Naatsorsuutigisamit Air Greenland sinneqartooruteqarnerunngilaq

- Pilersaarutit malillugit kaaviiaartitat ineriartorsimapput, ingammik ilaasunik angallassinermi, kaaviiaartitat allat allannguuteqarpallaarsimanatik. Aningaasartuutit nakkutigineqarput, pingaartumillu orsussap akiisa qaffannerinut naapertuuttumik ingerlanneqarlutik, Air Greenlandip pisortaanera Jacob Nitter Sørensen, 2023-mut ukiumoortumik nalunaarusiami, taama ilisimatitsivoq.

Kaaviiaartitat 1,78 milliardit koruuniusut 9,6 procentinik qaffariarput, tamannalu ilaasut amerlanerunerannik pissuteqarpoq. Tassa ilaasut 2022-mi 416.000-init siorna 459.000-inut amerleriarput. Nammineq aningaasaatit 2022-mi 692,5 millionit koruuninit siorna 747 millionit koruuninut amerleriarsimapput.

Taamaatitsinerit akisupput

Timmisartuussinernik taamaatitsiinnarnernut atatillugu nerisassanut unnuiffissanullu suli annertuumik timmisartortitseqatigiiffik aningaasartuuteqartarpoq — 80 millionit koruunit missaannik.

- Taamaatitsinerit amerlanersaat Kalaallit Nunaatsinni silarlunneranik, silap pissusiata allannguutaatut taagulersinnaasatsinnik peqquteqartarput. Kangerluit sikuneri, sikorsuit ingerlaarneri, pujoq anorilu timmisartuussinitsinnut akulikinnerusumik sunniuteqartalerput, siornatigumullu naleqqiullugu timmisartuussinernik amerlanerusunik taamaatitsisariaqartalerpugut, siulersuisunut siulittaasoq Bodil Marie Damgaard, tusagassiuutinut nalunaarummi oqarpoq.

2022-mi sila teknikkikkullu ajornartorsiuteqarneq pissutigalugit nerisassanut unnuiffissanullu aningaasartuutit 100 millionit koruunit pallippaat.

- Ingerlatsineq patajaannerulersinniarlugu timmisartuvut Dash-8-t ataatsimik ilavagut, taannalu 2023-mi juunimi ingerlalerpoq. Siornatigut akimmisaarfigisartakkatsinnut iluaqutaavoq, taamaatitsisoqareernerani ilaasuvut uniinnartut sukkanerusumik ingerlateqqissinnaaleratsigit, Jacob Nitter Sørensen oqarpoq.

Sulisut amerlanerusut

Covid-19-ip nunarsuaq tamakkerlugu tuniluunnera, 2020-mi nunarsuarmi tamarmi eqquisoq, timmisartortitseqatigiiffimmi sulisunut amerlasuunut sunniuteqarpoq, maannali suliffeqarfissuarmi sulisut tuniluuttoqannginnerani sulisunit amerlanerupput. 2019-imi ukiumut agguaqatigiissillugu sulisut 677-iupput. 2021-mi 574-inut ikileriarput, siornali agguaqatigiissillugu sulisut 690-iupput.

Sulisut 2023-mi sullivimmik nuannarinninnerat 8 procentimik suliffeqarfimmullu unneqqarissuseqarnerat 6 procentimik qaffariangaatsiarsimaneri, Air Greenlandimit tusagassiuutinut nalunaarummi pisortat nuannaarutigaat.

Ukiuni tallimani kingullerni Air Greenland timmisartuminik nutarterinermut annertuumik aningaasaliisimavoq. „Ingerlatseqatigiiffik oqaluttuarisaanermi aningaasaliivallaarsimanngitsoq“ naatsorsuutit takutippaat. Namminersorlutik Oqartussat piginneqataasutut inissimmata tamanna iluarsineqarpoq, piffissami 2019-imiit 2023-mut 1,5 milliardit koruuninik aningaasaliisoqarluni.

• 2019: King Air 200 King Air 250-imik taarserneqarpoq
• 2020: Sikorsky 561-it marluk H225-inut marlunnut taarserneqarput
• 2021-2023: Bell 212-it arfineq-marluk H155-inut arfineq-marlunnut taarserneqarput
• 2022: Airbus 330-200 Airbus 330-800-mut taarserneqarpoq
• 2023-2024: AS350-it qulingiluat Airbus H125-inut taarserneqarput

- Aningaasatit atoriaannaat 48 procentimik appariarlutik 204,7 millionit koruuniupput, angallatinillu nutarterinerup ingerlaannarneranik sanaartornermullu aningaasaliissutit allat katillugit 349 millionit koruuniusut tamatumunnga pissutaapput, Jacob Nitter Sørensen oqarpoq.

Nutaamik taarsigassarsineq

2024-mi sanaartornermut aningaasaliissutinut nutaanut ukioq manna januaarimi 275 millionit koruuninik taarsigassarsinissamut nutaamik isumaqatigiissuteqartoqarsimasoq, pisortaasup ilisimatitsissutigaa.

- Angallassinerup pitsaanerulersinnissaa suli pingaarnerussaaq, taamaalillunilu ataasiakkaanut aningaasartuutit annikinnerulernissaat anguniarneqassalluni, tamatumalu saniatigut niuernikkut suliniutit pingaarnerutinneqarnerussapput, ilaatigut timmisartortitseqatigiiffinnik allanik suleqateqarnerup annertusinissaa, kiisalu suliat pioreersut pitsanngorsarneqarnissaat, digitalimik ingerlatsinerup annertusinissaa, niuernikkut suliassat nutaat minnerunngitsumillu atuisut pisariaqartitaat pingaarnerutinneqassallutik, AG-p pisortaa ilisimatitsivoq.

Isertitat agguataarnerat

Air Greenlandip isertitaqarnini naatsorsorsimavaa, taakkualu ukununnga agguataarsimapput:

• Ilaasunit isertitat: 63 procent

• Angallatit attartortinnerisigut isertitat: 16 procent

• Assartuinermi isetitat: 5 procent
• Allakkanit isertitat: 2 procent

• Kiffartuussinermut isumaqatigiissutinit akiliut: 10 procent

• Angallannermit isertitat allat: 4 procent

Nuummi mittarfik novembarip 28-ani ammarneqarpat attaveqaatit allanngorluinnassapput.

Piffissaq pissanganartoq

- Nunatta oqaluttuarisaanera nutaajunerusoq pissanganartoq atorparput. Inuit ilaannut Nuummi mittarfiup ammarnissaa iluanaarutaasussaavoq, allanulli annertuumik allannguisussaalluni. Tassani pingaartumik sulisuvut, Kangerlussuup matuneqarnerani sullivimminni atugaasa allanngorneri peqqutaallutik angerlarsimaffiiniit nuutsittariaqakkavut eqqarsaatigaakka. Taamaattumik sulisut taakkorpiaat allannguutissanut piareersartinnissaat uagutsinnut pingaaruteqartorujussuuvoq. Sulisut ingerlaqqinnissaminnik kissaateqartut tamaasa suliffissaqartissinnaagatsigit tulluusimaarutigisorujussuuara, tusagassiuutinut nalunaarut naapertorlugu pisortaq oqarpoq.

Sulisut nussortinnissaat naammassiniarlugu Nuummi, sulisut amerlanersaasa angerlarsimaffissaanni, sulisunut inissianik Air Greenland sanaartorpoq, kiisalu sulisut ilaat Ilulissani mittarfik ammarpat Ilulissanut nuuttussaapput. Sulisunut inissianik sanaartornerit, Nuummi nassiussaleriffiup allineqarnera, Ilulissani Qaqortumilu hangariliornerit, sullissinermut atortunik nutaanik ikkussuinerit il.il. ukioq manna angusarineqartorpiani ukiunilu tulliuttuni angusassani initungaatsiarput.

Air Greenlandimi ataatsimeersuarneq ullut 13-it qaangiuppata maajip 13-ani pissaaq.