Naalakkersuisut: RG-p angusai naammaginanngitsorujussuupput
Royal Greenlandip ukiumoortumik naatsorsuutai Naalakkersuisut siulittaasuata Múte Bourup Egedep (IA) naammaginanngitsorujussuunerarpai, ingammik amigartoorutit ilaat Amerika Kujallermi ingerlatsinermut tunngassuteqarmata.
Assiliisoq: Leiff Josefsen
Namminersorlutik Oqartussat suliffeqarfiutaata Royal Greenlandip 2023-mut naatsorsuutit tallimanngormat saqqummiuppai, tassanilu 211 million koruuninik amigartooruteqartoqarpoq.
Naalakkersuisut siulittaasuata Múte B. Egedep (IA) angusat naammaginngilai.
Royal Greenland A/S-imut Kalaallit Nunaat aallaaviusoq aammalu suliffeqarfiup ukkassinera sapinngisamik annertunerpaamik Kalaallit Nunaannut aningaasarsiortitsinerulerluni, Kalaallit Nunaanneersunik nioqqutissiassaniissasoq Naalakkersuisut arlaleriarlutik erseqqissartaraat, siulittaasup tusagassiuutinut nalunaarummi oqaatigaa:
- Amigartooruteqarnerup ilarujussua Royal Greenlandip Amerikami Kujallermi aningaasaliinerineersuusoq Naalakkersuisut paasivaat.
Sunnertianermik annikillisitsissasoq
- Tamanna naammaginanngilluinnarpoq, taamaattumillu Royal Greenlandimi pissutsit iluarsinissaannut Royal Greenlandimi aqutsisut maannakkut iliuuseqassasut, ingerlatseqatigiiffiullu pissusissamisoortumik inissisimaffia immikkut ukkatarissagaat – tassalu Kalaallit Nunaat aamma Atlantikup Avannaa, Naalakkersuisut naatsorsuutigaat, Múte B. Egede oqarpoq.
Suliffeqarfiup ilusiligaanerata allanngortinnissaanut kiisalu aaqqissuussaanerup sunniuteqarluarnerulersinnissaanut aqutsisunngortut suliniuteqalersimasut maluginiarpaa.
- Suliffeqarfik sapinngisamik piaarnerpaamik Royal Greenlandip siumut aallarteqqissagaa, kiisalu suliniutissanik nunani allani aningaasaliinernit sunnertianermik annikillisitsisussanik aallartitsissasoq, akiitsut annikillisinnissaannut kiisalu Royal Greenlandip Kalaallit Nunaanni sulinerani aningaasaliinerit ukkatarissagai, taamaattumik naatsorsuutigaara.
