GREENLAND AIRPORTS
Neriuutigisimasatsinnit ajornartorsiutit amerlanerusut
Nuummi mittarfiup illorsuartaavata siusissukkut ammarneqarnera eqqortumik aalajangiineruvoq, unammilligassalli annertusimapput, Greenland Airportsimi pisortaq nassuerpoq.
Assiliisoq: Greenland Airports
Pingasunngormat Danmarkimi Angallannermut aqutsisoqarfiup Nuummi mittarfimmi nunanut allanut timmisartuussinerit atorunnaarallartippai, nakkutilliisoqareernerani illorsuarmi isumannaallisaanikkut amigaateqartoqartoq paasineqarmat.
Atorunnaarallartitsinerup kingunerisaanik nunat tamalaat akornanni timmisartuussinerit ilaat Air Greenlandip taamaatiinnartariaqarsimavai. Air Greenlandip pisortaa Jacob Nitter Sørensen tamatumunnga atatillugu oqarpoq, kingumut qiviarluni illorsuartaap ammarneqarnera siusippallaarsimasoq, teknikkikkut qarasaasiatigullu ajornartorsiutit Air Greenlandip sulisuinut ilaasunullu annertuumik eqquisimammata.
Illorsuartaami ajornartorsiutit ilimagisamit annertunerusimasut, Greenland Airportsimi, Nuummi mittarfiup nutaap sanaartorneqarneranut akisussaasumi, pisortap Jens Lauridsenip nassuerutigaa:
- Mittarfiliorneq atulersitsinerlu suliniutaavoq annertullunilu pisariusoq, ilaatigut teknikkikkut atortorissaaruteqangaartumik illorsualik, tamannalu aallaqqaammut ilimagisamit ingerlanneqaruminaannerusoq paasinarsivoq.
- Aalajangiineq eqqortoq pisariaqartorlu
- Suliniummi taama annertutigisumi ajornartorsiuteqartuassaaq, neriuutigisimasatsinnilli mittarfiup illorsuaata atulerneranit ajornartorsiutit amerlanerusimasut nassuerutigissavarput, aammalu atuisutta ilaasuttalu eqqugaanerat soorunami uggoraarput, Greenland Airportsimi pisortaq Jens Lauridsen, Sermitsiamut allakkatigut oqaaseqaammini allappoq.
Ajornartorsiutit aaqqinnissaannut ingerlatsinerullu pitsaanerulersinnissaanut ilungersorluni sulisoqartoq naqissusiivoq, mittarfiullu taama siusitsigisumi ammarneqarsimanera eqqortumik aalajangiinerusoq aalajangiusimavaa:
- Mittarfissuup novembarip 28-ani atulinnginnerani nunallu tamalaat akornanni timmisartuussisalinnginnermi ajornartorsiutit annikillisinnissaat ammajaarneranut pissutit ilagaat. Tamanna aalajangiineq eqqortuusoq pisariaqartorlu suli isumaqarpugut, naak ajornartorsiuteqanngitsumik aallartissimanngikkaluartoq.
- Angusaqareeqaagut, tamannalu tulluusimaarutigaarput, ingerlaarfiussaarli, Jens Lauridsen oqarpoq.
