Nunaqarfiit
Kangerluk politikkikkut eqqumaffigineqartoq
Nunaqarfiup Kangerluup siunissaa annaanniarlugu politikkikkut suliniarneq aallartinneqassasoq, Kommune Qeqertalimmi borgmesteri Ane Hansen oqarpoq
Kommune Qeqertalimmi kommunip aningaasaqarnera pillugu augustip naanerani isumasioqatigiittoqarnissaanut atatillugu Kangerluup ineriartortinneqarnissaanut periarfissat oqaluuserineqassasut, borgmester Ane Hansen, Inuit Ataqatigiit, paasissutissiivoq
Assiliisoq: Mathias Wille
Nunaqarfik Kangerluk
Qeqertarsuup eqqaaniittoq inoqarnerpaagami 70-it sinnerlugit inoqarsimasoq,
maannakkut qulit missaannik taamaallaat inoqarpoq, nunaqarfiullu
ineriartorteqqinneqarnissaa pillugu politikkikkut oqallinneq pimoorullugu
aallartinneqartariaqartoq, Kommune Qeqertalimmi kommunalbestyrelsimut ilaasortaq
Qasigiannguaneersoq Aqqa Samuelsen, Siumut, isumaqarpoq.
Taamaammat
Kangerluup siunissaa pillugu oqallisissiamik siorna oktoberimi kommunalbestyrelsimut
Aqqa Samuelsen oqaluuserisassanngortitsivoq, taannallu aallaavigalugu
Kangerluup siunissaa pillugu augustip naalernerani kommunalbestyrelsimi
oqallinneq pissasoq, borgmester Ane Hansen, Inuit Ataqatigiit, paasissutissiivoq.
Kangerluup siunissaa pillugu anguniagassanik misissuinisoqarnissaa pillugu Aqqa Samuelsen siorna oktoberi aallartilaartoq kommunalbestyrelsimut oqaluuserisassanngortitsivoq. - Kangerluk Kommune Qeqertalimmi nunaqarfiit inukinnersaraat, nunaqarfiullu inuerukkaluttuinnarnera isiginngitsuusaaginnarneqarsinnaanngilaq, Kommune Qeqertalimmi kommunalbestyrelsimi ilaasortaq Aqqa Samuelsen, Siumut, oqarpoq
Privat
Iliuuseqartoqartariaqartoq
Kangerluup
inuerukkaluttuinnarnera iliuuseqarfiginiarlugu qinigaaffiup uuma ingerlanerani politikkikkut
anguniakkanik suliniutissanillu saqqummiussisoqarnissaa
pinngitsoorneqarsinnaanngitsoq, Aqqa Samuelsen isumaqarpoq.
Taamaattumik Kommune
Qeqertalimmi kommunalbestyrelsemi partiit tamarmik aammalu allattoqarfik
borgmester Ane Hansen siuttoralugu, Kangerluup
siunissaa pillugu anguniagassanik misissuinisoqarnissaa pillugu Aqqa
Samuelsenip siorna oktoberi aallartilaartoq kommunalbestyrelsimut
oqaluuserisassanngortitsivoq.
- Kangerlummi
innuttaasut amerliartoqqilernissappata isumaginninnikkut, meeqqeriveqarnikkut,
atuarfeqarnikkut, inuussutissarsiornikkut, sanaartornikkut, attaveqaatitigut
angallannikkullu periarfissat pillugit oqallinnissaq misissuinissarlu
pisariaqarpoq.
- Kangerluup
siunissaa pillugu kommunalbestyrelsemi assigiinngitsumik
isumaqarsinnaagaluarluta paaseqatigiissinnaanitsigut
alloriaqatigiittariaqarpugut.
- Nunaqarfillu
siunissami napaannassappat kommunalbestyrelsi ataatsimoorluni nunaqarfiup
siunissaa pillugu pilersaarutinik saqqummiussisoqartariaqarpoq,
taamaattoqanngippammi nunaqarfiup napaannarnissaa ajoraluartumik
aarlerinartorsiulersinnaavoq, taanna oqarpoq.
Kangerlummi
aalisakkerivik Polar Seafoodimik pilersitseqataasup Jens Sallingip pigivaa,
taannalu iluatsilluartumik 2017 tikillugu saarullinnik tarajorterivittut
ingerlannikuullugu.
Nunaqarfiup
ammaannarsinnaanissaanut aalisakkerivik pingaaruteqartoq, Kangerluullu eqqaani
aalisagaqarluarpat tunisassiorfiullu ammaqqinneqarsinnaanissaa ammaffigigini
taassuma siornatigut oqaatiginikuua.
Oqaluuserineqassasoq
Kommune Qeqertalimmi
kommunip aningaasaqarnera pillugu kommunalbestyrelsimut ilaasortat
nunaqarfimmilu aqutsisut tamarmik peqataaffigisaannik augustip naanerani
isumasioqatigiittoqassaaq, tassungalu atatillugu Kangerluup siunissaa pillugu
oqallittoqassasoq, borgmester Ane Hansen oqarpoq.
- Tamatuma
kingorna Niaqornarsummi, Ikerasarsummi, Kangerlummilu nunaqarfimmi aqutsisut
siulittaasuat peqatigalugu Kangerlummi innuttaasunik naapitsinissarput pissasoq
naatsorsuutigaara, Kangerlummullu aqqutit periarfissallu maanna
misissorneqarput, borgmesteri oqarpoq.
Kangerluup
takornariaqarfittut ineriartortinneqarnissaanut periarfissarissaartoq Ane
Hansenip siornatigut oqaatigisareerpaa.
