Nitter isornartorsiuivoq: Mittarfiup illorsuaata ammarnissaa utaqqisimassagaluarpoq
Kingumut qiviaraanni Greenland Airportsip Nuummi illorsuartaavata ingerlannissaanut annertuunik ajoquteqaqattaarsimavoq, nunat tamalaat akornanni timmisartuussinerit unitsikkallarneqarnerannut atatillugu Air Greenlandip pisortaa oqarpoq. Greenland Airports ilisimatitsivoq piaarnerpaamik isumannaallisaanerup qaffasinnerpaaffia pilerseqqinniarlugu ajoqutit aaqqinniarlugit iluarsiniarlugillu sulissuteqangaarluni.
Assiliisoq: Leiff Josefsen
Danmarkimi angallannermut aqutsisoqarfiup isumannaallisaanermut akuersissutiminik atorunnaarsitsisimanera pissutigalugu, Nuummit nunanut allanut timmisartuussinerit unitsikkallarput.
Greenland Airports mittarfimmik nutaamik ingerlatsisuuvoq, ajornartorsiutillu Air Greenlandimut sunniuteqangaarput.
Kingumut qiviarluni suut tamaasa piareeqqaarlugit mittarfiup ammarnissaa pisimassagaluartoq, Air Greenlandip pisortaa Jacob Nitter Sørensen Sermitsiamut oqarpoq:
- Mittarfiup piareersimannginnera ulluinnarni ingerlatsinitsinnut minnerunngitsumillu ilaasunut sunniuteqangaarpoq.
- Soorunami tamanna sulisutsinnut, suliaminnik naammassinnilluarsimasunut, artornartorujussuuvoq, aamma ilimaginngisatsinnik aningaasartuuteqarnerungaarpugut, Jacob Nitter Sørensen oqarpoq nangillunilu:
- Greenland Airportsip mittarfik piareersimasoq nalunaarutigimmagu malinnaalluta iliuuseqarpugut. Ammarnerulli kingorna paasivarput atortorissaarutit piareersimanngitsut teknikkikkullu atortorissaarutit misilittarluarneqarsimanngitsut. Timmisartoqarfiup illorsuaani nassatanut assartuutip ajornera, tunuleriaarpassuit utaqqiluusaarnerillu atuisutta ilisarissajunnarsivaat, Greenland Airportsip qarasaasiatigut atortorissaarutaasa kigaatsumik sulinerat pissutigalugu.
- Air Greenlandimi isumannaallisaanissaq pingaartinneqangaarpoq. Neriorsuutigineqartoq, tassa ilaasut, nassatat usillu nunanut EU-mi ilaasortanut tikittut mittarfimmut EU-p iluaniittumut allamut ingerlaqqinnissamut aammaarlutik isumannaallisaanikkut misissoqqinneqannginnissaat, suli naammassineqanngimmat uggoraara.
- Maannali pissutsit taamaapput, soorunamilu sapinngisatsinnik aaqqinniassavavut, Air Greenlandimi pisortaq oqarpoq.
Greenland Airports: Aaqqiiniarluta ilungersorluta sulivugut
Danmarkimi Angallannermut Aqutsisoqarfimmit nakkutilliisoqarmat isumannaallisaanermi kukkunerit amigaatillu paasineqartut, Greenland Airports Sermitsiamut ilisimatitsivoq:
- Ajoraluartumik tamanna pissutigalugu isumannaallisaanerup qaffasissusaa 2-mit 3-mut qaffanneqarpoq, Mikkel Bjarnø Lund oqarpoq nangillunilu:
- Ajoraluartumik maannakkut nunat tamalaat akornanni timmisartuussinerit Nuummit assersuutigalugu Keflavikimut (Island) imaluunniit Iqalunnut (Canada) toqqaannartumik ingerlanneqarsinnaajunnaarput. Nunap iluani timmisartuussinerit eqqorneqanngillat.
Greenland Airportsip pissutsit ilungersunartutut isigigai, ajornartorsiullu tamanna pissutigalugu sullitanut ilaasunullu akornutaasinnaasut ajuusaarutigineqartut, attaveqaqatigiinnermut pisortap erseqqissarpaa:
- Ajornartorsiutit paasineqartut akuerineqarsinnaanngillat, tamannalu akisussaaffigilluinnarparput. Isumannaallisaanerup pitsaassusaa piaarnerpaamik pilerseqqinniarlugu ajornartorsiutit aaqqinniarlugit iluarsiniarlugillu ilungersorluta sulivugut, taamaalilluni Nuummit nunanut allanut timmisartuussisoqaqqissinnaalerniassammat. Tassa pissutsit iluarsineqarnissaata tungaanut timmisartuussinerit unitsikkallarneqarnerat pineqarpoq.
Greenland Airports naapertorlugu Nuummit nunanut allanut timmisartuussinerni Kangerlussuarmi Kulusummiluunniit teknikkikkut isumannaallisaasoqartariaqarpoq, tassanilu ilaasut anisariaqarput isumannaallisaanermillu misissuisarfikkoortariaqarlutik.
