Royal Greenlandip 2023-mi taama amigartooruteqartiginera soorunami isiginngitsuusaarneqarsinnaanngilaq. Taamaattumik ingerlatseqatigiiffimmi suut tamaasa misissoqqissaarpavut, aningaasartuutivut malunnaatilimmik appartinniarlugit, Royal Greenlandimi pisortaaneq Susanne Arfelt Rajamand, nittartakkami aviisimut Sermitsiamut oqarpoq.
Suliffeqarfimmi aqutsisut siuttuisa suliaq tamanna aqukkaat, ilisimasalinnillu avataaneersunit ikiorneqarpiarneq ajortut, erseqqissaavoq.
RG-p ilisarnaataa tammatsaalineqassaaq
Akileraarneq sioqqullugu amigartoorutit aatsaat taama amerlatigisut 255 mio. kr.-usut Namminersorlutik Oqartussat ingerlatseqatigiiffiutaannut ajoqutaapput, suliffeqarfiullu ilisarnaataa immikkut ittoq annaanagu niuernerup annikillisarnissaa maanna pineqarpoq.
- Suliffeqarfik tamaat misissorparput, suliallu niuernermut iluaqutaanngitsut misissorneqarput, tamannalu naapertorlugu iliuuseqassaagut, RG-mi pisortaaneq oqarpoq.
Suliniutit assigiinngitsorpassuit sammineqarput, 2024-milu 100 mio. kr.-inik sinneqartoornissamut qulakkeerutaasinnaasut arlallit Susanne Arfelt Rajamandip eqqaavai.
- Pisiortornermi pitsaanerusumik silatusaarnerusumillu qanoq iliorsinnaanerluta misissortarparput. Assersuutigalugu poortuutissanut aningaasartungaatsiarpugut, taamaattumillu qanoq akikinnerulersissinnaanerlugu misissorparput. Nioqqutissat kiffartuussinerillu pingaarnertut niuerutiginngisavut unitsittariaqalersinnaavagut, pisortaaneq ilisimatitsivoq.
Soraarsitsineq soraarsitsinnginnerluunniit
Suliffeqarfiup annikillisarneqarnera sulisunut sunniuteqassasoq miserratiginngilaa, sulisulli qassit RG-mit soraassanersut maannakkut oqaatigisinnaanngilaa.
- Suliniutit arlallit ingerlateqqileruttorpavut, sulisunullu attuumassuteqartut suli toqqaannartumik oqaaseqarfigisinnaanngilavut, Susanne Arfelt Rajamand oqarpoq.
2023-mi Chile 85 mio. kr.-inik amigartoorutaavoq, tassanilu niuerneq pitsaanerulersinniarlugu pisassiisarfiit ilaat atorunnaarsinniarlugit aalajangerneqareerpoq. Chile-mi niuernerup 2024-mi iluanaarutaanissaa naatsorsuutigineqarpoq.
Suliffeqarfik nunani amerlasuuni sulisoqarmat, angalanermut aningaasartuutit nakkutigineqarputtaaq.
- Canadami suliffissuaq amigartoorfiusoq 2023-mi matuniarlugu aalajangerpugut, ukioq mannalu 2024-mi tamanna angusaqarluarnerunissamut qulakkeerutaassaaq, oqarpoq.
Suliat pingaarnerit ukkatarineqarput
- Pingaarnertut suliassavut siunissami pingaarnerutilertariaqarivut qularutissaanngilaq. Ukioq mannali aningaasartuutit millioninik marlunnik kisitsisitalinnik ikilisinnissaat anguniagaraarput. Ukiuni kingullerni marlunni aningaasartuutit 600 mio. kr.-inik amerleriarsimapput. Tamanna qisuariarfigisariaqarparput. Erniat qaffakkiartornerat, ikummatissat akitsoriartornerat suullu tamangajaasa akitsoriartornerat nunarsuaq tamakkerlugu inuussutissalerisunut unammillernartuuvoq.
Aqutsisut eqqugaanngitsuussanngillat. Ukiumi naatsorsuiffiusumi amigartooruteqaraanni, qullersaqarfinni ilaasortat aningaasanit sinnerussanit pissarsiaqartassanngitsut aalajangerneqareersimavoq.
- Sulilluaraanni akissarsisinneqarnissaq pissusissamisuuginnarpoq, taamaattumik aningaasanit sinnerussanit pissarsisarnissamut politikki nutaaq aqutsisunit naammagisimaarneqarluarpoq, Susanne Arfelt Rajamand oqarpoq.
Ukiorpassuarni suliarineqartoq
2024 ikaarsaarfittut isigineqarpoq, minnerpaamilli aatsaat ukiut pingasut ingerlareerpata niuernerup iluanaarutaasumik ingerlalernissaa naatsorsuutigineqarsinnaavoq.
Royal Greenland inuiaqatigiinni immikkut akisussaaffeqarpoq, sinerissamilu aalisartut suliffissuarnilu sulisut suliffissaqarnissaannik qulakkeerinnittuulluni.
Inuiaqatigiinni akisussaaffeqarnerup ingerlatseqatigiiffimmut qanoq akisutiginera naatsorsorsimavisiuk?
- Aningaasat amerlassusai naatsorsoruminaapput, aningaasalli millioninik pingasunik kisitsisitallit pineqartut qularnanngilluinnarpoq. Namminersorlutik Oqartussanit pigineqartutut soorunami piginnittut oqaloqatigisarpavut. Royal Greenlandilli tamatumuuna qanoq iliuuseqartarnera tamakkiisumik takusinnaajumallugu piffissap ingerlanerani assigiinngitsorpassuit eqqarsaatigisariaqarput, pisortaaneq oqarpoq.
Tunisinermi akigititap apparnera
Assersuutigalugu 2023-mi saarullinnut tunisanut akigititat pillugit ingerlatsiviup aalisartunut iluaqutaasumik annaasaqarneranut takussutissaavoq.
- Saarullinnut tunisanut akigititat 2023-mi unammillerneqarluarput, saarulliit tonserpassuit akikitsumik Ruslandimit Europamut tunineqartarmata. Saarullinnut akigititat aasaanerani aatsaat allanngortippavut. Tamanna saarullinniartunut iluaqutaavoq, RG-mulli aningaasartuutaasimavoq, pisortaaneq inuiaqatigiinnut akisussaassuseqarnermut tunngatillugu assersuuteqarluni nassuiaavoq.
Kalaallit Nunaanni suliniutit 2,2 mia. kr.-inik inuiaqatigiinnut isertitaqartitsisimasut oqarpoq.
- Naleqarluarpoq. Inuiaqatigiinnut iluaqutaasumik ukiorpassuarni sinneqartooruteqarluartarpugut. Tamanna ingerlateqqikkumavarput, Susanne Arfelt Rajamand oqarpoq.
Aalisarnermut inatsisissaq nutaaq eqqarsaatiginngikkaat
Qaammatini kingullerni aalisarnermut inatsit nutaaq oqallisigineqangaatsiarpoq, Royal Greenlandilu mininneqassasoq isumaqartoqarpoq.
- Maannakkut ingerlanitsinni aalisarnermut inatsit nutaaq eqqarsaatiginngilarput. RG-p ingerlalluarnissaa qulakkeerniarlugu maannakkut iliuuseqartariaqarpugut pisariaqartunillu naleqqussaalluta. Aatsaat aalisarnermut inatsit nutaaq akuerineqarpat siunissamut pilersaarusiornitsinnut ilanngunneqassaaq, aalisakkerivimmi pisortaaneq ilisimatitsivoq.
