Nitter: USA-mut timmisartuussisalernissamut piffissaq aalajangiisuussaaq
Air Greenlandip pilersaarutaani USA-mut toqqaannartumik timmisartuussinissaq pingaartinneqartorujussuuvoq. Timmisartortitseqatigiiffilli timmisartuussisalertinnani arlallit inisseqqaassavai, Air Greenlandip pisortaanera Jacob Nitter Sørensen oqarpoq.
Air Greenlandip USA-mut aalajangersimasumik timmisartuussisarnissaa Jacob Nitter Sørensenip kissaatigingaarpaa.
Assi: Leiff Josefsen
Qanittukkut Air Greenlandip Albatros Arctic Circlemik suleqateqalernini nalunaarutigaa, 2025-mi marsimit oktobarimut sapaatip-akunneranut marloriarluni Nuup Københavnillu akornanni Kangerlussuarmut aqqusaarluni timmisartuussisarnissaq tassani isumaqatigiissutigineqarluni.
Amerikami suliffeqarfimmik assingusumik suleqateqalernissaq eqqarsaataanersoq Jacob Nitter Sørensen aperivarput.
Ilulissat utaqqiniaraat
- Pilersaarutitsinni tamanna pingaartilluinnaripput qularutissaanngilaq. Piffissarli eqqorlugu periarfissaq atortariaqarparput. Ilulissani mittarfiup ammarnissaa utaqqeqqaartariaqassavarput, Amerikamiummi Kalaallit Nunaannut angalaniaraangamik Ilulissat pingaartittorujussuusarpaat, Jacob Nitter Sørensen nassuiaavoq.
Icelandairimik aamma Canadian Northimik suleqateqarlualereerneq, taakkualu aqqutigalugit Amerika Avannarlermeersut Kalaallit Nunaannut utimullu angalasinnaasut, taassuma innersuussutigaa.
Pitsanngorsalaagassat
- Timmisartortitseqatigiiffinnik taakkuninnga marlunnik suleqateqarnitsinni maannakkorpiaq pitsanngorsalaagassat ukkatarissavavut. Piffissaq ungasinnerusoq eqqarsaatigalugu USA-mut toqqaannartumik timmisartuussisarnissamik kissaateqarnerput qularutissaanngilaq, Air Greenlandip pisortaa erseqqissaavoq.
Qaammatip ataatsip matuma siorna Canadamut timmisartuussisoqartalermat ilaassutissanik tuniniaaneq iluatsilluarniarpasissoq, timmisartortitseqatigiiffiup pisortaanerata oqaatigaa.
