma nunami tunisassiorfinnut aningaasaliinissarput eqqarsaatigalugu pitsaanerujussuarmik aallaavissaqalersippaatigut.”

2024-mi 2025-milu suliniutinut arlalinnut aningaasartuutit katillugit 150 millionit koruunit sinnerlugit atorneqartut angusanut apparsaataasimasut ingerlatseqatigiiffik aamma allappoq.