Nuup illoqarfiata qeqqani atuarfissap nutaap
sanaartortitsisunut Kommuneqarfik Sermersuumut tunniunnissaa
kinguaattoorfiungaarami sanaartortunut islandimiunut Istak-imut akisuvoq.
Nuup illoqarfiata qeqqani atuarfissap nutaap
sanaartortitsisunut Kommuneqarfik Sermersuumut tunniunnissaa
kinguaattoorfiungaarami sanaartortunut islandimiunut Istak-imut akisuvoq.
Sermitsiap naatsorsuisimanera naapertorlugu
januaarip naanerani ullormut akiligassat katillugit 23,6 million koruuniupput.
Aviisip Søren Sohn Krog Pedersen,
Kommuneqarfik Sermersuumi Sanaartornermut Avatangiisinullu Ingerlatsivimmi
pisortaq, attaveqarfigaa.
Sanaartortitsisup, kommunip, ullormut
akiligassarititaasa qanoq annertutiginerat oqaluttuarerusuppaa. Tamatumunnga
pissutaavoq Istak-ip Kalaallit Nunaanni atuarfiit annersaata, Atuarfik
Inussuup, tunniunnissaanut piffissaliussaq qaangersimammagu. Tamanna pivoq
marsip aallaqqaataani 2024-mi.
Istak ullormiit tassaniit ullormut
akiligassinneqartarsimasoq Søren Pedersen Sermitsiamut mailikkut allappoq.
- Sanaartornermi
isumaqatigiissut naapertorlugu ullormut akiliutissat akilerneqartarnissaat
aalajangersarneqarsimavoq. Ullormut akiliutissat marsip aallaqqaataani
2024-miit akilertinneqarsinnaapput, taamatullu akilerneqartarsimapput. Ullormut
akiliutissat ullormut 70.000 koruuniupput.
- Tassa
imaappoq sanaartortitsisup, Kommuneqarfik Sermersuup, marsip aallaqqaataani
2024-miilli ullormut 70.000 koruuninik akiliinissaq piumasaraa, Søren Pedersen
mailimi allappoq.
Sanaartortut nipangersimasut
suliffeqarfimmi Istak-imi Reykjavikimiittumi,
Danmarkimi sanaartornermik suliaqartut annersaannit Aarsleffimit tamakkiisumik
pigineqartumi, pisortaq Karl Andreassen oqaaseqarusunngilaq. Sanaartortitsisoq
sanaartorneq naammassillugu tunniunneqartinnagut kommunimit isumaqatigiissut
naapertorlugu oqaaseqarsinnaanngitsoq tamatumunnga pissutaavoq.
Istak kommunilu 615 million koruuninik
nalilimmik atuarfiliornissamut meeqqeriviliornissamullu 2019-imi
isumaqatigiissuteqarput. Isumaqatigiissutip atsiorneqarnerata kingorna Covid 19
nunarsuaq tamakkerlugu tuniluuppoq, tamatumalu kingunerisaanik Kalaallit
Nunaanni sanaartornerit arlallit, ilaatigut mittarfiliornerit atuarfissallu
nutaap sanaartorneqarnerat, ajornartorsiorlutillu
kinguaattoorfiungaatsiarsimapput. Ilaatigut atortussanik pilersuineq
sulisussarsiornerlu ajornartorsiutaasimapput.
Isumaqatigiinngissutit
Istakkit atuarfissuaq 2021-mi sanaartorlugu
aallartippaa. Atuarfik marsip aallaqqaataani 2024-mi naammassineqartussatut
kommunimilu oqartussanit akuerineqartussatut naatsorsuutigineqarpoq. Atuarfiup
Inussuup tunniunnissaanut piffissaliussaq kingorna kinguartinneqarpoq,
taamaalilluni atuarfik aggustimi 2024-mi atorneqarsinnaasussanngorlugu.
Tamannalu aamma iluatsinngilaq.
Kommunimi sanaartornermut oqartussaasut,
Søren Pedersenimit aqunneqartut, ikuallattoqartillugu isumannaallisaanermut
pilersaarutip nutartikkap sanaartortumit suli tigusimannginnerat
kinguaattoornermut pissutaavoq. Ikuallattoqartillugu isumannaallisaanermut
pilersaarut oqartussanit aatsaat akuerineqarpat atuarfik sanaartortitsisunut
tunniunneqarsinnaavoq.
Ikuallattoqartillugu isumannaallisaanermut
tunngatillugu suliassaq unittoorfiuvoq, tassami Istak kommunilu
isumaqatigiinngilluinnarput, naak Istak 2021-mi sanaartornissamut
akuersissummik ikuallattoqartillugulu isumannaallisaanermut pilersaarutissamik
akuerisaasumik tunineqaraluartoq. Ikuallattoqartillugu isumannaallisaanermut
pilersaarut akuerisaareerpat aatsaat atuarfik sanaartortitsisumut
tunniunneqarsinnaavoq – atuarfillu atuartunit ilinniartitsisunillu
atorneqalersinnaavoq.
– Sanaartorneq naammassingajalermat
oqartussat inatsisit naapertorlugit sanaartortoqarsimanersoq
misissortariaqarpaat. Tassani Istak kommunilu isumaqatigiinngissuteqalerput,
tassanilu uppernarsaatit eqqortut pigineraat ingerlaannaq
paasineqarsinnaanngilaq, pisortaq Søren Pedersen Sermitsiami sapaatip
akunnerani kingullermi allaaserisami oqarpoq.
COWI kinguarsaasoq
Kommunimi ikuallattoqartillugu
isumannaallisaanermut siunnersortip, qallunaat siunnersuisarfissuata COWI-p,
Istak akornusersorpaa. Kommuneqarfik Sermersooq ikuallattoqartillugu
isumannaallisaanermut siunnersortimik nutaamik, COWI-mik, pissarsimmat, Istak
atuarfimmik naammassisumik kommunimut tunniussinissamut akuerineqanngilaq.
Ikuallattoqartillugu isumannaallisaanermut pilersaarut
akuerineqarsinnaanngimmat Istak atuilernissamut akuersissummik
tunineqarnissaminut itigartinneqarpoq.
Tamanna islandimiunut sanaartortartunut
suliffeqarfimmullu piginnittuusumut Aarsleffimut pakatsissutaangaarpoq.
Minnerunngitsumik Kalaallit Nunaanni atuarfiliornissamik aaqqiagiinnginneq
Istakimut ullormut akiligassiissutinik millionilinnik naleqarmat.
Sermitsiap paasisai naapertorlugit
nutaarsiassat kingulliit tassaapput Istakip ikuallattoqartillugu
isumannaallisaanermut periusissiaq nutartikkani kommunimut tunniussimavaa.
Kommuneqarfik Sermersooq Nuummi atuarfimmut
nutaamut atuartut ilinniartitsisullu qaqugu nuussanersut suli
nalunaaruteqanngilaq.
Atuarfiit aserfallassimasut marluk
taarserneqassasut
Atuarfik nutaaq illoqarfimmi atuarfiit marluk
aserfallassimasut ullutsinnullu naleqqukkunnaarsimasut Atuarfik Ukaliussaq
(USK) aamma Atuarfik Samuel Kleinschmidt (ASK) taarserniarlugit sananeqarpoq.
Atuarfik Nuummi atuartut siunissami amerlinissaat eqqarsaatigalugu atuarfinnut
pioreersunit amerlanerusunut inissaqartitsissaaq.
Istak nunatsinni ilisimaneqarluarpoq,
pingaartumik erngup nukinganik nukissiorfiliortarnermigut. Utoqqarmiut
Kangerluarsunnguanni erngup nukinganik nukissiorfik, Nuummut innaallagissamik
pilersuisoq, kisiat pinnagu, suliffeqarfiup Nukissiorfiit sinnerlugit Kalaallit
Nunaanni erngup nukinganik nukissiorfiit tamaasa sanasimavaat. Istak-ip
sanaartugaasa ilagaat Paakitsumi erngup nukinganik nukissiorfik, Ilulissanut
innaallagissamik pilersuisuuvoq.
